દુર્લભયોગ: 558 વર્ષ પછી શ્રાવણમાં ગુરુ, શનિ અને રાહુ-કેતુ એકસાથે વક્રી છે

હિંદુ કેલેન્ડર પ્રમાણે આજથી શ્રાવણ મહિનો શરૂ થઇ રહ્યો છે. આ મહિનો 3 ઓગસ્ટ સુધી રહેશે. આ વર્ષે શ્રાવણ મહિનામાં ગુરુ, શનિ, રાહુ અને કેતુ ચારેય ગ્રહણ એકસાથે વક્રી રહેશે. 2020 પહેલાં આવો યોગ 558 વર્ષ પહેલાં 1462માં બન્યો હતો. સોમવારથી શરૂ અને સોમવારે જ પૂર્ણ થવાથી આ મહિનાનું મહત્ત્વ વધી ગયું છે. ઉત્તર ભારત અને દક્ષિણ ભારતના પંચાંગમાં ભેદ પણ છે. દક્ષિણ ભારત, મહારાષ્ટ્ર અને ગુજરાતમાં 21 જુલાઈથી શ્રાવણ શરૂ અને 19 ઓગસ્ટે પૂર્ણ થશે. જ્યાં ઉત્તર ભારતનું પંચાંગ પ્રચલિત છે, ત્યાં 6 જુલાઈથી 3 ઓગસ્ટ સુધી શ્રાવણ રહેશે. 558 વર્ષ પહેલાં 1462માં પણ ગુરુ, શનિ, રાહુ-કેતુ એક સાથે વક્રી હતાં અને શ્રાવણ આવ્યો હતો. ગુરુ સ્વયંની રાશિ ધનમાં વક્રી, શનિ પોતાની રાશિ મકરમાં વક્રી, રાહુ મિથુનમાં અને કેતુ ધન રાશિમાં વક્રી હતો. આવો જ યોગ 2020માં પણ બન્યો છે. તે સમયે શ્રાવણ 21 જૂનથી 20 જુલાઈ 1462 સુધી હતો. શ્રાવણ મહિનામાં સતત વરસાદ થાય છે. જેના કારણે અનેક પ્રકારના નાના-નાના જીવની ઉત્પત્તિ થાય છે. અનેક પ્રકારના ઝેરી ઘાસ અને વનસ્પતિ ઉગે છે. જ્યારે દૂધ આપતાં પશુઓ આ ઘાસ અને વનસ્પતિને ખાય છે ત્યારે પશુઓનું દૂધ વિષ સમાન થઇ જાય છે. આવા કાચા દૂધને પીવાથી આપણા સ્વાસ્થ્યને નુકસાન થઇ શકે છે. એટલે, આ મહિનામાં કાચા દૂધના સેવનથી બચવું જોઇએ. શિવજીએ વિષપાન કર્યું હતું, જેના કારણે શ્રાવણ મહિનામાં શિવલિંગનો દૂધથી અભિષેક કરવામાં આવે છે.