દેખાડા અને બેજવાબદાર ખર્ચ ઘટાડવા સમાજનું મજબૂત પગલું
અમરેલી જિલ્લામાં સમાજ જીવનમાં ઝડપી પરિવર્તન આવી રહ્યા છે. ટેકનોલોજી, શિક્ષણ અને આધુનિક વિચારોના કારણે અનેક જ્ઞાતિઓ પોતાના જૂના રિવાજોમાં જરૂરી સુધારો કરી રહી છે. ખાસ કરીને ખર્ચાળ અને દેખાવ આધારિત કુરિવાજોને દૂર કરીને સરળતા, સમાનતા અને વ્યવહારિકતા તરફ સમાજ આગળ વધી રહ્યો છે. આ પરિવર્તનની સફરમાં નાઘેરા આહિર સમાજે એક નવું અને ઐતિહાસિક પગલું ભરી સમગ્ર સમાજને સકારાત્મક સંદેશ આપ્યો છે.
સગાઈ–લગ્નના ખર્ચ ઘટાડવા સમાજની અગત્યની બેઠક
રાજુલાની આહીર સમાજની વાડી ખાતે યોજાયેલી બેઠકમાં સમાજના આગેવાનો, નારાયણી સેનાના પ્રતિનિધિઓ તથા મોટી સંખ્યામાં જ્ઞાતિજન હાજર રહ્યા હતા. બેઠકનું મુખ્ય ધ્યાન આર્થિક રીતે નબળા વર્ગને સૌથી વધુ અસર કરતા લગ્ન ખર્ચ પર રાખવામાં આવ્યું હતું. ઘનશ્યામભાઈ લાખણોત્રાએ જણાવ્યું કે છેલ્લા ઘણા વર્ષોથી અનાવશ્યક ઘરેણાં અને ભેટના કારણે પરિવારો પર ભારે આર્થિક બોજ પડતો હતો, જેને ઘટાડવા પગલાં લેવાની જરૂરિયાત હતી. આ ચર્ચા દરમિયાન અનેક પરિવારોએ પોતાના કડવા અનુભવ પણ શેર કર્યા હતા.
ઘરેણાંના અસમાન રિવાજથી સર્જાતા તણાવને અંત
સમાજમાં લાંબા સમયથી સગાઈ અને લગ્ન પ્રસંગે સોનાં-ચાંદીના ભારે ભેટની પ્રથા હતી. અનેક પરિવારો દેણું લઈને પણ આ રિવાજો નિભાવવા મજબૂર બનતા હતા. ખાસ કરીને એકથી વધુ દીકરીઓ ધરાવતા પરિવારોમાં ઘરેણાંના અસમાન વિતરણને લઈને મનદુઃખ અને મતભેદ ઉભા થવાના બનાવો પણ સામે આવતાં હતા. ઉદાહરણરૂપે, એક દીકરીને 30 લાખથી વધુના ઘરેણાં અને બીજીને અત્યંત ઓછા મૂલ્યના ઘરેણાં મળતા, પરિવારમાં અસંતુલન અને દબાણ સર્જાતું હતું.
હવે સગાઈ–લગ્ન માટે સોનાં–ચાંદીની મર્યાદા નક્કી
આ સમસ્યાઓને ધ્યાનમાં રાખીને નાઘેરા આહિર સમાજે સર્વાનુમતે મહત્વપૂર્ણ નિયમાવલી મંજૂર કરી છે. હવે સગાઈ પ્રસંગે 3 થી 5 તોલા સોનું આપવાનું રહેશે. સમગ્ર લગ્નપ્રસંગમાં 5 તોલાથી વધુ સોનું ન આપવાનું નક્કી કરવામાં આવ્યું છે. સાથે જ ચાંદીની મર્યાદા 200 ગ્રામ રાખવામાં આવી છે. આ મર્યાદાઓનો અમલ સમાજમાં પહેલીવાર થવાનો છે, જેનાથી આર્થિક સમાનતા અને પરિવારોમાં સંતુલન જળવાઈ રહેવાની આશા છે.
સમાજમાં સમરસતા અને નબળા વર્ગને મોટી રાહત
સામાજિક આગેવાનોના જણાવ્યા મુજબ આ નવી નિયમાવલી નબળા અને મધ્યમ વર્ગ માટે મોટી રાહતરૂપ થશે. મોંઘવારીના સમયમાં બધા પરિવાર સમાન પ્રમાણમાં ઉજવણી કરી શકે તે માટે આ નિર્ણય અગત્યનો ગણાય છે. દેખાડા અને સ્પર્ધાની હોડ ઘટશે અને પ્રસંગોને સરળ અને સંસ્કારી બનાવવાનો માર્ગ ખુલશે.
આગેવાનોનો વિશ્વાસ: સમાજને વધુ પ્રગતિશીલ દિશામાં લઈ જવાનો પ્રયાસ
બેઠકમાં રાજકીય, સામાજિક અને શૈક્ષણિક કમિટીના આગેવાનો પણ હાજર રહ્યા હતા. સૌએ મળીને આ નિર્ણયને સમાજ માટે મજબૂત પગલું ગણાવ્યું અને ભાવિ સમયમાં વધુ કુરિવાજોમાં સુધારો કરીને સમાજને આધુનિક, વ્યવસ્થિત અને સમાનતાની દિશામાં આગળ ધપાવવાનો સંકલ્પ વ્યક્ત કર્યો.
