ફરી એકવાર કડકડતી ઠંડીનો અનુભવ કરવા તૈયાર થઈ જાઓ. ગુજરાતમાં છેલ્લા બે દિવસથી પડી રહેલા કમોસમી વરસાદને કારણે તાપમાનમાં વધારો થયો છે. જો કે મંગળવારથી તાપમાનમાં 3 ડિગ્રીનો ઘટાડો થશે જેના કારણે ઠંડીમાં વધુ વધારો થશે. રાજ્યમાં આગામી 5 દિવસ સુધી હવામાન સૂકું રહેશે. હવામાન વિભાગની આગાહી મુજબ 31 જાન્યુઆરી અને 1 ફેબ્રુઆરીએ 20 કિમીની ઝડપે પવન ફૂંકાશે. જેના કારણે ભારે પવન સાથે ઠંડીનો અહેસાસ થશે.
ગુજરાતમાં બે દિવસથી કમોસમી વરસાદ
રાજસ્થાન તરફ સિસ્ટમ સક્રિય હોવાને કારણે ગુજરાતમાં બે દિવસથી કમોસમી વરસાદ પડ્યો હતો. જો કે હવામાન વિભાગે વરસાદની કોઈ શક્યતા ન હોવાની આગાહી કરી છે. તેમજ હવામાન વિભાગે આપેલી માહિતી મુજબ ઉત્તર-પૂર્વના વધુ પવનોને કારણે ઠંડીમાં વધારો થશે. તેથી સૌરાષ્ટ્રમાં તાપમાન સામાન્ય રહેશે.
રાજ્યના અનેક શહેરોમાં સવારે ધુમ્મસની ચાદર છવાઈ ગઈ હતી.
ખાસ વાત એ છે કે ગુજરાતમાં છેલ્લા બે દિવસથી વરસાદી માહોલ જોવા મળી રહ્યો છે. રાજ્યના અનેક શહેરોમાં સવારે ધુમ્મસની ચાદર છવાઈ ગઈ હતી. આ સાથે અનેક વિસ્તારોમાં કમોસમી વરસાદ થયો છે. કેટલાક વિસ્તારોમાં કરા સાથે વરસાદ પણ થયો છે. રવિવારે 20થી વધુ તાલુકાઓમાં વરસાદ પડ્યો હતો. સિદ્ધપુર અને વડગામમાં અડધો ઇંચ વરસાદ નોંધાયો છે. અત્યારે લગ્નની સિઝન ચાલી રહી છે. આથી અચાનક વરસાદના કારણે લગ્નના કાર્યક્રમો ખોરવાઈ રહ્યા છે.
રાજ્યના અનેક જિલ્લાઓમાં સતત બીજા દિવસે કમોસમી વરસાદ થયો હતો.
છેલ્લા બે દિવસમાં અમદાવાદ, ગાંધીનગર, સાબરકાંઠા, બનાસકાંઠા, ખેડા, આણંદ, મહેસાણા, સુરત સહિતના અનેક વિસ્તારોમાં વરસાદ પડ્યો છે. બનાસકાંઠાના પાલનપુર વિસ્તારમાં ગઈકાલે રાત્રે એક ઈંચ કમોસમી વરસાદ નોંધાયો હતો. અંબાજી, અમદાવાદ, મહેમદાવાદમાં કરા સાથે વરસાદ થયો હતો. રાજ્યના અનેક જિલ્લાઓમાં સતત બીજા દિવસે કમોસમી વરસાદ થયો છે.
