ભારતીય મહિલા ક્રિકેટ ટીમને પ્રોત્સાહન! સુરતના સાંસદ ગોવિંદ ધોળકિયાએ કરી ‘ડાયમંડ અને સોલાર’ ભેટની જાહેરાત.
સુરતના પ્રખ્યાત ઉદ્યોગપતિ, રાજ્યસભાના સાંસદ અને “ડાયમંડ કિંગ” તરીકે ઓળખાતા ગોવિંદ ધોળકિયાએ ભારતીય મહિલા ક્રિકેટ ટીમ માટે અનોખી જાહેરાત કરી છે. ધોળકિયાએ જણાવ્યું છે કે જો ભારતીય મહિલા ક્રિકેટ ટીમ આવનારા વર્લ્ડ કપના ફાઇનલમાં વિજય મેળવે છે, તો ટીમની તમામ ખેલાડીઓને નેચરલ ડાયમંડ જ્વેલરી અને સોલાર રૂફટોપ પેનલ ભેટરૂપે આપવામાં આવશે.
ધોળકિયાએ આ અંગે BCCIના ઉપપ્રમુખ રાજીવ શુક્લાને પત્ર લખીને પોતાની પ્રતિબદ્ધતા વ્યક્ત કરી છે. પત્રમાં તેમણે જણાવ્યું છે કે મહિલા ક્રિકેટ ટીમે છેલ્લા કેટલાક વર્ષોમાં અદ્ભુત પ્રદર્શન કરીને દેશનું ગૌરવ વધાર્યું છે. હવે સમય છે કે ઉદ્યોગજગત પણ મહિલા ખેલાડીઓને સમાન સન્માન આપે અને તેમના મનોબળને નવી ઉંચાઈઓએ પહોંચાડે.
સુરતના ધોળકિયા સાથે ઉત્તર પ્રદેશના એક બીજા ઉદ્યોગપતિએ પણ મહિલા ટીમ માટે પ્રોત્સાહક પુરસ્કારની જાહેરાત કરી છે. બંને ઉદ્યોગકારોએ સંયુક્ત રીતે આ પહેલ કરીને મહિલાઓને રમતગમત ક્ષેત્રે વધુ પ્રોત્સાહન આપવાનો સંદેશ આપ્યો છે.
ગોવિંદ ધોળકિયાએ જણાવ્યું કે ભારતની મહિલા ક્રિકેટ ટીમ સતત આંતરરાષ્ટ્રીય સ્તરે પ્રતિભા દર્શાવી રહી છે અને અનેક વખત કઠિન પરિસ્થિતિઓમાં પણ દેશ માટે લડી છે. “અમારા ઉદ્યોગકારો તરીકે, આપણે ખેલાડીઓને માત્ર તાળીઓથી નહિ, પરંતુ તાત્કાલિક પ્રોત્સાહનથી સન્માન આપવું જોઈએ,” એમ તેમણે જણાવ્યું.
ધોળકિયાના કહેવા મુજબ, “ડાયમંડ જ્વેલરી એ ભારતીય સ્ત્રીની શક્તિ, સૌંદર્ય અને પ્રતિભાનું પ્રતિક છે, જ્યારે સોલાર પેનલ એ નવી ઉર્જાનું પ્રતિક છે — જે આ ખેલાડીઓ દેશ માટે લાવે છે.” તેમણે ઉમેર્યું કે આ ગિફ્ટ માત્ર પુરસ્કાર નથી, પરંતુ મહિલા સશક્તિકરણ તરફ એક નાનકડું પગલું છે.
આ જાહેરાત બાદ ક્રિકેટ જગતમાં અને ઉદ્યોગિક વર્તુળોમાં પ્રશંસાનો માહોલ છવાયો છે. સુરતના ઉદ્યોગજગતે પણ ધોળકિયાની આ પહેલને વધાવી હતી, કારણ કે તે માત્ર રમતગમતને પ્રોત્સાહન આપતું નથી, પરંતુ સમાજમાં મહિલાઓની સિદ્ધિઓને માન્યતા આપવાનું એક પ્રેરણાદાયી ઉદાહરણ પણ છે.
ધોળકિયાએ અંતે આશા વ્યક્ત કરી કે ભારતીય મહિલા ક્રિકેટ ટીમ વર્લ્ડ કપના ફાઇનલમાં વિજય મેળવે અને ભારતનું તિરંગું વૈશ્વિક મંચ પર લહેરાવે.
