અમદાવાદમાં તા.9મી માર્ચના રોજ નરેન્દ્ર મોદી સ્ટેડિયમ ખાતે રમાનાર ભારત અને ઓસ્ટ્રેલિયા વચ્ચેની ટેસ્ટ મેચ દરમિયાન મેટ્રો ટ્રેનના સમયમાં ફેરફાર કરવામાં આવ્યો છે.
મેટ્રો ટ્રેન તા.9મી એ સવારે 6થી રાત્રિના 10 સુધી ચાલનાર હોવાનું રેલવેના સૂત્રોએ જણાવ્યું છે.
ગુજરાત મેટ્રો રેલ કોર્પોરેશન (GMRC)એ ટેસ્ટ મેચોમાં દર્શકોની અવરજવર માટે 15 મિનિટની ફ્રિક્વન્સીને બદલે 12 મિનિટે મેટ્રો દોડાવવાનો નિર્ણય કર્યો છે. ગાવસ્કર-બોર્ડર ટ્રોફીની આ ચોથી ટેસ્ટ મેચને લઈને ક્રિકેટપ્રેમીઓમાં ભારે ઉત્સાહ છે ત્યારે દર્શકો મેટ્રો દ્વારા મોટેરા સ્ટેડિયમ સ્ટેશન પહોંચી શકશે.
ગુજરાત મેટ્રો રેલ કોર્પોરેશનના જણાવ્યા અનુસાર, ટેસ્ટ મેચ દરમિયાન સવારે 6થી રાતે 10 વાગ્યા સુધી મેટ્રો સેવાઓ ઉપલબ્ધ રહેશે. મેટ્રો બંને કોરિડોર પર 12 મિનિટની ફ્રિક્વન્સી સાથે દોડશે.
લોકો આ ટેસ્ટ મેચ જોવા માટે મેટ્રો ટ્રેન મારફત નરેન્દ્ર મોદી સ્ટેડિયમમાં મોટી સંખ્યામાં દર્શકો પહોંચે એવી શક્યતાને લઈ આ નિર્ણય લેવાયો છે.
આ મેચના પહેલા દિવસે વડાપ્રધાન નરેન્દ્ર મોદી ઓસ્ટ્રેલિયાના PM એન્થોની અલ્બેનીઝ સાથે હાજર રહેશે.
