Tata ની EV છે તો ટેન્શન ખતમ: હવે ઘરે બેઠા ચાર્જ થશે તમારી કાર, જાણો કેવી રીતે
ભારતની સૌથી મોટી ઇલેક્ટ્રિક કાર ઉત્પાદક કંપની ટાટા મોટર્સની પાંખ Tata.ev એ Hopcharge સાથે વ્યૂહાત્મક ભાગીદારી કરી છે. આ ભાગીદારી હેઠળ નેશનલ કેપિટલ રીજન (NCR) માં ‘ઓન-ડિમાન્ડ મોબાઈલ EV ચાર્જિંગ’ સેવા શરૂ કરવામાં આવી છે. આ સુવિધા એવા લોકો માટે વરદાન સાબિત થશે જેમના ઘરે પર્સનલ ચાર્જિંગ પોઈન્ટ અથવા પાર્કિંગની પૂરતી સુવિધા નથી.
મોબાઈલ વાન દ્વારા ઓન-સાઈટ ચાર્જિંગ
આ નવી સેવા હેઠળ, ટાટા ઇલેક્ટ્રિક કારના માલિકો એક ડેડિકેટેડ પ્લેટફોર્મ અથવા એપ દ્વારા પોતાનું ચાર્જિંગ સેશન શેડ્યૂલ કરી શકશે. એકવાર સેશન બુક થઈ ગયા પછી, Hopcharge ની ખાસ સજ્જ મોબાઈલ ચાર્જિંગ વાન ગ્રાહકના લોકેશન પર પહોંચશે અને સ્થળ પર જ વાહનને ચાર્જ કરી આપશે. આનાથી ગ્રાહકોના સમય અને મહેનત બંનેની બચત થશે.
ટાટા મોટર્સે લિંક્ડઈન (LinkedIn) પર આ પહેલ વિશે માહિતી આપતા જણાવ્યું હતું કે, “NCR માં ઓન-ડિમાન્ડ ચાર્જિંગ વાન એવા ગ્રાહકો માટે શ્રેષ્ઠ વિકલ્પ છે જેમના રહેઠાણે હોમ ચાર્જર લગાવવાની જગ્યા નથી. આ સુવિધા ઈલેક્ટ્રિક વાહનોના વપરાશને વધુ સરળ બનાવશે.”
મફત ડોરસ્ટેપ ચાર્જિંગનો લાભ
ટાટા મોટર્સ આ નવી સેવાની લોકપ્રિયતા વધારવા માટે ખાસ ઓફર પણ આપી રહી છે. પ્રોમોશનલ પ્રોગ્રામ હેઠળ, નવા ટાટા ઈલેક્ટ્રિક વાહન ખરીદનારા ગ્રાહકોને મર્યાદિત સમય માટે ફ્રી ડોરસ્ટેપ ચાર્જિંગનો લાભ મળી શકે છે. જોકે, આ ઓફર કેટલીક શરતોને આધીન રહેશે. વધુ માહિતી માટે ગ્રાહકો તેમના નજીકના Tata.ev ડીલરશીપનો સંપર્ક કરી શકે છે.
શહેરી વિસ્તારોમાં EV ક્રાંતિ
ભારતના મોટા શહેરોમાં ઈલેક્ટ્રિક વાહનોના માર્ગમાં સૌથી મોટો અવરોધ ચાર્જિંગ ઈન્ફ્રાસ્ટ્રક્ચરની અછત છે. ખાસ કરીને એપાર્ટમેન્ટ્સમાં રહેતા લોકો માટે કાર ચાર્જ કરવી મુશ્કેલ હોય છે. આ સમસ્યાના ઉકેલ રૂપે મોબાઈલ ચાર્જિંગ વાન એક અસરકારક વિકલ્પ તરીકે ઉભરી આવી છે.
Hopcharge જેવી કંપનીઓ આ ક્ષેત્રમાં નિષ્ણાત છે, જે વાહનોને ઝડપી અને સુરક્ષિત રીતે ગમે ત્યાં ચાર્જ કરવાની ક્ષમતા ધરાવે છે. ટાટાની આ પહેલથી ભારતમાં ઇલેક્ટ્રિક વાહનો પ્રત્યે લોકોનો વિશ્વાસ વધશે અને પ્રદૂષણ મુક્ત પરિવહનને વેગ મળશે.
