મુશળધાર વરસાદ અને વાવાઝોડાનું સંકટ: હવામાન વિભાગે દેશના ૨૩ રાજ્યો માટે જારી કરી ગંભીર ચેતવણી
દેશમાં ચોમાસાની વિદાય પહેલા મેઘરાજાએ ફરી એકવાર પોતાનું રોદ્ર સ્વરૂપ ધારણ કર્યું છે. ભારતીય હવામાન વિભાગ (IMD) દ્વારા કરવામાં આવેલી તાજી આગાહી મુજબ, આગામી ૧૮ કલાકમાં દેશના ૨૩ જેટલા રાજ્યોમાં ભારેથી અતિભારે વરસાદ પડી શકે છે. આ સમયગાળા દરમિયાન ૭૦ થી ૮૦ કિલોમીટર પ્રતિ કલાકની પ્રચંડ ઝડપે તોફાની પવન ફૂંકાવાની પણ દહેશત વ્યક્ત કરવામાં આવી છે. વાવાઝોડા સાથે આવનારા આ વરસાદને કારણે દેશના અનેક વિસ્તારોમાં મોટા વૃક્ષો ધરાશાયી થવાની અને વિજળીના થાંભલા ઉખડી જવાની શક્યતા છે. પહાડી રાજ્યોમાં ભૂસ્ખલન (લેન્ડસ્લાઈડ) થવાની ગંભીર ચેતવણી પણ આપવામાં આવી છે.
બંગાળની ખાડીમાં ડીપ ડિપ્રેશન અને તોફાની હવા
હવામાન નિષ્ણાતોના જણાવ્યા અનુસાર, દક્ષિણ-પશ્ચિમ બંગાળની ખાડી અને ઉત્તરી દરિયાકાંઠાના આંધ્રપ્રદેશ પર એક મજબૂત ડીપ ડિપ્રેશન સર્જાયું છે. આ સિસ્ટમ ઉત્તર-પશ્ચિમ તરફ આગળ વધી રહી છે. આ સિસ્ટમને કારણે બંગાળની ખાડીમાં દરિયાની સ્થિતિ ખૂબ જ તોફાની બનેલી છે. આ પવનો પૂર્વી ભારત અને દરિયાકાંઠાના રાજ્યોમાં ભારે તારાજી સર્જી શકે તેમ છે. ખાસ કરીને ઓડિશા, છત્તીસગઢ, તેલંગાણા અને આંધ્રપ્રદેશ જેવા રાજ્યો પર આ તોફાનની સીધી અસર જોવા મળશે. હવામાન વિભાગે માછીમારોને દરિયામાં ન જવાની અને સુરક્ષિત સ્થળોએ ખસી જવાની કડક સૂચના આપી છે.
૧૭ રાજ્યોમાં તોફાન અને કરા પડવાની શક્યતા
હવામાન વિભાગે દેશના ૧૭થી વધુ મુખ્ય રાજ્યો માટે હાઈ અલર્ટ જારી કર્યું છે. જેમાં ઉત્તર પ્રદેશ, બિહાર, હરિયાણા, દિલ્હી, રાજસ્થાન, પંજાબ, ઉત્તરાખંડ, ઝારખંડ, ઓડિશા, પશ્ચિમ બંગાળ, છત્તીસગઢ, મધ્યપ્રદેશ, મહારાષ્ટ્ર, ગુજરાત, તેલંગાણા અને આંધ્રપ્રદેશનો સમાવેશ થાય છે. આ રાજ્યોમાં તોફાની પવન, વીજળીના કડાકા અને કેટલાક વિસ્તારોમાં કરા પડવાની પણ પૂરતી શક્યતા છે.
દિલ્હી-એનસીઆર અને ઉત્તર પ્રદેશની સ્થિતિ
દેશની રાજધાની દિલ્હીમાં આજે હળવાથી મધ્યમ વરસાદની પૂરી શક્યતા છે. અહીં ૨૦ થી ૨૫ કિલોમીટરની ઝડપે પવન ફૂંકાશે અને મહત્તમ તાપમાન ૩૨ ડિગ્રી જ્યારે લઘુત્તમ તાપમાન ૨૩ ડિગ્રી સેલ્સિયસ રહેવાનું અનુમાન છે.
બીજી તરફ, ઉત્તર પ્રદેશમાં સ્થિતિ વધુ ગંભીર બની શકે છે. રામપુર, બરેલી, પીલીભીત, લખીમપુર ખેરી, કાનપુર, લખનઉ, ગોરખપુર, બુલંદશહેર અને ગાઝીપુર સહિત અનેક જિલ્લાઓમાં ભારે વરસાદ અને ૫૫ થી ૬૦ કિલોમીટરની ઝડપે તોફાની પવન ફૂંકાવાની આગાહી છે. લખનઉમાં દિવસનું મહત્તમ તાપમાન ૨૪ ડિગ્રી સુધી ઘટી શકે છે, જેથી વાતાવરણમાં ઠંડક પ્રસરી જશે.
બિહાર અને ઝારખંડમાં ભારે વરસાદનું સંકટ
બિહારના પટના, પશ્ચિમ ચંપારણ, પૂર્વ ચંપારણ, સીવાન, સારણ, ઔરંગાબાદ, ગયા, દરભંગા, અને પૂર્ણિયા જેવા જિલ્લાઓમાં ગાજવીજ સાથે ભારે વરસાદ પડાવાની શક્યતા છે. અહીં પવનની ગતિ ૫૦ કિલોમીટર પ્રતિ કલાક સુધી પહોંચી શકે છે. ઝારખંડના રાંચી, જમશેદપુર, ધનબાદ, ગિરિડીહ અને બોકારો જિલ્લામાં પણ ભારે તોફાન સાથે મુશળધાર વરસાદ પડી શકે છે.
પહાડી રાજ્યો: ઉત્તરાખંડ, હિમાચલ અને જમ્મુ-કાશ્મીર
પહાડી રાજ્યોમાં વરસાદને કારણે જનજીવન અસ્તવ્યસ્ત થવાની ભીતિ છે. ઉત્તરાખંડના દેહરાદૂન, નૈનિતાલ, ઋષિકેશ અને હરિદ્વારમાં ૪૦ થી ૫૦ કિમીની ઝડપે પવન સાથે ભારે વરસાદ પડશે. હિમાચલ પ્રદેશના શિમલા, મનાલી, કુલ્લુ અને મંડીમાં વરસાદની ચેતવણી આપવામાં આવી છે. જમ્મુ-કાશ્મીરના જમ્મુ, કઠુઆ, ડોડા અને અનંતનાગ જેવા વિસ્તારોમાં પણ મુશળધાર વરસાદથી તાપમાનમાં ભારે ઘટાડો નોંધાશે.
પશ્ચિમ બંગાળ, પંજાબ, રાજસ્થાન અને મધ્યપ્રદેશ
પશ્ચિમ બંગાળના દાર્જિલિંગ, દુર્ગાપુર અને કોલકાતા સહિતના વિસ્તારોમાં ૭૦ કિલોમીટરની ઝડપે પવન ફૂંકાશે. પંજાબના લુધિયાણા, અમૃતસર અને ચંદીગઢમાં ૬૦ કિલોમીટરની ઝડપે વાવાઝોડું આવી શકે છે. રાજસ્થાનના જયપુર, ઉદયપુર અને કોટામાં મધ્યમથી ભારે વરસાદની ચેતવણી આપવામાં આવી છે. મધ્યપ્રદેશના ભોપાલ, વિદિશા અને સાગર સહિતના જિલ્લાઓમાં પણ આ ચોમાસાની સિઝનનો ભારે વરસાદ પડી શકે છે.
તમામ નાગરિકોને હવામાન વિભાગની સૂચનાઓનું પાલન કરવા અને બિનજરૂરી મુસાફરી ટાળવા વિનંતી કરવામાં આવી છે
