રાજ્ય સરકારના ફિક્સ પગારદાર કર્મચારીઓનું આર્થિક શોષણ બંધ કરીને તેમના પગાર માટે ઘટતું કરવાની આકરી ટિપ્પણી કરતા સુપ્રીમ કોર્ટના ચીફ જસ્ટિસ ટી.એસ.ઠાકુરે રાજય સરકારનો ઉધડો લેતા કહ્યું કે, જો સરકાર તેની ફરજ બજાવવામાં નિષ્ફળ જશે તો સુપ્રીમ કોર્ટે આદેશ કરવો પડશે અને આ આદેશથી ગુજરાત સરકાર નાદાર થઈ જશે.
રાજ્યના સાડા ત્રણ લાખથી વધુ ફિક્સ પગારદાર કર્મચારીઓનું શોષણ બંધ કરીને ફુલ પગાર આપવા ગુજરાત હાઈકોર્ટના આદેશ સામે ગુજરાત સરકારે સુપ્રીમમાં અપીલ કરી છે. આ અપીલની સુનાવણી મંગળવારે મુખ્ય ન્યાયમૂર્તિ ટી.એસ.ઠાકુરની બેન્ચ સમક્ષ હાથ ધરવામાં આવી હતી. ફિક્સ પગારદાર કર્મચારી સૂત્રોએ જણાવ્યું કે, સુનાવણી દરમિયાન ગુજરાત સરકાર વતી હાજર રહેલાં સરકારી વકીલે રાજ્ય સરકાર ઉપર આર્થિક બોજાનું કારણ આગળ ધરી જણાવ્યું કે, ફિક્સ પગારદારોને ફુલ પગાર આપવામાં આવે તો રાજ્યની તિજોરી ઉપર આશરે . 8 હજાર કરોડનો બોજો પડશે. વળી, રાજ્ય સરકારે ફિક્સ પગારની નીતિમાં કેટલાક ફેરફારો અંગે વિચારણા હાથ ધરી છે અને આ દિશામાં કાર્યવાહી ચાલી રહી છે. ચીફ જસ્ટિસે તેમના અવલોકનમાં સરકાર યુવા કર્મચારીઓનું આર્થિક શોષણ કરી શકે નહીં ત્યારે સરકારી વકીલે વળતી દલીલ કરતા જણાવ્યું કે, ફિક્સ પગારદારો જ્યારે સરકારી નોકરી સ્વીકારે છે ત્યારે તેઓ આ બાબતથી પૂરી રીતે વાકેફ હોય છે.
જો કે, સરકારી વકીલને આ દલીલ ભારે પડી હતી અને ચીફ જસ્ટિસે વકીલને ઝાટકતા કહ્યું કે, આજે દેશમાં બેરોજગારોની સંખ્યા એટલી મોટી છે કે, જો સરકાર સામેથી પૈસા લઈને નોકરી આપે તો પણ બેરોજગાર યુવાનો સરકારમાં નાણાં ભરીને નોકરી સ્વીકારવા તૈયાર થઈ જશે. જો કે, અદાલતે નોંધ્યું કે, ફિક્સ પગારદારો પાસેથી સરકાર બાંયધરી લખાવે છે તેથી તેમની દલીલ ટકી શકે તેમ નથી. દરમિયાન ચીફ જસ્ટિસે ગુજરાત અને રાજસ્થાનની ફિક્સ પગારનો કેસ ક્લબ કરીને એક સાથે ચલાવવાનો આદેશ કર્યો હોવાનું જણાવતા સૂત્રોએ ઉમેર્યું કે, આગામી સુનાવણી કોર્ટ નં-10માં જસ્ટિસ બોબડે સમક્ષ હાથ ધરાશે. હવે પછીની સુનાવણી ક્રિસમસ વેકેશન પછી જાન્યુઆરીમાં હાથ ધરવામાં આવે તેવી શક્યતા સૂત્રોએ વ્યક્ત કરી છે.
