વોશીંગ્ટન તા.૭ : અમેરિકામાં આવતીકાલે રાષ્ટ્રપતિની ચૂંટણી માટે મતદાન થવાનુ છે. આ માટેની તમામ તૈયારી પુર્ણ થઇ ગઇ છે. લગભગ ર૦ કરોડ મતદારો પોતાના મતાધિકારનો ઉપયોગ કરશે. વિશ્વના સૌથી શકિતશાળી દેશ અમેરિકાના ૪પમાં રાષ્ટ્રપતિ બનવા માટે ડેમોક્રેટીક પાર્ટીના હિલેરી કિલન્ટન અને રિપબ્લીકન પાર્ટીના ડોનાલ્ડ ટ્રમ્પ વચ્ચે ખરાખરીનો જંગ છે. બંનેએ વિજય માટે મેરેથોન મહેનત કરી છે. આ વખતની ચૂંટણીની મીડીયામાં પણ ભારે ચર્ચા થઇ છે. કુલ ર૦ કરોડ મતદારોમાંથી ૩ કરોડ પ૦ લાખ મતદારો પહેલા જ મતદાન કરી ચુકયા છે.
અમેરિકી રાષ્ટ્રપતિ પદ માટે ઇલેકશન ડે આવતીકાલે છે. ભારતીય સમય મુજબ સાંજે પ-૩૦ કલાક સુધી પ્રથમ ચરણની ચૂંટણી ચાલશે. ચૂંટણીમાં વિજય માટે ઉમેદવાર પાસે ર૭૦ ઇલેકટોરલ કોલેજ વોટ હોવા જોઇએ બાદમાં ઇલેકટોરલ કોલેજીયમ બાદ ૬ જાન્યુઆરી ર૦૧૭ના રોજ નવા રાષ્ટ્રપતિની જાહેરાત કરવામાં આવશે. ર૦ જાન્યુઆરી ર૦૧૭થી અમેરિકાના નવા રાષ્ટ્રપતિ વ્હાઇટ હાઉસમાં કાર્યભાર સંભાળશે. ડોનાલ્ડ ટ્રમ્પ અને હિલેરીએ ચૂંટણી જીતવા ભારે મહેનત કરી છે. અમેરિકાના પ૦ રાજયોમાં અને કેપીટલ વોશીંગ્ટનમાં મતદાન થશે. વ્હાઇટ હાઉસની રેસ માટે પ૩૮ ઇલેકટોરલ વોટસમાંથી ર૭૦ જોઇએ. તમામ રાજયોમાં પોલીંગ સ્ટેશન ઉભા કરવામાં આવ્યા છે.
સૌનુ ધ્યાન ફલોરીડા ઉપર છે ત્યાં ર૯ ઇલેકટોરલ વોટસ છે. ર૦૧રમાં ઓબામાએ ૩પ સરસાઇથી વિજય મેળવ્યો હતો. ઓહીયો રાજય સૌથી મહત્વનું છે. અત્યાર સુધીમાં બંને ઉમેદવારો વચ્ચે ૩ ડીબેટ થઇ છે. ત્રણેયમાં હિલેરી આગળ નીકળી ગયા હતા. મહિલાઓ વચ્ચે ટ્રમ્પની લોકપ્રિયતા ઘટી છે. જે રાજયો પર બંનેની નજર છે તે છે ફલોરીડા, ઓહીયો, વર્જીનીયા, નોર્થ કેરોલીના, ન્યુ હેમ્પ શાયર, પેન્સીલવેનીયા, આયોવા, કોલારેડો અને નેવાડા છે.
અમેરિકાના રાષ્ટ્રપતિની ચૂંટણીની વિશ્વભરમાં ભારે ચર્ચા છે. આ ચૂંટણીમાં કોણ વિજેતા બનશે એ બાબતને લઇને જબરી અટકળો થઇ રહી છે. કરોડો રૂપિયાનો જુગાર પણ ખેલવામાં આવ્યો છે. વિશ્વભરના દેશો ચૂંટણીને લઇને પોત-પોતાની રીતે આંકલન કરી રહ્યા છે. આ ચૂંટણી અમેરિકાના ઇતિહાસમાં સૌથી વધુ વિવાદાસ્પદ પણ રહી છે. અંગત આરોપોને લઇને આ ચૂંટણીએ ભારે ચર્ચા પણ જગાવી છે.