LCA Mark-1A : હિન્દુસ્તાન એરોનોટિક્સ લિમિટેડ (HAL) આ મહિનાના અંત સુધીમાં ભારતીય વાયુસેનાને પહેલું LCA Mark-1A ફાઈટર જેટ ડિલિવર કરી શકે છે. HAL ભારતીય વાયુસેનાને શક્ય તેટલી વહેલી તકે પ્રથમ ટ્વીન-સીટર ટ્રેનર સંસ્કરણ એરક્રાફ્ટની ડિલિવરી તરફ કામ કરી રહ્યું છે. તમને જણાવી દઈએ કે, જેટ મિગનું સ્થાન લેશે અને તેને પાકિસ્તાન બોર્ડર પર તૈનાત કરવામાં આવશે. ઉલ્લેખનીય છે કે કેન્દ્ર સરકાર આત્મનિર્ભર ભારત પર ભાર આપી રહી છે. સંરક્ષણ ઉત્પાદનોના ઉત્પાદનમાં સ્વદેશીકરણને પ્રોત્સાહન આપવામાં આવી રહ્યું છે.
HALનું કહેવું છે કે આ પગલું સ્વદેશી ફાઈટર એરક્રાફ્ટ પ્રોજેક્ટ માટે મોટું પ્રોત્સાહન હશે. એરફોર્સને અદ્યતન જેટ આપવામાં આવશે. અમે 31 માર્ચ સુધીમાં પહોંચાડવા માટે અમારા શ્રેષ્ઠ પ્રયાસો કરી રહ્યા છીએ અને અમે આ દિશામાં ઝડપથી કામ કરી રહ્યા છીએ. નોંધનીય છે કે ભારતીય વાયુસેનાએ 83 LCA એરક્રાફ્ટની સપ્લાય માટે HAL સાથે કરાર પર હસ્તાક્ષર કર્યા છે. કોન્ટ્રાક્ટ વેલ્યુ 48,000 કરોડ રૂપિયા છે. આ સિવાય 65 હજાર કરોડ રૂપિયાના 97 વધુ એરક્રાફ્ટ ખરીદવાની મંજૂરી આપવામાં આવી છે. LCA માર્ક 1 એરક્રાફ્ટને 2016માં ભારતીય વાયુસેનામાં સામેલ કરવામાં આવ્યું હતું.
ભારતીય નિર્મિત લાઇટ કોમ્બેટ એરક્રાફ્ટ એલસીએ માર્ક-1એના પ્રથમ સ્ક્વોડ્રનને પાકિસ્તાન સરહદ પર તૈનાત કરવાની તૈયારીઓ ચાલી રહી છે. માર્ક-1એ હાલના તેજસ Mk-1નું આધુનિક સંસ્કરણ છે અને તેને રાજસ્થાનના બિકાનેરમાં નલ એરબેઝ પર તૈનાત કરવામાં આવશે. તે સૌથી અદ્યતન રડાર અને કોમ્યુનિકેશન અને ઈલેક્ટ્રોનિક સિસ્ટમ્સ (એવિઓનિક્સ)થી સજ્જ છે.
મિગ-21, મિગ-23 અને મિગ-27ને બદલવા માટે એરફોર્સમાં LCA માર્ક 1A રજૂ કરવામાં આવી રહ્યું છે. મિગ-23 અને મિગ-27 પહેલેથી જ સેવામાંથી બહાર છે. મિગ-21ની બે સ્ક્વોડ્રન સેવામાં છે. આને પણ નાબૂદ કરવામાં આવશે.