ભાજપના પૂર્વ ધારાસભ્ય જયંતી ભાનુશાળી હત્યાના કથિત આરોપી અને પૂર્વ ધારાસભ્ય છબીલ પટેલની એક ઓડિયો ક્લિપ ઘણી વાયરલ થઇ રહી છે. આ ક્લિપમાં છબીલ પટેલે પોતે નિર્દોષ છે અને કોઇ કાવતરાનો ભોગ બન્યો છે તેમ કહી રહ્યો છે. તેણે તે પણ કહ્યું છે કે હું વિદેશથી થોડા જ દિવસમાં ભારત પરત આવવાનો છું.
વાયરલ થયેલી ઓડિયો ક્લિપમાં છબીલ પટેલ કહેતો સંભળ્યા છે કે, ‘હું છબીલ પટેલ હાલ હું બિઝનેસ માટે વિદેશ આવેલો છું. મારે કામ માટે અવાર નવાર વિદેશ જવાનું થાય છે. વિદેશ આવ્યા બાદ મને જાણ થઈ કે મારી સામે પોલીસ ફરિયાદ થઈ છે. તો હું મીટિગો પતાવીને તાત્કાલિક ભારત આવીને પોલીસ સ્ટેશને હાજર થઈશ. પોલીસ દ્વારા જે પણ કાર્યવાહી અને પૂછપરછ થશે તેમાં હું સહયોગ આપીશ. હું સાવ નિર્દોષ છું અને કોઈ કાવતરાનો ભોગ બની રહ્યો છું એવું મને લાગે છે. મને ગુજરાત પોલીસ પર પુરો ભરોસો છે. તેઓ સત્ય બહાર લાવશે. હું ભારત આવું ત્યારે મારા પર જીવનું જોખમ લાગતું હોવાથી મને પોલીસ રક્ષણ મળે એવી મારી વિનંતિ છે. છેલ્લી મીટિંગ પુરી કરીને મારા આવવાની તારીખ પણ પહેલેથી જ આપીશ. મારા કામ પુરા થવાની તૈયારીમાં છે.’
જયંતી ભાનુશાળીની હત્યાના આરોપી છબીલ પટેલ હત્યા પહેલા જ વિદેશ ફરાર થઇ ગયો હતો. ત્યારે તેની અને તેના સાગરિતોની ધરપકડ કરવા માટે ભચાઉ કોર્ટમાં કલમ 70 મુજબ રેલવે પોલીસ દ્વારા અરજી કરાઈ હતી.
