ઠાકોર કહે છે કે ભાજપ ગુજરાતમાં વહેલી ચૂંટણી ઈચ્છે તો કોંગ્રેસ તૈયાર છે. ગુજરાત પ્રદેશ કોંગ્રેસ સમિતિના પ્રમુખ જગદીશ ઠાકોરે જણાવ્યું હતું કે, જો ભાજપ ટૂંક સમયમાં રાજ્યમાં વિધાનસભાની ચૂંટણી કરાવવા માંગે છે તો કોંગ્રેસ તેના માટે સંપૂર્ણ રીતે તૈયાર છે. સોમવારે પ્રદેશ કોંગ્રેસની ઉત્તર ઝોનની બેઠકને સંબોધતા તેમણે કહ્યું હતું કે હાર્દિક પટેલના રાજીનામા બાદ અત્યાર સુધી કોંગ્રેસના કોઈ નેતાએ પાર્ટી છોડી નથી. પૂર્વ ધારાસભ્ય ડૉ.અનિલ જોષિયારાના પુત્રના ભાજપમાં પ્રવેશ અંગે તેમણે કહ્યું કે જે કોઈ પણ પક્ષ છોડવા માંગે છે તે જઈ શકે છે. જે જાય છે તેને કોઈ રોકી શકતું નથી..
ઠાકોરના કહેવા મુજબ ગુજરાતમાં ચોમાસા પહેલા પાર્ટીના નેતા રાહુલ ગાંધીની સભાઓનું આયોજન કરવામાં આવી રહ્યું છે. ગુજરાતના પ્રભારી ડૉ.રઘુ શર્મા, વિરોધ પક્ષના નેતા સુખરામ રાઠવા, રાજ્યસભાના સાંસદ શક્તિસિંહ ગોહિલ, પૂર્વ પ્રદેશ પ્રમુખ ભરતસિંહ સોલંકી અને અમિત ચાવડા, વરિષ્ઠ નેતા અર્જુન મોઢવાડિયા સહિત અન્ય નેતાઓ અને કાર્યકરોની હાજરીમાં આયોજિત આ બેઠકમાં રાજ્યની વિધાનસભા ચૂંટણી માટેની રણનીતિ અંગે ચર્ચા કરવામાં આવી હતી. કાર્યકરોને ચૂંટણીની તૈયારીમાં લાગી જવા જણાવ્યું હતું. રાજ્યની વિધાનસભાની ચૂંટણીને ધ્યાનમાં રાખીને છેલ્લા કેટલાક દિવસોથી ઝોન વાઇઝ બેઠકનું આયોજન કરવામાં આવી રહ્યું છે.
સૌરાષ્ટ્ર ઝોનની બેઠક રાજકોટમાં જ્યારે દક્ષિણ ગુજરાત ઝોનની બેઠક સુરતમાં મળી હતી. આ સાથે જ મધ્ય ઝોનની કારોબારી સમિતિની બેઠક વડોદરામાં અને ત્યાર બાદ ઉત્તર ઝોનની કારોબારી સમિતિની બેઠક મહેસાણામાં મળી હતી.
