અમેરિકા માં એક પાટીદાર નું નિધન

અમેરિકાના એટલાન્ટા ઇમિગ્રેશન મામલે અટકાયતમાં લેવામાં આવેલા અતુલકુમાર બાબુભાઇ પટેલ (ઉંમર 58 વર્ષ) નું મંગળવારે મોત થયું હતું. શ્વાસ લેવામાં મુશ્કેલી બાદ અતુલ પટેલને હોસ્પિટલમાં ખસેડાયા હતાં જ્યાં તેમનું સારવાર દરમિયાન મોત થયું હતું.
ઇમિગ્રેશન એન્ડ કસ્ટમ્સ એન્ફોર્સમેન્ટના અધિકારીઓના જણાવ્યા અનુસાર અતુલ પટેલ ગત 10 મે ના રોજ ક્વિટોથી એટલાન્ટા એરપોર્ટ આવ્યા હતાં અને તેમની પાસે જરૂરી ઇમિગ્રેશન દસ્તાવેજો ન હોવાને કારણે તેમની અટકાયત કરવામાં આવી હતી. અતુલ પટેલને અટકાયત દરમિયાન હાઇ બ્લડ પ્રેશન અને ડાયાબિટિશ હોવાનું જણાયુ હતું અને તેઓને બે દિવસ સુધી કસ્ટડીમાં રખાયા બાદ મેડિકલ ચેકઅપ દરમિયાન તબિયત નાદુરસ્ત લાગતા હોસ્પિટલ ખસેડાયા હતાં. જ્યાં મંગળવારે બપોરે તેમનું મોત થયું હતું.
અત્રે ઉલ્લેખનીય છે કે એટલાન્ટામાં ભારતીય કોન્સ્યુલટ જનરલની મદદથી શ્રી શક્તિ મંદિર અને સ્થાનિક સમુદાયના સભ્યો દ્વારા અતુલપટેલની અંતિમવિધિની વ્યવસ્થા કરાઈ છે.