ચીન સાથેના તણાવ વચ્ચે તાઈવાનના ટોચના મિસાઈલ વૈજ્ઞાનિકનું શંકાસ્પદ મોત, હોટલમાંથી લાશ મળી, તપાસ શરૂ

0
82

તાઈવાન ડિફેન્સ એન્ડ રિસર્ચ વિંગના R&D યુનિટના ડેપ્યુટી ચીફ શનિવારે સવારે હોટલના રૂમમાં મૃત હાલતમાં મળી આવ્યા હતા. તાઈવાનની સત્તાવાર સેન્ટ્રલ ન્યૂઝ એજન્સીએ આ સમાચારની પુષ્ટિ કરી છે. સમાચાર એજન્સીના જણાવ્યા અનુસાર, તાઇવાનની સૈન્યની માલિકીની નેશનલ ચુંગ-શાન ઇન્સ્ટિટ્યૂટ ઓફ સાયન્સ એન્ડ ટેક્નોલોજીના ડેપ્યુટી હેડ ઓ યાંગ લી-હિંગ શનિવારે સવારે દક્ષિણ તાઇવાનમાં એક હોટલના રૂમમાં મૃત હાલતમાં મળી આવ્યા હતા. તેમના મૃત્યુ પાછળના કારણોની તપાસ ચાલી રહી છે.

બ્રિટિશ સમાચાર એજન્સી રોઇટર્સે CNAને ટાંકીને જણાવ્યું હતું કે ઓ યાંગ લી-હિંગની દક્ષિણી કાઉન્ટી પિંગટુંગની બિઝનેસ ટ્રિપ પર હતા. તેમણે તાઈવાનના વિવિધ મિસાઈલ ઉત્પાદન પ્રોજેક્ટ્સની દેખરેખ રાખવા માટે આ વર્ષની શરૂઆતમાં નેશનલ ચુંગ-શાન ઈન્સ્ટિટ્યૂટ ઓફ સાયન્સ એન્ડ ટેક્નોલોજીના ડેપ્યુટી હેડ તરીકે કાર્યભાર સંભાળ્યો હતો. તાઇવાનની સૈન્ય માલિકીની સંસ્થા આ વર્ષે તેની વાર્ષિક મિસાઇલ ઉત્પાદન ક્ષમતાને બમણીથી વધુ 500ની નજીક કરવા માટે કામ કરી રહી છે. કારણ કે આ ટાપુ દેશ ચીન માટે વધતા લશ્કરી ખતરા તરીકે તેની યુદ્ધ શક્તિ વધારવાની દિશામાં કામ કરી રહ્યો છે.

ખાસ કરીને તાજેતરના મહિનાઓમાં, બેઇજિંગે તેની કહેવાતી વન ચાઇના નીતિને આગળ વધારી છે અને તાઇવાન પર કડક વલણ અપનાવી રહ્યું છે. હાલમાં, ચીન યુએસ સંસદના સ્પીકર નેન્સી પેલોસીની તાઇવાનની મુલાકાતનો બદલો લેવા ટાપુ દેશની ઘેરાબંધી કરીને એક વિશાળ સૈન્ય કવાયત કરી રહ્યું છે. દરમિયાન, તાઇવાને ચીનની સેના પર શનિવારે તેના મુખ્ય ટાપુ પર હુમલો “સિમ્યુલેટિંગ” કરવાનો આરોપ મૂક્યો હતો. નેન્સી પેલોસી 25 વર્ષમાં તાઈવાનની મુલાકાત લેનારી યુએસ સંસદની પ્રથમ સ્પીકર છે.

તેમણે તાઈપેઈમાં તાઈવાનની સાર્વભૌમત્વ અને સુરક્ષાને જાળવી રાખવાની હિમાયત કરી હતી. આ ઘટના બાદ પહેલાથી જ બગડેલા સંબંધો વચ્ચે અમેરિકા અને ચીન સીધા સામસામે આવી ગયા છે. પેલોસીએ તાઈવાન છોડ્યાના 18 કલાક પછી, ચીનની પીપલ્સ લિબરેશન આર્મીની તમામ શાખાઓએ પ્રથમ વખત ટાપુ પાર કર્યો અને મોટા પાયે દાવપેચ શરૂ કર્યા. ચીને ન માત્ર તાઈવાન પર વેપાર પ્રતિબંધો લાદ્યા પણ તેને નેન્સી પેલોસીની મુલાકાતને લઈને યુનાઈટેડ સ્ટેટ્સ સાથેની શ્રેણીબદ્ધ વાટાઘાટો અને સહકાર કરારમાંથી ખસી જવા પણ કહ્યું.