બીલીમોરા–સુરત સેક્શન બનશે ભારતની પહેલી હાઇ-સ્પીડ ટ્રેન સેવા
દેશના પ્રથમ હાઇ-સ્પીડ રેલ પ્રોજેક્ટ — મુંબઈથી અમદાવાદ બુલેટ ટ્રેન — અંગે એક મહત્વપૂર્ણ અપડેટ સામે આવ્યું છે. વડાપ્રધાન નરેન્દ્ર મોદી 15 નવેમ્બરે ગુજરાત પ્રવાસે આવી રહ્યા છે અને તેઓ સુરતમાં બાંધકામ હેઠળના બુલેટ ટ્રેન સ્ટેશનની મુલાકાત લઈને સમગ્ર પ્રોજેક્ટની પ્રગતિની સમીક્ષા કરશે. સરકાર આ પ્રોજેક્ટને સમયસર શરૂ કરવા પ્રતિબદ્ધ છે અને તેથી જ NHSRCL દ્વારા તમામ કામગીરી ઝડપી ગતિએ કરવામાં આવી રહી છે.
દેશના મોટા શહેરોને જોડતો 508 કિલોમીટરનો કોરિડોર
આ હાઇ-સ્પીડ રૂટ સાબરમતી, અમદાવાદ, આણંદ, વડોદરા, ભરૂચ, સુરત, બીલીમોરા, વાપી, બોઈસર, વિરાર, થાણે અને મુંબઈને જોડશે. સમગ્ર પ્રોજેક્ટનો 85 ટકા ભાગ વાયડક્ટ પર આધારિત છે, જ્યાં આંતરરાષ્ટ્રીય ધોરણો અનુસાર ઇન્જિનિયરિંગ ટેકનિકોનો ઉપયોગ થઈ રહ્યો છે. ગુજરાત, દાદરા – નગર હવેલી અને મહારાષ્ટ્રમાંથી પસાર થતો આ કોરિડોર દેશના પરિવહન ક્ષેત્રમાં મોટો ફેરફાર લાવવા જઈ રહ્યો છે.
2027માં પ્રથમ સ્ટાર્ટ, 2029માં પ્રોજેક્ટ પૂર્ણ
રેલવે મંત્રી અશ્વિની વૈષ્ણવના જણાવ્યા અનુસાર પ્રથમ હાઇ-સ્પીડ ટ્રેન સેવા 2027માં સુરત અને બીલીમોરા વચ્ચે દોડશે. સંપૂર્ણ પ્રોજેક્ટ 2029માં પૂર્ણ થશે. દિલ્હીની જેમ અહીં પણ ટ્રેન આવવાનો સમય ખૂબ ઓછો રહેશે — શરૂઆતમાં દર 30 મિનિટે, બાદમાં દર 20 મિનિટે અને અંતે માત્ર 10 મિનિટના અંતરે ટ્રેનો દોડશે. મુંબઈથી અમદાવાદ સુધીની મુસાફરી માત્ર 2 કલાક અને 7 મિનિટમાં પૂર્ણ થઈ જશે, જે ભારતની મુસાફરી વ્યવસ્થાને નવી દિશા આપશે.
સ્ટેશનોની પ્રગતિ: બીલીમોરા ખાતે કામ ઝડપથી આગળ
બીલીમોરા બુલેટ ટ્રેન સ્ટેશન રાષ્ટ્રીય હાઇવે, રેલવે સ્ટેશન અને બસ ડેપોથી નજીક સ્થિત છે. અહીં RC ટ્રેક બેડનું બાંધકામ પૂર્ણ થઈ ગયું છે અને રેલ લેઇંગ કાર દ્વારા ટ્રેક સ્થાપિત કરવાની પ્રક્રિયા તેજીથી ચાલી રહી છે. ટ્રેન 320 કિલોમીટર પ્રતિ કલાકની ઝડપે દોડશે, જેના માટે વિશેષ ટેકનિક અને મજબૂત સ્ટ્રકચરનો ઉપયોગ થઈ રહ્યો છે.
રૂટ પર 17 નદી પુલ, 5 PSC પુલ અને 10 સ્ટીલ પુલ તૈયાર થઈ ગયા છે. 216 કિલોમીટર ભાગ પર નોઇઝ બેરિયર લગાવવામાં આવ્યા છે અને 217 કિલોમીટરના RC ટ્રેક બેડનું કામ પૂર્ણ થઈ ચૂક્યું છે. વધુમાં, 2300થી વધુ OHE માસ્ટ સ્થાપિત થયા છે અને પહાડી ટનલોના ખોદકામનું કામ પણ સતત ચાલી રહ્યું છે.
સુરત–બીલીમોરા રૂટ પર પહેલી ટ્રેન 2027માં
ભારતીય રેલવે દ્વારા જાહેર કરાયેલા તાજેતરના ડેટા મુજબ 508 કિલોમીટર કોરિડોરમાંથી 325 કિલોમીટર વાયડક્ટ અને 400 કિલોમીટર થાંભલાઓ પૂર્ણ થઈ ગયા છે. લક્ષ્યાંક પ્રમાણે 2027માં સુરત–બીલીમોરા સેક્શન પહેલા ખુલશે અને તેથી સંબંધિત તમામ કામ વધારે ઝડપથી આગળ વધી રહ્યું છે.
