પ્રીપેઇડ ઈ-વોલેટ્સમાં KYC પૂર્ણ કરવા માટે RBIની ડેડલાઇન 28 ફેબ્રુઆરીમાં ફક્ત એક જ દિવસનો સમય બાકી છે. આ દરમિયાન RBIએ સ્પષ્ટતા કરતા જણાવ્યું કે ‘અમે આ તારીખને આગળ વધારવા માગતા નથી.’ પરંતુ એટલી રાહત જરુર આપી હતી કે વોલેટમાં રહેલું હાલું બેલેન્સ જેમનું તેમ રહેશે અને યુઝર તેનો ઉપયોગ કરી શકશે.
RBIએ તારીખ આગળ કરવાની ના પાડી પરંતુ આપી આટલી છૂટછાટ
RBIએ વધુમાં કહ્યું કે, યુઝર પોતાના આ પૈસાને બેંક એકાઉન્ટમાં પણ ટ્રાન્સફર કરી શકશે. અલબત્ત જો યુઝર કોઈ બીજાના બેંક એકાઉન્ટ અથવા ઈ વોલેટમાં પૈસા ટ્રાન્સ્ફર કરવા માગતા હશે તો તેમને KYC ડિટેલ ભરવી પડશે. RBIના આ નિર્ણયથી PayTM, મોબિક્વિક, ઓલા મની અને એમેઝોન પે જેવા ઈ વોલેટ્સ પ્રભાવિત થશે. RBIના ડે. ગવર્નર બી.પી. કાનૂનગોએ કહ્યું કે, ‘KYC ડિટેલ અપડેટ કરવાની છેલ્લી તારીખ 28 ફેબ્રુઆરી છે અને તેનું એક્સટેન્શન નહીં કરવામાં આવે.’
જો ઈ વોલેટ પહેલાની જેમ યુઝ કરવા માગતા હોવ તો ભરો KYC
મીડિયા સાથે વાતચીતમાં તેમણે કહ્યું કે, ‘ગાઇડલાઇન્સને ફોલો કરવા માટે પહેલા જ પર્યાપ્ત સમય આપવામાં આવ્યો છે. જો પ્રી પેઇડ ઇંસ્ટ્રૂમેન્ટ્સ દ્વારા KYC અપડેટની પ્રક્રિયા પૂર્ણ કરવામાં નહીં આવે તો પણ કસ્ટમરને તેની જમા રહેલી રકમનું નુકસાન નહીં થાય.’ હાલ RBIની મંજૂરી સાથે દેશમાં 55 નોન બેંક પ્રી પેઇડ ઇંસ્ટ્રૂમેન્ટ્સ દેશમાં કામ કરી રહ્યા છે. તેના ઉપરાંત 50 ઈ વોલેટ્સ્ પણ એવા છે જેને બેંકો તરફથી પ્રમોટ કરવામાં આવે છે.
કાર્ડ એકાઉન્ટ એડ કરતા જ આપમેળે અપડેટ થઈ જશે KYC ડિટેલ
RBIએ ઈ વોલેટ્સ યૂઝર્સને KYC અપડેટ માટે 31 ડિસેમ્બર 2017 સુધીનો સમય આપ્યો હતો. જેને વધારીને 28 ફેબ્રુઆરી સુધીનો કરી દેવામાં આવ્યો છે. એક સીનિયર બેંકે અમારા સહોયગી ટાઇમ્સ ઓફ ઇન્ડિયા સાથે વાત કરતા જણાવ્યું કે, ‘જો ગ્રાહક પોતાના કાર્ડ એકાઉન્ટને ઈ વોલેટ સાથે જોડે છે તો તેમની KYC ડિટેલ આપમેળે જ ઈ વોલેટ સાથે જોડાય જાય છે.’
KYC માટે PayTmએ 3,250 કરોડનું બજેટ રાખ્યું
દેશની સૌથી મોટી ઈ વોલેટ કંપની PayTM જે હવે એક પેમેંટ બેંક પણ છે. KYC પૂર્ણ કરવા માટે કંપનીએ 3250 કરોડનું બજેટ ફાળવ્યું છે.