આ સમયે સમગ્ર ક્રિકેટ જગતમાં ઈન્ડિયન પ્રીમિયર લીગ (IPL) નો ફિવર જોવા મળી રહ્યો છે. આગામી સીઝન શરૂ થવામાં 24 કલાકથી પણ ઓછો સમય બાકી છે જેમાં પ્રથમ મેચ 31 માર્ચે અમદાવાદના નરેન્દ્ર મોદી સ્ટેડિયમ ખાતે ડિફેન્ડિંગ ચેમ્પિયન ગુજરાત ટાઇટન્સ (GT) અને ચેન્નઈ સુપર કિંગ્સ (CSK) વચ્ચે રમાશે.
આ મેચની શરૂઆત પહેલા આ વખતે ઓપનિંગ સેરેમનીનું પણ આયોજન કરવામાં આવશે જે લગભગ 5 વર્ષ બાદ IPLમાં આયોજિત કરવામાં આવી રહ્યું છે. હાર્દિક પંડ્યા ગત સીઝનની જેમ ગુજરાત ટાઇટન્સ ટીમના કેપ્ટન તરીકે જોવા જઈ રહ્યો છે, જ્યારે મહેન્દ્ર સિંહ ધોની ચેન્નઈ સુપર કિંગ્સ ટીમની કેપ્ટનશીપ સંભાળશે.
આ વખતે બંને ટીમોમાં કેટલાક ફેરફારો પણ જોવા મળશે, જેમાં કેન વિલિયમ્સન સિવાય શિવમ માવી, ઓડિયન સ્મિથ, જોશુઆ લિટલ, કેએસ ભરત અને મોહિત શર્મા ગુજરાત ટાઇટન્સ ટીમમાં જોવા મળશે. ચેન્નઈ સુપર કિંગ્સની વાત કરીએ તો તેમાં બેન સ્ટોક્સ સૌથી મોટા ખેલાડી તરીકે જોવા મળશે.
હેડ ટુ હેડ રેકોર્ડ
બંને ટીમોના રેકોર્ડની વાત કરીએ તો ચેન્નઈ અને ગુજરાત વચ્ચે અત્યાર સુધીમાં 2 મેચ રમાઈ છે, જેમાં હાર્દિક પંડ્યાની કેપ્ટન્સીમાં ગુજરાત ટાઇટન્સ ટીમ બંને વખત જીતી છે.આ મેચનું સ્ટાર સ્પોર્ટ્સ નેટવર્ક પર સાંજે 6 વાગ્યાથી ટીવી પર જીવંત પ્રસારણ કરવામાં આવશે.
આ મેચના ઓનલાઈન સ્ટ્રીમિંગની વાત કરીએ તો, તે સાંજે 6 વાગ્યાથી જિયો સિનેમા એપ અને વેબસાઈટ પર હશે, જેમાં યુઝર્સ કોઈપણ નેટવર્કથી ફ્રીમાં મેચનો આનંદ લઈ શકશે, જેમાં મેચનું સ્ટ્રીમિંગ પણ 4Kમાં કરવામાં આવશે.
બંને કેપ્ટનો પાસે પ્લેઇંગ-11ની બે યાદી હશે જે તેઓ ટોસ પછી શેર કરશે. એકમાં પ્રથમ બેટિંગ કરવાની સ્થિતિમાં 11 ખેલાડીઓના નામ હશે. બીજી યાદીમાં પછીથી બેટિંગની સ્થિતિ અનુસાર 11 ખેલાડીઓના નામ હશે. બંને લિસ્ટમાં પ્લેઇંગ-11માં ફેરફારની શક્યતા ઓછી છે. પ્લેઇંગ-11ની સાથે બંને ટીમો 5-5 અવેજી ખેલાડીઓનું નામ પણ લેશે. આમાંથી એક ખેલાડીનો ઉપયોગ ઈમ્પેક્ટ પ્લેયર તરીકે થઈ શકે છે.
ચેન્નઈ સુપર કિંગ્સ: ઋતુરાજ ગાયકવાડ, ડેવોન કોનવે, બેન સ્ટોક્સ, મોઈન અલી, અંબાતી રાયડુ, રવિન્દ્ર જાડેજા, શિવમ દુબે, એમએસ ધોની (કેપ્ટન, વિકેટકીપર), મિશેલ સેન્ટનર, દીપક ચહર, સિમરજીત સિંહ.
ગુજરાત ટાઇટન્સ: શુભમન ગિલ, રિદ્ધિમાન સાહા (વિકેટમાં), કેન વિલિયમસન, મેથ્યુ વેડ, હાર્દિક પંડ્યા, રાહુલ તેવટિયા, રાશિદ ખાન, શિવમ માવી, આર સાઈ કિશોર, અલઝારી જોસેફ, મોહમ્મદ શમી.
ગુજરાત ટાઇટન્સ ટીમ CSK કરતાં વધુ સંતુલિત લાગે છે. ગુજરાતની ટીમમાં યુવા અને અનુભવી ખેલાડીઓનું સારું મિશ્રણ છે. CSK પાસે મોટાભાગે અનુભવી ખેલાડીઓ છે. જોકે CSK પાસે નંબર-10 સુધી ઓલરાઉન્ડર ખેલાડીઓનો વિકલ્પ છે. આવી સ્થિતિમાં મુકાબલો ટક્કરનો બની રહ્યો છે, જોકે પ્રથમ નજરે જો બંને ટીમો જોવામાં આવે તો ગુજરાતની ટીમનું પલ્લું થોડું ભારે જણાઈ રહ્યું છે.