ખેતરોમાં પાક બરબાદ થયા પછી આંબા ગામના ઉદ્યોગપતિઓ માનવતાથી આગળ આવ્યા
Amba village farmers help: ગુજરાતના અનેક વિસ્તારોમાં અચાનક પડેલા માવઠાના મારથી ખેડૂતો મુશ્કેલીમાં મુકાયા છે. ખાસ કરીને લીલીયા તાલુકાના આંબા ગામમાં તો કુદરતે એટલો કહેર વરસાવ્યો કે ખેતરોમાં ઊભેલો પાક સંપૂર્ણ રીતે બરબાદ થઈ ગયો છે. ભારે વરસાદ અને અતિભારે માવઠાને કારણે ખેડૂતોના પરિશ્રમનો સર્વનાશ થયો છે. ખેતરોમાં પાણી ભરાઈ જતા પાક નાશ પામ્યો, અને ઘણા નાના ખેડૂતો તથા ખેતમજૂરો માટે રોજી-રોટીનો પ્રશ્ન ઊભો થયો છે.
આ મુશ્કેલ પરિસ્થિતિમાં આંબા ગામના બે ઉદ્યોગપતિઓએ માનવતાની અનોખી મિસાલ સ્થાપી છે. ગામના પ્રસિદ્ધ ઉદ્યોગપતિ સુરેશભાઈ રૂપારેલીયાએ પોતાના ખેતરમાં વર્ષોથી કાર્યરત મજૂર પરિવારોને મદદરૂપ થવા ₹1,00,000 ની રોકડ સહાય આપી છે. તેમણે જણાવ્યું કે, “આ મજૂરો વર્ષોથી અમારા ખેતરની સંભાળ રાખે છે, પાક બગડ્યો એટલે તેમના ઘરનો ચુલો ઠંડો પડી ગયો. આવા સમયે મદદ કરવી એ આપણી ફરજ છે.”
તે જ રીતે ગામના બીજા ઉદ્યોગપતિ ચંદુભાઈ બાવચંદભાઈ રૂપારેલીયાએ પણ માનવતાની ઉદાહરણરૂપ ભાવના સાથે ₹1,11,000 ની સહાય આપી છે. બંને ઉદ્યોગપતિઓ દ્વારા આપવામાં આવેલી કુલ ₹2,22,000 ની સહાયથી અનેક મજૂર પરિવારોને તાત્કાલિક રાહત મળી છે અને તેમની આંખોમાં આશાનું કિરણ ઝળહળ્યું છે.
ગામના લોકોનું કહેવું છે કે આંબા ગામના ઉદ્યોગપતિઓ ફક્ત શહેરોમાં ઉદ્યોગ ચલાવતા નથી, પરંતુ પોતાના વતન સાથેનો નાતો જીવંત રાખે છે. દરેક સંકટના સમયે તેઓ મદદરૂપ થાય છે. આ ઘટનાએ ગામમાં એકતા અને ભાઈચારો વધાર્યો છે તથા અન્ય સક્ષમ વ્યક્તિઓને પણ પ્રેરણા આપી છે.
ગામના સરપંચે જણાવ્યું કે, “આવી માનવતાભરી પ્રવૃત્તિઓ ગામના લોકોમાં વિશ્વાસ અને એકતા વધારે છે. આવું સહકાર જ ગામના સાચા વિકાસનો આધાર છે.” આ આખી ઘટના એ સાબિત કરે છે કે આજના સમયમાં પણ માનવતા જીવંત છે. જ્યારે કોઈ દુઃખમાં હોય ત્યારે સક્ષમ વ્યક્તિઓ સહાય માટે આગળ આવે – એ જ સાચા સંસ્કાર છે. આંબા ગામના ઉદ્યોગપતિઓએ બતાવ્યું છે કે સંપત્તિનો સાચો અર્થ ફક્ત પોતાના સુખમાં નથી, પરંતુ સમાજના દુઃખમાં ભાગીદાર થવામાં છે.
