કર્ણાટક ચૂંટણીના પરિણામોની જાહેરાત બાદથી મુખ્યમંત્રીના ચહેરાને લઈને અટકળો લગાવવામાં આવી રહી છે. પાર્ટીમાંથી સૌથી વધુ પ્રતિસ્પર્ધી ચહેરાઓ માત્ર બે જ છે, જેમાં પૂર્વ મુખ્યમંત્રી સિદ્ધારમૈયા અને પ્રદેશ કોંગ્રેસ અધ્યક્ષ ડીકે શિવકુમારનો સમાવેશ થાય છે. બંને નેતાઓ તરફથી કોઈ સ્પષ્ટ નિવેદન બહાર આવી રહ્યું નથી. બંનેએ દિલ્હીમાં પડાવ નાખ્યો છે. બંને નેતાઓ મંગળવારે કોંગ્રેસ અધ્યક્ષ મલ્લિકાર્જુન ખડગેને પણ મળ્યા છે.
જો કે સૂત્રોને ટાંકીને મળતા અહેવાલો મુજબ આજે પણ મુખ્યમંત્રીના ચહેરા પર કોઈ નામ ફાઈનલ થયું નથી. સૂત્રોને ટાંકીને માહિતી સામે આવી રહી છે કે કર્ણાટકના પૂર્વ મુખ્યમંત્રી સિદ્ધારમૈયાએ ખડગે સાથેની મુલાકાત દરમિયાન કહ્યું છે કે જો અઢી વર્ષ માટે સીએમ પદની વહેંચણી કરવામાં આવી રહી છે, તો પહેલા તેમને સીએમ બનાવવામાં આવે. જેથી કરીને તે જનતાને આપેલા વચનો પૂરા કરી શકે.
તેમણે ખડગેને કહ્યું કે આ તેમની છેલ્લી ચૂંટણી છે અને એ પણ કહ્યું કે પાર્ટીના ઘણા ધારાસભ્યો ઈચ્છે છે કે તેમને સીએમ બનાવવામાં આવે. તેમણે ખડગેને કહ્યું કે ધારાસભ્યોના અભિપ્રાયનું સન્માન કરવું જોઈએ. આ દરમિયાન, અહિંડા (દલિત, લઘુમતી, પછાત જાતિ) સમુદાયને ટાંકીને તેમણે કહ્યું છે કે તેમનો ચહેરો જોયા પછી જ અહિંડા સમુદાયે કોંગ્રેસને મત આપ્યો અને ઐતિહાસિક જીત મેળવી.
સોનિયા ગાંધીને આપેલું વચન પૂરું કર્યું
ખડગે સાથેની મુલાકાત દરમિયાન ડીકે શિવકુમારે કહ્યું છે કે કર્ણાટક પ્રદેશ કોંગ્રેસ કમિટીએ સીએમ પદ નક્કી કરવાનું ચાલુ રાખવું જોઈએ. ડીકેએ આ દરમિયાન એમ પણ કહ્યું હતું કે તેમણે સોનિયા ગાંધીને વચન આપ્યું હતું કે તેઓ કોંગ્રેસને જીતાડશે અને તેમણે તેમનું વચન પાળ્યું છે. ખડગેએ આ મામલે સોનિયા ગાંધી સાથે વાત કરવાનું કહ્યું છે.
આવતીકાલે મુખ્યમંત્રીની જાહેરાત થઈ શકે છે
આ બંને નેતાઓની બેઠક બાદ હજુ સુધી સીએમના ચહેરા પર નિર્ણય લેવામાં આવ્યો નથી. કહેવામાં આવી રહ્યું છે કે સીએમ ચહેરા પર અંતિમ નિર્ણય પાર્ટી અધ્યક્ષ મલ્લિકાર્જુન ખડગે લેશે. પરંતુ આ દરમિયાન તેઓ રાહુલ ગાંધી અને સોનિયા ગાંધીની સલાહ લેશે. એવું કહેવામાં આવી રહ્યું છે કે આવતીકાલે સીએમ ચહેરાની જાહેરાત થઈ શકે છે. આ જાહેરાત બેંગ્લોર અથવા દિલ્હીમાં કરવામાં આવશે.
