હવામાન વિભાગ દ્વારા માછીમારોને દરિયો ન ખેડવાની સલાહ, નવા વરસાદી રાઉન્ડની શક્યતા
ગુજરાત રાજ્યમાં ચોમાસાની ઋતુ દરમિયાન સાર્વત્રિક વરસાદના કારણે 28 ઓગસ્ટ, 2025 સુધીમાં સરેરાશ 85% થી વધુ વરસાદ નોંધાયો છે. આ વરસાદે રાજ્યભરના જળાશયોને ભરવામાં મદદ કરી છે. સૌથી વધુ વરસાદ દક્ષિણ ગુજરાત અને ઉત્તર ગુજરાતમાં 89% નોંધાયો છે, જ્યારે કચ્છમાં 85.14%, સૌરાષ્ટ્રમાં 83.84% અને પૂર્વ-મધ્ય ગુજરાતમાં 81.03% વરસાદ વરસ્યો છે.
ડેમોની સ્થિતિ અને સુરક્ષા વ્યવસ્થા
સ્ટેટ ઇમરજન્સી ઓપરેશન સેન્ટર (SEOC)ના અહેવાલ મુજબ, ગુજરાતની જીવાદોરી સમાન સરદાર સરોવર ડેમ 79.03% ભરાઈ ગયો છે. આ ઉપરાંત, રાજ્યના કુલ 206 ડેમમાંથી 75 ડેમ 100% ભરાયા છે. અન્ય ડેમોની વાત કરીએ તો, 70 ડેમ 70% થી 100%, 25 ડેમ 50% થી 70%, 20 ડેમ 25% થી 50% અને 16 ડેમ 25% થી ઓછા ભરાયેલા છે. રાજ્યમાં પૂરતી સાવચેતી રાખવા માટે 100 ડેમ હાઈ એલર્ટ, 28 ડેમ એલર્ટ અને 17 ડેમ વોર્નિંગ એલર્ટ પર મૂકવામાં આવ્યા છે.
ચાલુ ચોમાસાની સિઝનમાં અત્યાર સુધીમાં 5311 નાગરિકોનું સલામત સ્થળે સ્થળાંતર કરવામાં આવ્યું છે અને 1005 લોકોને પાણીમાંથી બચાવવામાં આવ્યા છે. ગુજરાત રાજ્ય વાહન વ્યવહાર નિગમ (ST) દ્વારા નહિવત બસ ટ્રિપો રદ કરીને લોકોને પરિવહનની સુવિધા પૂરી પાડવામાં આવી છે. IMD દ્વારા માછીમારોને 28 ઓગસ્ટથી 31 ઓગસ્ટ સુધી દરિયો ન ખેડવાની સલાહ આપવામાં આવી છે.
નવા વરસાદી રાઉન્ડની આગાહી
હવામાન નિષ્ણાત પરેશ ગોસ્વામીએ આગાહી કરી છે કે 27 ઓગસ્ટથી 31 ઓગસ્ટ દરમિયાન રાજ્યમાં ફરી એકવાર વરસાદનો નવો તબક્કો શરૂ થઈ શકે છે. આ વરસાદ બંગાળની ખાડીમાં સર્જાયેલી નવી સિસ્ટમના કારણે આવશે. આ વરસાદની અસર મુખ્યત્વે મધ્ય ગુજરાત, ઉત્તર ગુજરાત અને મધ્ય પ્રદેશની સરહદને અડીને આવેલા વિસ્તારોમાં વધુ રહેશે. જ્યારે સૌરાષ્ટ્ર અને કચ્છમાં માત્ર છૂટાછવાયા અને હળવા ઝાપટાં જ જોવા મળશે. આ સિવાય, 1 થી 6 સપ્ટેમ્બર દરમિયાન ફરીથી સાર્વત્રિક વરસાદની શક્યતા છે, જે દર્શાવે છે કે આગામી સમયમાં પણ વરસાદનો માહોલ જળવાઈ રહેશે.
