વેરાવળ તાલુકાની સરકારી પ્રાથમિક શાળાઓ તમાકુમુક્ત બનાવવા ઝૂંબેશ, તમાકુ નિયંત્રણ અધિનિયમ ૨૦૦૩ની કડક અમલવારી

જિલ્લા પ્રાથમિક શિક્ષણાધિકારીના માર્ગદર્શન હેઠળ ડ્રાઈવ, તમાકુ સેવન કરતા શિક્ષકો પાસેથી દંડ વસૂલાત

ગિર સોમનાથ જિલ્લા પ્રાથમિક શિક્ષણાધિકારી અશોકભાઈ પટેલના માર્ગદર્શન હેઠળ વેરાવળ તાલુકાની સરકારી પ્રાથમિક શાળાઓમાં તમાકુ નિયંત્રણ અધિનિયમ-૨૦૦૩ની કડક અમલવારી માટે વિશેષ ઝુંબેશ શરૂ કરવામાં આવી છે. તાલુકા પ્રાથમિક શિક્ષણાધિકારી હરદાસભાઈ નંદાણીયા દ્વારા શાળાઓમાં તમાકુની બનાવટો પર સંપૂર્ણ પ્રતિબંધ મૂકવા અને શૈક્ષણિક સંકુલોને વ્યસનમુક્ત બનાવવા માટે આકરા પગલાં લેવામાં આવી રહ્યા છે. આ મુહિમનો મુખ્ય હેતુ બાળકો અને શિક્ષકોના સ્વાસ્થ્યનું રક્ષણ કરવાનો છે.

શાળાઓમાં સરપ્રાઈઝ ચેકિંગ: વ્યસન કરતા શિક્ષકો સામે કાયદાકીય કાર્યવાહી

તાલુકા પ્રાથમિક શિક્ષણાધિકારી દ્વારા વિવિધ શાળાઓમાં અચાનક મુલાકાત (ડ્રાઈવ) લેવામાં આવી હતી. આ તપાસ દરમિયાન તમાકુનું સેવન કરતા મળી આવેલા ૧૦ જેટલા શિક્ષકો પાસેથી સ્થળ પર જ દંડ વસૂલવામાં આવ્યો હતો. પ્રત્યેક શિક્ષક પાસેથી ૨૦૦ રૂપિયા લેખે કુલ ૨૦૦૦ રૂપિયાનો દંડ વસૂલી તેમને ભવિષ્યમાં વ્યસનથી દૂર રહેવા માટે કડક શબ્દોમાં તાકીદ કરવામાં આવી હતી. આ કાર્યવાહીથી શિક્ષણ જગતમાં ફફડાટ વ્યાપી ગયો છે.

આચાર્યો અને શિક્ષક સંઘ સાથે બેઠક: વ્યસનમુક્તિની ઘડાઈ રૂપરેખા

આ ઝુંબેશને વધુ વેગ આપવા માટે પે.સે. શાળાના આચાર્યો અને શિક્ષક સંઘના પ્રતિનિધિઓ અનિલ પંપાણીયા, દિનેશ મઘા અને દિલીપ વાળાની ઉપસ્થિતિમાં એક મહત્વની બેઠક યોજવામાં આવી હતી. આ બેઠકમાં શાળાઓને તમાકુમુક્ત રાખવા માટેની વિસ્તૃત રૂપરેખા તૈયાર કરવામાં આવી હતી. સી.આર.સી. અને સી.ઓ.ને પણ નિયમિતપણે શાળાઓની મુલાકાત લઈ તમાકુ નિયંત્રણ કાયદાનું પાલન સુનિશ્ચિત કરવા આદેશો આપવામાં આવ્યા છે.