T20 વર્લ્ડ કપ 2026: અમદાવાદમાં રવિવારે ભારત-દક્ષિણ આફ્રિકા વચ્ચે સુપર-8નો મહાજંગ, બંને ટીમો હજુ સુધી અજય
વિશ્વભરના ક્રિકેટ ચાહકો જેની આતુરતાથી રાહ જોઈ રહ્યા હતા તે ઘડી આવી ગઈ છે. ICC મેન્સ T20 વર્લ્ડ કપ 2026ના સુપર-8 રાઉન્ડમાં રવિવાર, 22 ફેબ્રુઆરીના રોજ ક્રિકેટ જગતની બે દિગ્ગજ ટીમો, ભારત અને દક્ષિણ આફ્રિકા વચ્ચે અમદાવાદના નરેન્દ્ર મોદી સ્ટેડિયમમાં હાઈ-વોલ્ટેજ મુકાબલો રમાશે. આ મેચ ટુર્નામેન્ટની સૌથી રોમાંચક મેચોમાંની એક સાબિત થઈ શકે છે કારણ કે બંને ટીમો અત્યાર સુધી અજય રહી છે.
વિજય રથ પર સવાર ભારત: સૂર્યાની સેના તૈયાર
ભારતીય ટીમ અત્યારે પ્રચંડ ફોર્મમાં છે. સુકાની સૂર્યકુમાર યાદવના નેતૃત્વમાં ટીમે ગ્રુપ સ્ટેજમાં શાનદાર રમતનું પ્રદર્શન કર્યું છે. મધ્યક્રમમાં સૂર્યાની વિસ્ફોટક બેટિંગ અને હાર્દિક પંડ્યાની ઓલરાઉન્ડ ક્ષમતા ટીમને મજબૂતી આપી રહી છે. ખાસ કરીને યુવા ખેલાડીઓ જેવા કે અભિષેક શર્મા અને તિલક વર્માએ જે રીતે પોતાની જવાબદારી નિભાવી છે, તેનાથી ભારતીય બેટિંગ લાઈનઅપ વધુ આક્રમક દેખાઈ રહી છે.
બોલિંગ વિભાગમાં જસપ્રિત બુમરાહ અને અર્શદીપ સિંહની જોડી પાવરપ્લે અને ડેથ ઓવરોમાં વિરોધી બેટ્સમેનો માટે માથાનો દુખાવો બની રહી છે. અમદાવાદની પિચ સ્પિનરોને પણ મદદરૂપ થતી હોય છે, તેવામાં કુલદીપ યાદવ અને વરુણ ચક્રવર્તીની ‘મિસ્ટ્રી’ સ્પિન દક્ષિણ આફ્રિકાના બેટ્સમેનોને જાળમાં ફસાવી શકે છે.
દક્ષિણ આફ્રિકા: બદલાની ભાવના અને મજબૂત મનોબળ
બીજી તરફ, એડન માર્કરામની દક્ષિણ આફ્રિકાની ટીમ પણ અજેય રહીને સુપર-8માં પહોંચી છે. દક્ષિણ આફ્રિકા પાસે ક્વિન્ટન ડી કોક અને ડેવિડ મિલર જેવા અનુભવી પાવર-હિટર્સ છે, જે એકલા હાથે મેચનું પાસું પલટી શકે છે.
ઉલ્લેખનીય છે કે 2024ના T20 વર્લ્ડ કપની ફાઈનલમાં ભારત સામે થયેલી હારનો બદલો લેવા દક્ષિણ આફ્રિકા મેદાને ઉતરશે. કાગીસો રબાડાની આગેવાની હેઠળનું પેસ આક્રમણ ભારતીય ટોપ-ઓર્ડર માટે પડકારરૂપ બની રહેશે. કેશવ મહારાજની ચોકસાઈપૂર્વકની સ્પિન બોલિંગ વચ્ચેની ઓવરોમાં રન ગતિ રોકવામાં નિર્ણાયક ભૂમિકા ભજવશે.
અમદાવાદનું મેદાન: ભારતનો ગઢ
ભારતીય ટીમ માટે અમદાવાદ હોમ ગ્રાઉન્ડ જેવું છે. છેલ્લી લીગ મેચ પણ અહીં રમાઈ હોવાથી ખેલાડીઓ પિચની વર્તણૂકથી સારી રીતે વાકેફ છે. 1.30 લાખથી વધુ પ્રેક્ષકોની ક્ષમતા ધરાવતું આ સ્ટેડિયમ જ્યારે ભારતીય ચાહકોથી ભરાઈ જશે, ત્યારે દક્ષિણ આફ્રિકા પર માનસિક દબાણ સર્જાવું સ્વાભાવિક છે.
મેચની વિગતો
મેચ: ભારત વિ. દક્ષિણ આફ્રિકા (સુપર-8)
સ્થળ: નરેન્દ્ર મોદી સ્ટેડિયમ, અમદાવાદ
સમય: સાંજે 7:00 કલાકે (ટોસ 6:30 કલાકે)
અન્ય મેચ: શ્રીલંકા વિ. ઇંગ્લેન્ડ (બપોરે 3:00 કલાકે, પલ્લેકેલે)
ભારતની સંભાવિત પ્લેઈંગ-11
સૂર્યકુમાર યાદવ (સુકાની), ઇશાન કિશન (વિકેટકીપર), અભિષેક શર્મા, તિલક વર્મા, હાર્દિક પંડ્યા, રિંકુ સિંહ, અક્ષર પટેલ, કુલદીપ યાદવ, જસપ્રિત બુમરાહ, અર્શદીપ સિંહ, અને મોહમ્મદ સિરાજ/વરુણ ચક્રવર્તી.
