આ સમયે પ્રખ્યાત અભિનેત્રી રાખી સાવંતના જીવનમાં ભૂકંપ આવી ગયો છે. દરેક નવા દિવસ સાથે રાખી સાવંત અને તેના પતિ આદિલ દુર્રાની વિશે એક નવી વાત સામે આવે છે. રાખી સાવંતે આદિલ પર ઘરેલુ હિંસા અને મારપીટના ઘણા ગંભીર આરોપો લગાવ્યા છે, જેના પછી પોલીસે મંગળવારે સવારે આદિલની તેના ઘરેથી ધરપકડ કરી હતી અને ત્યારબાદ દિવસભર પૂછપરછ ચાલી હતી. આદિલને અંધેરી કોર્ટમાં રજૂ કરવામાં આવ્યો હતો, જ્યાં તેને ન્યાયિક કસ્ટડીમાં મોકલી દેવામાં આવ્યો છે. રાખીનો એક નવો વીડિયો સોશિયલ મીડિયા પર વાઈરલ થઈ રહ્યો છે જેમાં તે કહી રહી છે કે તે કૂપર હોસ્પિટલમાં મેડિકલ કરાવશે.
વીડિયોમાં રાખી સાવંત કહી રહી છે કે કૂપર હોસ્પિટલના ડૉક્ટર તપાસ કરશે કે તેના શરીર પર ક્યાં ક્યાં ઈજાના નિશાન છે અને આદિલે તેને કેવી રીતે ટોર્ચર કર્યું. રાખીએ કહ્યું કે તેને આટલી તકલીફ આપવામાં આવી છે, તે ડોક્ટરને બધું કહી દેશે. આ વીડિયો પહેલા રાખીનો બીજો વીડિયો સોશિયલ મીડિયા પર વાયરલ થયો હતો જેમાં કેટલાક લોકો તેને અભિનંદન આપી રહ્યા છે કે તમને ન્યાય મળ્યો છે, તો આ સાંભળીને રાખી કહે છે કે ન્યાય નથી મળ્યો, આદિલના પહેલા લગ્નનું કાર્ડ અને છૂટાછેડાના કાગળો મળી આવ્યા છે. રાખી કહે છે કે તેણે હવે તેના વકીલ સાથે વાત કરવી પડશે.
તમને જણાવી દઈએ કે જ્યારથી બોલિવૂડની ડ્રામા ક્વીન કહેવાતી રાખી સાવંતના લગ્નના સમાચાર સાર્વજનિક થયા છે, ત્યારથી દરરોજ એક નવી કહાની બહાર આવવા લાગે છે. સૌથી પહેલા રાખીએ કહ્યું કે આદિલના પરિવારના સભ્યો સહમત નથી અને તેઓ એકબીજા સાથે વાત પણ નથી કરી રહ્યા. રાખીએ કહ્યું હતું કે તેણે આદિલના કહેવા પર જ પોતાના લગ્ન છુપાવ્યા હતા. આ સમાચારો પછી રાખીએ કહ્યું કે તેના પતિનું કોઈ અન્ય સાથે અફેર છે અને હવે રાખીએ આદિલને હેરાન કરવા બદલ જેલમાં મોકલી દીધો છે. આદિલ અને રાખીના સંબંધોનું સત્ય શું છે તે તો બંનેને ખબર જ હશે, પરંતુ સોશિયલ મીડિયા પર લોકો તેને રાખીનું ડ્રામા ગણાવી રહ્યા છે.
