પાકિસ્તાન સુપર લીગ 2023માં બોલરોનો દબદબો અટકવાનું નામ નથી લઈ રહ્યો. રાવલપિંડીના રોડની સપાટ પીચ પર બેટ્સમેનો જ્વલંત ઇનિંગ્સ રમીને મોટો સ્કોર બનાવી રહ્યા છે. શનિવારે તો હદ ત્યારે થઈ ગઈ જ્યારે PSLની એક મેચમાં બંને ટીમોએ મળીને 40 ઓવરમાં 515 રન બનાવ્યા અને આશ્ચર્યજનક રીતે 253 રન બનાવવા છતાં ટાર્ગેટનો પીછો કરવા ઉતરેલી ટીમને હારનો સામનો કરવો પડ્યો. આવું સ્કોરકાર્ડ જોઈને તમે પણ ચોક્કસ ચોંકી જશો. આ મેચમાં PSSના ઈતિહાસની સૌથી ઝડપી સદી બનવાની સાથે બોલરે હેટ્રિક પણ લીધી હતી. તો ચાલો કોઈ પણ વિલંબ કર્યા વિના જાણીએ આ મેચ સાથે જોડાયેલી દરેક માહિતી-
પાકિસ્તાન સુપર લીગની 28મી મેચ શનિવારે ક્વેટા ગ્લેડીયેટર્સ અને મુલતાન સુલ્તાન વચ્ચે રમાઈ હતી. આ મેચમાં પ્રથમ બેટિંગ કરતા મુલતાને નિર્ધારિત 20 ઓવરમાં 3 વિકેટ ગુમાવીને 262 રન બનાવ્યા હતા. પાકિસ્તાનની ધરતી પર કોઈપણ T20 મેચની ઈનિંગમાં આ સર્વોચ્ચ સ્કોર હતો. ઓપનર ઉસ્માન ખાને મુલતાનને આ મોટા સ્કોર સુધી પહોંચાડવામાં મહત્વની ભૂમિકા ભજવી હતી, જેણે 12 ચોગ્ગા અને 9 આકાશી છગ્ગાની મદદથી 279.07ના સ્ટ્રાઈક રેટ સાથે 43 બોલમાં 120 રનની તોફાની ઈનિંગ રમી હતી. ઉસ્માને તેની સદી 36 બોલમાં પૂરી કરી, જે પાકિસ્તાન સુપર લીગમાં કોઈપણ બેટ્સમેન દ્વારા સૌથી ઝડપી છે. આ દરમિયાન કૈસ અહેમદે ક્વેટા ગ્લેડીયેટર્સ માટે ટી20 ક્રિકેટના ઈતિહાસનો સૌથી મોંઘો સ્પેલ બોલ કર્યો, તેણે 4 ઓવરના ક્વોટામાં 2 વિકેટ લીધી અને 77 રન આપ્યા.
ક્વેટા ગ્લેડીયેટર્સની ટીમે લક્ષ્યનો પીછો કરવાની શરૂઆત કરી હતી અને તેની શરૂઆત સારી રહી ન હતી. ગત મેચમાં 145 રનની તોફાની ઇનિંગ રમનાર જેસન રોય માત્ર 6ના અંગત સ્કોર પર આઉટ થયો હતો. આ પછી માર્ટિન ગુપ્ટિલે 14 બોલમાં 37 રન બનાવ્યા અને ઓમૈર યુસુફે 36 બોલમાં 67 રનની ઈનિંગ રમીને ટીમને ન માત્ર સંભાળ્યું પરંતુ તેમને ઝડપથી લક્ષ્ય તરફ લઈ ગયા. આ પછી ઈફ્તિખાર અહેમદે પણ 31 બોલમાં 53 રનની ધમાકેદાર ઈનિંગ રમી હતી, પરંતુ તે ટીમને જીત અપાવી શક્યો નહોતો. ક્વેટાની ટીમ 20 ઓવરમાં 8 વિકેટ ગુમાવીને 253 રન જ બનાવી શકી અને 9 રનથી મેચ હારી ગઈ. તમને જણાવી દઈએ કે, રનના આ ઢગલામાં અબ્બાસ આફ્રિદીએ હેટ્રિક પણ લીધી હતી. આ હાર સાથે ક્વેટા ગ્લેડીયેટર્સની ટીમ ટુર્નામેન્ટમાંથી બહાર થઈ ગઈ હતી.
ટી20 ક્રિકેટના ઈતિહાસમાં આ પહેલીવાર બન્યું છે કે જ્યારે કોઈ ટીમ પીછો કરતી વખતે 250થી વધુ રન બનાવવા છતાં હારી ગઈ હોય. આ પહેલા સીએસએ ટી20 ચેલેન્જમાં બંને ટીમો દ્વારા એક મેચમાં સૌથી વધુ રન બનાવવાનો વર્લ્ડ રેકોર્ડ ટાઇટન્સ અને નાઈટ્સ ટીમના નામે હતો. 2022માં બંને ટીમોએ મળીને કુલ 501 રન બનાવ્યા હતા. પ્રથમ બેટિંગ કરતા ટાઇટન્સે 271 રન બનાવ્યા હતા, જ્યારે નાઈટ્સ ટાર્ગેટનો પીછો કરતી વખતે 20 ઓવરમાં 230 રન બનાવી શકી હતી.
T20 મેચમાં બંને ટીમો દ્વારા કરવામાં આવેલ સર્વોચ્ચ સ્કોર
515 – મુલ્તાન સુલ્તાન વિ ક્વેટા ગ્લેડીયેટર્સ 2023
501 – ટાઇટન્સ વિ નાઈટ્સ 2022
497 – ઓટાગો વિ સેન્ટ્રલ ડિસ્ટ્રિક્ટ્સ 2016
493 – ત્રિનબાગો વિ તલવાહ 2019
489 – ભારત વિ વેસ્ટ ઈન્ડિઝ 2016
