Maharashtra: વડા પ્રધાન નરેન્દ્ર મોદીએ મુંબઈમાં દેશના સૌથી લાંબા પુલનું ઉદ્ઘાટન કર્યા બાદ જાહેર સભાને સંબોધતા કહ્યું હતું કે આજનો દિવસ મુંબઈ અને મહારાષ્ટ્ર માટે તેમજ વિકસિત ભારતના સંકલ્પ માટે ઐતિહાસિક દિવસ છે. આજે દેશને વિશ્વના સૌથી મોટા સેતુઓમાંનો એક અટલ સેતુ મળ્યો છે.આજનો કાર્યક્રમ સંકલ્પ દ્વારા સિદ્ધિનો પુરાવો છે.
અટલ સેતુનું નિર્માણ કુલ 17,480 કરોડ રૂપિયાના ખર્ચે કરવામાં આવ્યું છે. આ છ લેનનો પુલ 21.8 કિમી લાંબો છે અને તેમાં 16.5 કિમી લાંબી સી-લિંક છે.
ભારતનો સૌથી લાંબો પુલ હોવા ઉપરાંત, અટલ સેતુ દેશનો સૌથી લાંબો દરિયાઈ પુલ પણ છે. આ પુલ નવી મુંબઈ ઈન્ટરનેશનલ એરપોર્ટને ઝડપી કનેક્ટિવિટી પ્રદાન કરશે અને મુંબઈ અને પૂણે વચ્ચેનો મુસાફરીનો સમય ઘટાડશે. આના કારણે મુંબઈથી ગોવા અને દક્ષિણ ભારતની મુસાફરીમાં પણ ઓછો સમય લાગશે.
આ સાથે વડાપ્રધાન મોદીએ મુંબઈમાં ઈસ્ટર્ન ફ્રીવે ઓરેન્જ ગેટથી મરીન ડ્રાઈવને જોડતી અંડરગ્રાઉન્ડ રોડ ટનલનો શિલાન્યાસ કર્યો હતો. મુંબઈમાં સાંતાક્રુઝ ઈલેક્ટ્રોનિક એક્સપોર્ટ પ્રોસેસિંગ ઝોન ખાતે જેમ્સ એન્ડ જ્વેલરી સેક્ટર માટે ફેસિલિટેશન સેન્ટરનું ઉદ્ઘાટન કર્યું અને મહિલાઓને કૌશલ્ય વિકાસની તાલીમ આપવા માટે નમો મહિલા સશક્તિકરણ અભિયાન શરૂ કર્યું.