ગાંધીનગર સેશન્સ કોર્ટે સોમવારે આસારામ વિરુદ્ધ બળાત્કારના કેસમાં પોતાનો ચુકાદો સંભળાવ્યો છે. આસારામને 2013ના રેપ કેસમાં દોષિત ઠેરવવામાં આવ્યા છે. આ સિવાય અન્ય આરોપીઓને નિર્દોષ જાહેર કરવામાં આવ્યા છે. આસારામ સહિત કુલ 7 આરોપીઓ સામે કેસ નોંધવામાં આવ્યો હતો. જેમાં આસારામ સિવાયના તમામ આરોપીઓને જામીન પર મુક્ત કરવામાં આવ્યા હતા. કોર્ટ મંગળવારે સજાની જાહેરાત કરશે.
જોધપુર કોર્ટમાં આસારામની સહી પણ લેવામાં આવી હતી.
ગત ઓગસ્ટ મહિનામાં બળાત્કારના કેસ સંદર્ભે ગાંધીનગર કોર્ટમાં આસારામ સહિતના આરોપીઓના નિવેદન લેવામાં આવ્યા હતા. જેમાં જોધપુર જેલમાં બંધ આસારામ વીડિયો કોન્ફરન્સ દ્વારા ગાંધીનગર સેશન્સ કોર્ટમાં હાજર થયા હતા. કોર્ટ કમિશને જોધપુર કોર્ટમાં જઈને આસારામની સહી પણ લીધી હતી.
આસારામ હાલ જોધપુર જેલમાં બંધ છે
આસારામ હાલમાં જોધપુર જેલમાં બંધ છે કારણ કે તે અન્ય એક બળાત્કારના કેસમાં દોષિત ઠર્યો છે. ગાંધીનગર કોર્ટમાં ચાલી રહેલા કેસમાં આસારામને વીડિયો કોન્ફરન્સિંગ દ્વારા રજૂ કરવામાં આવ્યા હતા. આસારામ બળાત્કારના કેસમાં આઠ વર્ષથી જેલમાં છે. થોડા સમય પહેલા તેમના વતી જામીન પણ માંગવામાં આવ્યા હતા. પરંતુ, કોર્ટે જામીન અરજી ફગાવી દીધી હતી.
શું હતો આ સમગ્ર મામલો
2001માં સુરતની બે મહિલાઓએ આસારામ પર બળાત્કારનો આરોપ લગાવ્યો હતો. આસારામની સાથે તેમના પુત્ર નારાયણ સાંઈ પર પણ બળાત્કારનો આરોપ છે. આ કેસ 6 ઓક્ટોબર, 2013ના રોજ નોંધવામાં આવ્યો હતો. જ્યારે આ ઘટના વર્ષ 2001માં બની હતી. સરકાર તરફથી 55 સાક્ષીઓની તપાસ કરવામાં આવી હતી. તમામ સાક્ષીઓના નિવેદનમાં વિરોધાભાસ જોવા મળ્યો હતો. આ ઘટનામાં કુલ 8 આરોપીઓ સામે ગુનો નોંધવામાં આવ્યો હતો અને તેમાંથી એકને સાક્ષી બનાવવામાં આવ્યો હતો. આ સિવાય સાત આરોપીઓ સામે ચાર્જશીટ દાખલ કરવામાં આવી હતી.
