કાબુલ: અફઘાનિસ્તાનમાં મોરોક્કનનું એક વિમાન ક્રેશ થયું છે. આ એક ચાર્ટર્ડ પ્લેન છે, જે અજાણ્યા ગંતવ્ય તરફ જઈ રહ્યું હતું. અગાઉ અફઘાન મીડિયાએ દાવો કર્યો હતો કે તે ભારતીય પેસેન્જર પ્લેન હતું જે રશિયાની રાજધાની મોસ્કો માટે ઉડ્યું હતું. આ વિમાન પૂર્વોત્તર અફઘાનિસ્તાનના બદખ્શાન પ્રાંતમાં ક્રેશ થયું છે. આ પ્રાંત ચીન, તાજિકિસ્તાન અને પાકિસ્તાન સાથે તેની સરહદો વહેંચે છે. જોકે, પ્લેન ક્રેશનું ચોક્કસ સ્થળ હજુ સુધી જાણી શકાયું નથી.
ભારત સરકારે શું કહ્યું?
ભારતના નાગરિક ઉડ્ડયન મંત્રાલયે જણાવ્યું હતું કે અફઘાનિસ્તાનમાં હમણાં જ જે દુર્ભાગ્યપૂર્ણ વિમાન દુર્ઘટના થઈ છે તે ન તો ભારતીય શિડ્યુલ્ડ પ્લેન હતું કે ન તો નોન-શિડ્યુલ્ડ (NSOP)/ચાર્ટર પ્લેન હતું. તે મોરોક્કોમાં નોંધાયેલું નાનું વિમાન છે. વધુ વિગતોની રાહ જોવાઈ રહી છે. આના પરથી સ્પષ્ટ થઈ ગયું છે કે અફઘાનિસ્તાનમાં કોઈ ભારતીય વિમાન દુર્ઘટનાનો શિકાર બન્યું નથી.
અફઘાનિસ્તાનના પ્રાંતીય પ્રવક્તાએ માહિતી આપી
બદખ્શાન પ્રાંતના પ્રાંતીય માહિતી વિભાગના વડા ઝબીહુલ્લાહ અમીરીએ જણાવ્યું હતું કે, “વિમાન ક્રેશ થયું છે પરંતુ સ્થળ હજુ જાણી શકાયું નથી.” અમે ટીમો મોકલી છે પરંતુ તેઓ હજુ સુધી પહોંચ્યા નથી,” તેમણે કહ્યું, “અમને સવારે સ્થાનિકો દ્વારા જાણ કરવામાં આવી હતી.” આ પ્રાંત હિંદુ કુશ પર્વતમાળામાં સ્થિત છે, જ્યાં અફઘાનિસ્તાનનો સૌથી ઊંચો પર્વત, માઉન્ટ નોશક આવેલું છે. માઉન્ટ નોશક સમુદ્ર સપાટીથી 7,492 મીટર (24,580 ફૂટ)ની ઊંચાઈ ધરાવે છે.