વડા પ્રધાન નરેન્દ્ર મોદીએ શુક્રવારે દિલ્હીમાં અગાઉના અહોમ સામ્રાજ્યના જનરલ અને બહાદુર યોદ્ધા લચિત બોરફૂકનની 400મી જન્મજયંતિ નિમિત્તે એક કાર્યક્રમને સંબોધિત કર્યો હતો. વિજ્ઞાન ભવન ખાતે આયોજિત લચિત બોરફૂકનની 400મી જન્મજયંતિના સમાપન સમારોહમાં પીએમ મોદીએ કહ્યું કે ભારતનો ઈતિહાસ યોદ્ધાઓ અને જીતનો ઈતિહાસ છે.
વીર લચિતને તેમની 400મી જન્મજયંતિ પર યાદ કરતાં પીએમ નરેન્દ્ર મોદીએ કહ્યું, “આજે ભારત તેની સંસ્કૃતિના ઐતિહાસિક નાયકો અને નાયિકાઓને ગર્વથી યાદ કરી રહ્યું છે. લચિત જેવા માતા ભારતીના અમર બાળકો આપણી સતત પ્રેરણા છે. આ શુભ અવસર પર હું લચિતને નમન કરું છું.
પીએમ મોદીએ વધુમાં કહ્યું કે લચિત જેવી હિંમત અને નિર્ભયતા આસામની ઓળખ છે. તેમણે કહ્યું, “જો કોઈ આપણને તલવારના સહારે ઝુકાવવા માંગે છે, આપણી શાશ્વત ઓળખ બદલવા માંગે છે, તો આપણે પણ તેનો જવાબ કેવી રીતે આપવો તે જાણીએ છીએ. પૂર્વોત્તરની ધરતી આની સાક્ષી રહી છે. વીર લચિત દ્વારા બતાવવામાં આવેલી બહાદુરી અને હિંમત એ માતૃભૂમિ પ્રત્યેના અપાર પ્રેમની પરાકાષ્ઠા હતી. લચિત જેવી હિંમત અને નિર્ભયતા આસામની ઓળખ છે.
પીએમ મોદીએ ભારતના ઈતિહાસનો ઉલ્લેખ કર્યો. તેમણે કહ્યું, “ભારતનો ઈતિહાસ માત્ર ગુલામીનો ઈતિહાસ નથી, તે યોદ્ધાઓનો ઈતિહાસ છે. ભારતનો ઇતિહાસ વિજયનો, બહાદુરીનો, બલિદાનનો, મહાન પરંપરાનો છે. આઝાદી પછી પણ આપણને એ જ ઈતિહાસ શીખવવામાં આવ્યો જે ગુલામીના સમયમાં ઘડવામાં આવ્યો હતો. આઝાદી પછી ગુલામીનો એજન્ડા બદલવાની જરૂર હતી પણ એવું થયું નહીં. તમને જણાવી દઈએ કે આસામમાં 24 નવેમ્બરે લચિત દિવસ મનાવવામાં આવે છે.
પીએમ મોદીએ પરિવારવાદ પર પણ નિશાન સાધ્યું. તેમણે કહ્યું, “લચિતનું જીવન આપણને વ્યક્તિગત હિતોને બદલે દેશના હિતને પ્રાધાન્ય આપવાની પ્રેરણા આપે છે. તેમનું જીવન આપણને પરિવારવાદથી ઉપર ઊઠીને દેશ વિશે વિચારવાની પ્રેરણા આપે છે. તેમણે કહ્યું હતું કે દેશથી મોટો કોઈ સંબંધ નથી. આજનો ભારત ‘નેશન ફર્સ્ટ’ના આદર્શ સાથે આગળ વધી રહ્યો છે. આપણી જવાબદારી છે કે આપણે ઈતિહાસની દ્રષ્ટિને માત્ર થોડા દાયકાઓ સુધી સીમિત ન કરીએ.
