ભારત અને ઓસ્ટ્રેલિયા વચ્ચે બોર્ડર-ગાવસ્કર ટ્રોફી ટેસ્ટ સિરીઝની છેલ્લી મેચ 9 માર્ચથી અમદાવાદના મોટેરા ખાતેના નરેન્દ્ર મોદી સ્ટેડિયમમાં રમાનાર છે ત્યારે અંતિમ મેચમાં ભારતના વડાપ્રધાન નરેન્દ્ર મોદી અને ઓસ્ટ્રેલિયાના વડાપ્રધાન એન્થોની અલ્બેનીઝ પણ હાજર રહેવાના હોય આજે સાંજે બંને દેશોના વડાપ્રધાન અમદાવાદ આવી પહોંચશે.
મળતી વિગતો મુજબ આજે સાંજે 4 કલાકે ઓસ્ટ્રેલિયાના વડાપ્રધાન એન્થોની અલ્બેનીઝ એરપોર્ટ પર આવશે ત્યાંથી સીધા તેઓ ગાંધી આશ્રમે જશે, જ્યાં તેઓ ગાંધીજીની પ્રતિમાને પુષ્પાંજલિ અને આશ્રમની મુલાકાત લેશે.
ત્યારબાદ આજે રાત્રે 8 વાગ્યે વડાપ્રધાન નરેન્દ્ર મોદી અમદાવાદ એરપોર્ટ આવશે અને ત્યાંથી સીધા તેઓ ગાંધીનગર રાજભવન ખાતે જશે.
આવતીકાલે ગુરુવારે નવ માર્ચના રોજ અમદાવાદના મોટેરા સ્થિત નરેન્દ્ર મોદી સ્ટેડિયમમાં ભારત અને ઓસ્ટ્રેલિયા વચ્ચે ટેસ્ટ સિરીઝની છેલ્લી મેચમાં ઓસ્ટ્રેલિયાના વડાપ્રધાન અને ભારતના વડાપ્રધાન એક સાથે મેચ નિહાળશે.
બંને દેશના PM મેચમાં કોમેન્ટરી પણ આપે તેવી શકયતા વ્યક્ત થઈ રહી છે.
આવતીકાલે સવારે વડાપ્રધાન નરેન્દ્ર મોદી અને ઓસ્ટ્રેલિયાના વડાપ્રધાન એન્થોની અલ્બેનીઝ 8.30 વાગ્યાની આસપાસ નરેન્દ્ર મોદી સ્ટેડિયમ ખાતે પહોંચશે.
બંને વડાપ્રધાન મેચમાં હાજર રહેશે અને બે કલાક સુધી બંને વડાપ્રધાન મેચ નિહાળશે તેમ જાણવા મળ્યું છે.
