મહિલા T20માં અમેલિયા કરનો ઇતિહાસ: એકલી ખેલાડી સામે હારી ગઈ આખી દક્ષિણ આફ્રિકાની ટીમ
મહિલા ટી20 ઇન્ટરનેશનલ ક્રિકેટમાં એક અદ્ભુત અને વિરલ કિસ્સો જોવા મળ્યો છે, જ્યાં એક ખેલાડીના વ્યક્તિગત સ્કોરને પણ આખી વિરોધી ટીમ પાર કરી શકી નથી. ન્યૂઝીલેન્ડ અને દક્ષિણ આફ્રિકા વચ્ચે રમાયેલી પાંચમી ટી20 મેચમાં કિવી ઓલરાઉન્ડર અમેલિયા કરે એવી તોફાની બેટિંગ કરી કે આખી મેચ એકતરફી બની ગઈ હતી. અમેલિયાની સદીના જોરે ન્યૂઝીલેન્ડે દક્ષિણ આફ્રિકાને કારમી હાર આપી છે.
અમેલિયા કરની વિસ્ફોટક સદી
શ્રેણીની છેલ્લી મેચમાં ન્યૂઝીલેન્ડે પ્રથમ બેટિંગ કરતા 20 ઓવરમાં 6 વિકેટ ગુમાવીને 194 રનનો વિશાળ સ્કોર બનાવ્યો હતો. ટીમની શરૂઆત નબળી રહી હતી અને વહેલી વિકેટ પડી ગઈ હતી, પરંતુ ત્રીજા નંબરે આવેલી અમેલિયા કરે મેદાન ચારેબાજુ રનનો વરસાદ કર્યો હતો. તેણે માત્ર 55 બોલમાં 105 રનની શાનદાર ઈનિંગ રમી હતી, જેમાં 19 ચોગ્ગા અને 1 આકર્ષક છગ્ગાનો સમાવેશ થાય છે. અમેલિયા છેલ્લી ઓવરમાં આઉટ થઈ હતી, પરંતુ ત્યાં સુધીમાં તેણે ટીમને મજબૂત સ્થિતિમાં પહોંચાડી દીધી હતી.
દક્ષિણ આફ્રિકાની ટીમનો ધબડકો
195 રનના લક્ષ્યાંકનો પીછો કરવા ઉતરેલી દક્ષિણ આફ્રિકાની ટીમ ન્યૂઝીલેન્ડના બોલરો સામે લાચાર જણાઈ હતી. આખી ટીમ 20 ઓવર રમ્યા બાદ 9 વિકેટના નુકસાન પર માત્ર 102 રન જ બનાવી શકી હતી. આશ્ચર્યની વાત એ છે કે દક્ષિણ આફ્રિકાની આખી ટીમ મળીને પણ એટલા રન ન કરી શકી જેટલા એકલા અમેલિયા કરે (105 રન) બનાવ્યા હતા. ટેકનિકલી રીતે જોઈએ તો દક્ષિણ આફ્રિકાની ટીમ અમેલિયા કરના વ્યક્તિગત સ્કોર સામે પણ 3 રનથી હારી ગઈ હતી.
ન્યૂઝીલેન્ડની 92 રને ભવ્ય જીત
આ શાનદાર પ્રદર્શનના જોરે ન્યૂઝીલેન્ડની મહિલા ટીમે આ મેચ 92 રનના મોટા અંતરથી જીતી લીધી હતી. અમેલિયા કરે આ ઇનિંગ સાથે ન્યૂઝીલેન્ડની મહિલા કેપ્ટન તરીકે ટી20 ઇન્ટરનેશનલમાં સર્વોચ્ચ વ્યક્તિગત સ્કોરનો રેકોર્ડ પણ પોતાના નામે કર્યો છે. આ જીત સાથે જ આ શ્રેણીનો પણ સુખદ અંત આવ્યો છે, જેમાં અમેલિયા કર ‘પ્લેયર ઓફ ધ મેચ’ તરીકે ઉભરી આવી છે.
