પાકિસ્તાનના પૂર્વ વડાપ્રધાન ઇમરાન ખાન લાહોર હાઈકોર્ટ જવા રવાના થઈ ગયા છે. લાહોર હાઈકોર્ટે શુક્રવારે પાકિસ્તાન તહરીક-એ-ઈન્સાફ (PTI)ના અધ્યક્ષ ઇમરાન ખાનને સાંજે 5.30 વાગ્યા સુધીમાં હાજર થવાનો નિર્દેશ આપ્યો છે. ઇમરાન ખાનની અપીલની સુનાવણી માટે લાહોર હાઈકોર્ટમાં બે સભ્યોની બેંચની રચના કરવામાં આવી છે. મીડિયા રિપોર્ટ્સ અનુસાર, લાહોરમાં ખાનની કાનૂની ટીમ સાથે સંકળાયેલા અઝહર સિદ્દીકીએ કહ્યું કે, ઇમરાન ખાન લાહોર અને રાજધાની ઇસ્લામાબાદમાં તેમની વિરુદ્ધ દાખલ થયેલા કેસ સામે રક્ષણાત્મક જામીન ઈચ્છે છે. અન્ય શહેરોમાં દાખલ થયેલા કેસોમાં હાઈકોર્ટમાંથી જામીન મેળવવા એ નિયમિત બાબત છે.
બીજી તરફ પાકિસ્તાનના પૂર્વ વડાપ્રધાન ઇમરાન ખાનને શુક્રવારે ઇસ્લામાબાદ હાઈકોર્ટમાંથી મોટી રાહત મળી છે. હાઈકોર્ટે તેના બિનજામીનપાત્ર ધરપકડ વોરંટને સસ્પેન્ડ કરી દીધું છે. આ પહેલા કોર્ટે ઇમરાનની ધરપકડ કરીને 18 માર્ચ સુધીમાં કોર્ટમાં હાજર થવાનો આદેશ આપ્યો હતો. પૂર્વ પીએમે ધરપકડ વોરંટને રદ્દ કરવા માટે અરજી કરી હતી. તેમની સામે આ ધરપકડ વોરંટ તોશખાના કેસમાં જારી કરવામાં આવ્યું હતું. તેમની પાર્ટીના નેતા ફવાદ ચૌધરીએ જણાવ્યું કે ઇમરાન લાહોર હાઈકોર્ટ જઈ રહ્યા છે. તે ત્યાં જણાવશે કે તે આવતીકાલે ઇસ્લામાબાદ કોર્ટમાં હાજર થશે. આ દરમિયાન જજ ઇકબાલે એવી પણ ટીપ્પણી કરી હતી કે ઇમરાન ખાને કોર્ટ પાસે કોઈ પણ પ્રકારનો પક્ષ લેતા પહેલા બિનશરતી આત્મસમર્પણ કરવું જોઈએ. બીજી તરફ રાણા સનાઉલ્લાહનું કહેવું છે કે સરકાર ઇમરાનની ધરપકડ અંગે યોગ્ય કાયદાકીય પ્રક્રિયાને અનુસરશે.
ખરેખર, ઇમરાનને 13 માર્ચે કોર્ટમાં હાજર થવાનું હતું, પરંતુ તે ગયા નહોતા. જોકે, જ્યારે પોલીસ ઇમરાનની ધરપકડ કરવા લાહોરના જમાન પાર્ક પહોંચી ત્યારે ત્યાં હંગામો મચી ગયો હતો. ઇમરાનના સમર્થકો તેમના ઘરની બહાર મોટી સંખ્યામાં એકઠા થયા હતા. સમર્થકોની સામે પોલીસ અને સેનાના જવાનોને પણ પીછેહઠ કરવી પડી હતી. દરમિયાન ઇમરાને ઇસ્લામાબાદ હાઈકોર્ટનો સંપર્ક કર્યો હતો, જેણે ગઈકાલે સવારે 10 વાગ્યા સુધી રાહત આપી હતી.
દરમિયાન, જ્યારે વોરંટ સસ્પેન્ડ કરવામાં આવ્યું ન હતું, ત્યારે ઇમરાન ખાને કહ્યું હતું કે તેઓ પાકિસ્તાન માટે બલિદાન આપવા તૈયાર છે. તેમના નિવેદન પરથી માનવામાં આવતું હતું કે તે કોર્ટ સમક્ષ આત્મસમર્પણ કરી શકે છે, જેથી હિંસાની સ્થિતિ ટાળી શકાય. આ બધાની વચ્ચે ઇમરાન ખાન લાહોર હાઈકોર્ટ જવા રવાના થઈ ગયા છે.
