દક્ષિણ જાપાનમાં પૂરપ્રકોપ: સેંકડો લોકોનું સ્થળાંતર ચાર વ્યક્તિનાં મોત.

દક્ષિણ જાપાનમાં આવેલા પૂરપ્રકોપ બાદ રઝળી ગયેલા લોકોની વહારે ધાવા માટે સૈનિકો ગુરુવારે કાર્યરત હતા. ચાર જણ મૃત્યુ પામ્યા હોવાનું કહેવાય છે તેમ જ ૧૧ લાપતા છે. રહેઠાણો, માર્ગો તથા ચોખાની ખેતી પર મુશળધાર વરસાદ અને જળબંબોળની અત્યંત માઠી અસર પડી છે. આ સપ્તાહના આરંભે નન્માડોલ ઝંઝાવાત ત્રાટ્ક્યા બાદ દક્ષિણ ક્યૂશુ ટાપુમાં બારે મેઘ ખાંગા થઈને વરસે એવી શક્યતા છે. સેંકડો લોકોને ઉચાળા ભરીને નાસી જવું પડ્યું હતું. આ ટાપુ પર ફૂકુઓકાના સત્તાવાળાઓએ કહ્યું કે ચાર જણને ઈજા થઈ હતી. રાષ્ટ્રીય પ્રસારક એનએચકેનો અહેવાલ હતો કે પડોશના ઓઈટા પ્રાંતમાં એક વ્યક્તિનું મોત નીપજ્યું હતું. જોકે આ અંગે તાબડતોબ વિસ્તૃત માહિતી મળી ન હતી. પોલીસે કહ્યું હતું કે ૯૩ વર્ષની અન્ય એક વ્યક્તિ પાણીમાં તણાઈ ગઈ હોવાનું માનવામાં આવે છે. હિરોશીમાના અસાકીટા પ્રાંતમાંથી બુધવારે તેનો મૃતદેહ મળી આવ્યો હતો. તે હોન્શૂ ટાપુ પર આવેલો વિસ્તાર છે. સીધાં ચઢાણ ધરાવતા પહાડી ઢોળાવની આસપાસ રહેતા એક જણના ઘર પર ભેખડ આવી હોવા છતાં તે આબાદ બચી ગયો હતો. મુશળધાર વર્ષાને લીધે નદીઓ બંને કાંઠે છલકાતા ડાંગરના ખેતરમાં તેમ જ ઘણા રહેઠાણોમાં પૂરનાં પાણી ફરી વળ્યાં હતાં. વાહનો નદીમાં તણાયા હતા તેમ જ ડઝનબંધ ઈમારતો, માર્ગો અને પુલ નાશ પામ્યા હતા. બહાદુર સૈનિકો પૂરના પાણી વચ્ચે માર્ગ કાઢીને જઈ રહ્યા હતા. લાચાર લોકો અને મોટી ઉંમરના માણસોને સલામત સ્થળે ખસેડી રહ્યા હતા. નૌકાઓેને હલેસાં મારીને ઓઈટા ખાતે જાંબાઝ સૈનિકોએ રાહત અને બચાવ કામગીરી આદરી હતી. જાપાનની વેધશાળા સંસ્થાએ કહ્યું કે ફૂકુઓકા અને ઓઈટામાં અભૂતપૂર્વ વરસાદ વરસ્યો છે.