રોહિત શર્માની આગેવાનીમાં ભારતીય ટીમે ઓસ્ટ્રેલિયા સામેની ચાર ટેસ્ટ મેચોની શ્રેણી 2-1થી જીતી હતી. ટેસ્ટ બાદ ભારત અને ઓસ્ટ્રેલિયાની ટીમો શુક્રવાર (17 માર્ચ)થી શરૂ થનારી ત્રણ મેચની વનડે શ્રેણીમાં ટકરાશે. નિયમિત કેપ્ટન રોહિત પ્રથમ વનડેમાં નહીં રમે. પ્રથમ મેચ મુંબઈના વાનખેડે સ્ટેડિયમમાં રમાશે.
જ્યારે બીસીસીઆઈએ શ્રેણી માટે ટીમની જાહેરાત કરી ત્યારે એવું કહેવામાં આવ્યું હતું કે રોહિત પારિવારિક કારણોસર મુંબઈ વનડે માટે ઉપલબ્ધ રહેશે નહીં. જો કે હવે એ વાત સામે આવી છે કે આ મેચમાં રોહિત શા માટે મેદાનમાં નહીં ઉતરે? વાસ્તવમાં, રોહિતે તેની પત્ની રિતિકા સજદેહના ભાઈ કુણાલ સજદેહના લગ્નમાં હાજરી આપવાના કારણે પ્રથમ વનડેમાં નહીં રમવાનો નિર્ણય લીધો છે. કુણાલ મેકઅપ આર્ટિસ્ટ અનીશા શાહ સાથે લગ્ન કરી રહ્યો છે.
હાર્દિક પંડ્યા કમાન સંભાળશે
રોહિતની ગેરહાજરીમાં સ્ટાર ઓલરાઉન્ડર હાર્દિક પંડ્યા ઓસ્ટ્રેલિયા સામેની પ્રથમ વનડેમાં કમાન સંભાળશે. રોહિત બીજી ODI માટે ભારતીય ટીમ સાથે જોડાશે, જે 19 માર્ચે વિશાખાપટ્ટનમના મેદાન પર રમાશે. શ્રેણીની ત્રીજી અને છેલ્લી મેચ 22 માર્ચે ચેન્નાઈના એમએ ચિદમ્બરમ સ્ટેડિયમમાં રમાશે.
