ભારતીય કેપ્ટન રોહિત શર્માએ અમદાવાદના નરેન્દ્ર મોદી સ્ટેડિયમમાં ઓસ્ટ્રેલિયા સામે બોર્ડર ગાવસ્કર ટ્રોફી 2023ની ચોથી મેચમાં 21 રન બનાવતાની સાથે જ આંતરરાષ્ટ્રીય ક્રિકેટમાં 17000 રન પૂરા કરી લીધા છે. આવું કરનાર તે ભારતનો 7મો અને એકંદરે 28મો ખેલાડી બન્યો છે. રોહિત શર્મા પહેલા સચિન તેંડુલકર, વિરાટ કોહલી, રાહુલ દ્રવિડ, સૌરવ ગાંગુલી, મહેન્દ્ર સિંહ ધોની અને વીરેન્દ્ર સેહવાગ આ યાદીમાં પોતાનું સ્થાન બનાવી ચુક્યા છે. આંતરરાષ્ટ્રીય ક્રિકેટમાં સૌથી વધુ રન બનાવવાનો રેકોર્ડ ક્રિકેટના ભગવાન કહેવાતા સચિન તેંડુલકરના નામે છે. તેણે પોતાની કારકિર્દીમાં 664 મેચમાં 48.52ની શાનદાર એવરેજથી 34357 રન બનાવ્યા છે. તેના સિવાય કોઈ બેટ્સમેન 30,000 રનનો આંકડો પાર કરી શક્યો નથી.
આંતરરાષ્ટ્રીય ક્રિકેટમાં ભારત માટે સૌથી વધુ રન બનાવનાર ખેલાડી
સચિન તેંડુલકર 34,357
વિરાટ કોહલી 25,047*
રાહુલ દ્રવિડ 24,208
સૌરવ ગાંગુલી 18,575
એમએસ ધોની 17,266
વિરેન્દ્ર સેહવાગ 17,253
રોહિત શર્મા 17,000*
રોહિત શર્માના કરિયરની વાત કરીએ તો તે ઓસ્ટ્રેલિયા સામે તેની કારકિર્દીની 438મી મેચ રમી રહ્યો છે, અત્યાર સુધી તેણે આંતરરાષ્ટ્રીય સ્તર પર 42.95ની એવરેજથી રન બનાવ્યા છે. આ દરમિયાન તેના નામે 43 સદી અને 91 અડધી સદી છે. વિશ્વ ક્રિકેટમાં એક ઇનિંગમાં સૌથી વધુ રન બનાવવાનો રેકોર્ડ રોહિતના નામે છે. તેણે શ્રીલંકા સામે ODI ક્રિકેટમાં 264 રનની અણનમ ઇનિંગ રમી હતી.
ભારત વિરુદ્ધ ઓસ્ટ્રેલિયા 4થી ટેસ્ટ પર એક નજર નાખતા, ટોસ જીતીને બેટિંગ કરવાનું પસંદ કરતા મુલાકાતીઓ ઉસ્માન ખ્વાજા અને કેમેરોન ગ્રીનની સદીઓને કારણે બોર્ડ પર 480 રન બનાવવામાં સફળ રહ્યા હતા. ખ્વાજાએ 180 અને ગ્રીને 114 રન બનાવ્યા હતા. પાતાની આ વિકેટ પર અશ્વિને ભારત માટે સૌથી વધુ 6 વિકેટ લીધી હતી. સમાચાર લખાય છે ત્યાં સુધી ભારતે 1 વિકેટના નુકસાને 74 રન બનાવી લીધા છે. રોહિત શર્માને 35ના અંગત સ્કોર પર કુહનેમેને પેવેલિયનનો રસ્તો બતાવ્યો હતો.
