Galaxy S26 Ultraનું ‘પ્રાઈવસી ડિસ્પ્લે’ ફીચર વાયરલ, હવે કોઈ ડોકિયું નહીં કરી શકે!
સ્માર્ટફોનની દુનિયામાં જ્યારે પણ ઈનોવેશનની વાત આવે છે, ત્યારે સેમસંગ અવારનવાર નવી ટેકનોલોજી સાથે મેદાન મારી લે છે. આ વખતે ચર્ચાનો વિષય બન્યો છે આગામી Samsung Galaxy S26 Ultra. આ ફોનના એક ખાસ પ્રાઈવસી ફીચરની અત્યારથી જ એટલી વાહ-વાહી થઈ રહી છે કે ચાઈનીઝ ટેક જાયન્ટ કંપનીઓએ તેની ‘કોપી’ કરવાની તૈયારીઓ શરૂ કરી દીધી છે. પ્રાઈવસી પ્રેમીઓ માટે આ કોઈ વરદાનથી ઓછું નથી, કારણ કે હવે મેટ્રોમાં મુસાફરી કરતી વખતે કે કેફેમાં બેઠા હોવ ત્યારે બાજુમાં બેઠેલી વ્યક્તિ તમારા ફોનમાં ડોકિયું નહીં કરી શકે.
શું છે આ જાદુઈ ‘પ્રાઈવસી ડિસ્પ્લે’ ફીચર?
સામાન્ય રીતે આપણે આપણા ફોનની સ્ક્રીનને સુરક્ષિત રાખવા માટે બજારમાંથી અલગથી ‘પ્રાઈવસી સ્ક્રીન પ્રોટેક્ટર’ નંખાવતા હોઈએ છીએ. પરંતુ સેમસંગે આ સમસ્યાને મૂળમાંથી ખતમ કરવાનો નિર્ણય લીધો છે.
Galaxy S26 Ultra માં કંપની ઇન-બિલ્ટ પ્રાઈવસી ડિસ્પ્લે આપવા જઈ રહી છે. આ ફીચર વ્યુઈંગ એન્ગલને એટલો નેરો (સાંકડો) કરી દે છે કે સ્ક્રીન ફક્ત સામેથી જોનાર યુઝરને જ સ્પષ્ટ દેખાશે. જો કોઈ તમારી બાજુમાં બેસીને ત્રાસી નજરે તમારી સ્ક્રીન જોવાનો પ્રયત્ન કરશે, તો તેને ડિસ્પ્લે સંપૂર્ણપણે ડાર્ક અથવા બ્લેક દેખાશે.
સેમસંગે આ માટે ‘ફ્લેક્સ મેજિક પિક્સેલ’ (Flex Magic Pixel) નામના એક નવા OLED પેનલનો ઉપયોગ કર્યો છે. આ હાર્ડવેર લેવલ પર કામ કરે છે, જેનાથી પ્રાઈવસી અને ડિસ્પ્લે ક્વોલિટી બંનેનું સંતુલન જળવાઈ રહે છે.
ચાઈનીઝ કંપનીઓમાં ફફડાટ: આવી રહી છે ‘સ્પાય સ્ક્રીન’
સેમસંગના આ માસ્ટરસ્ટ્રોકને જોતા ચાઈનીઝ કંપનીઓ પણ હાથ જોડીને બેસી રહી નથી. રિપોર્ટ્સનું માનીએ તો ઘણી મોટી ચાઈનીઝ મોબાઈલ કંપનીઓ પોતાની ‘સ્પાય સ્ક્રીન’ (Spy Screen) ટેકનોલોજીનું ટેસ્ટિંગ કરી રહી છે.
ચાઈનીઝ સોશિયલ મીડિયા (Weibo) પર લીક થયેલી માહિતી મુજબ, આ ટેકનિક પણ હાર્ડવેર લેવલ પર આધારિત હશે. તેનો અર્થ એ કે ભવિષ્યમાં આવનારા ચાઈનીઝ ફ્લેગશિપ ફોન્સમાં પણ તમને કોઈ પ્રોટેક્ટર વગર પ્રાઈવસીનો અનુભવ મળશે.
સપ્ટેમ્બરમાં જોવા મળશે મોટો ફેરફાર?
એવું માનવામાં આવે છે કે આ વર્ષે સપ્ટેમ્બરની આસપાસ લોન્ચ થનારા ઘણા પ્રીમિયમ સ્માર્ટફોન્સમાં આ સ્પાય સ્ક્રીન ફીચર જોવા મળી શકે છે. અટકળો મુજબ આ મોડલ્સના નામ સૌથી આગળ છે:
-
Xiaomi 18 Series
-
Vivo X500 Series
-
OnePlus 16
-
Oppo Find X10 Series
-
iQOO 16 અને Honor Magic 10 Series
Apple પણ લાઈનમાં છે, પણ પ્લાન કંઈક અલગ છે
રસપ્રદ વાત એ છે કે માત્ર ચાઈનીઝ કંપનીઓ જ નહીં, પણ દિગ્ગજ કંપની એપલ પણ સેમસંગની આ પ્રાઈવસી ડિસ્પ્લે ટેકનોલોજીમાં રસ દાખવી રહી છે. જોકે, એપલનો પ્લાન થોડો અલગ છે.
સમાચાર મુજબ, એપલ આ પ્રાઈવસી ડિસ્પ્લેનો ઉપયોગ તરત જ આઈફોન (iPhone) માં નહીં કરે. તેના બદલે, કંપની તેને પોતાના MacBook લાઇનઅપ માટે સુરક્ષિત રાખી રહી છે. માનવામાં આવે છે કે પ્રાઈવસી ડિસ્પ્લેવાળું પ્રથમ મેકબુક 2029 સુધીમાં બજારમાં આવી શકે છે.
પ્રાઈવસી સ્ક્રીન પ્રોટેક્ટરનો આવશે અંત?
અત્યાર સુધી લોકો ₹200 થી ₹1000 ખર્ચીને પ્રાઈવસી ગાર્ડ નંખાવતા હતા, પરંતુ તેમાં બે મોટી ખામીઓ હતી:
-
ડિસ્પ્લેની બ્રાઈટનેસ ઓછી થઈ જતી હતી.
-
કલરની ચોકસાઈ (Accuracy) બગડી જતી હતી.
સેમસંગની ‘ફ્લેક્સ મેજિક પિક્સેલ’ ટેકનોલોજી આ બંને ખામીઓને દૂર કરે છે. આ ટેકનોલોજીથી યુઝરને શ્રેષ્ઠ બ્રાઈટનેસ મળશે અને પ્રાઈવસી બટન દબાવતા જ સ્ક્રીન ‘પ્રાઈવેટ મોડ’માં જતી રહેશે.
ભવિષ્યનું નવું સ્ટાન્ડર્ડ
સેમસંગ Galaxy S26 Ultra એ ફરી એકવાર સાબિત કરી દીધું છે કે તે મોબાઈલ ઈન્ડસ્ટ્રીનો ટ્રેન્ડસેટર છે. જે રીતે ફાસ્ટ ચાર્જિંગ અને બેઝલ-લેસ ડિસ્પ્લે સ્ટાન્ડર્ડ બની ગયા છે, આવનારા સમયમાં ‘પ્રાઈવસી ડિસ્પ્લે’ પણ દરેક પ્રીમિયમ ફોનની જરૂરિયાત બની જશે.
