નવજીવન: કોરોનામાં બંને ફેફસાં ગુમાવી ચૂકેલી યુવતીનું સફળ ડબલ લંગ ટ્રાન્સપ્લાન્ટ કરાયું

શિકાગોમાં નોર્થવેસ્ટર્ન મેમોરિયલ હોસ્પિટલમાં દાખલ થયેલી 28 વર્ષીય માયરા રામિરેઝે સાબિત કરી બતાવ્યું છે કે, કોરોનાનો ચેપ લાગ્યા પછી શરીરમાં ગમે તેટલી સમસ્યાઓ ઊભી થઈ હોય પરંતુ જુસ્સા અને હિંમતથી આ રોગને પણ હરાવી શકાય છે. માયરા કોવિડ-19ને કારણે ડબલ લંગ ટ્રાન્સપ્લાન્ટ સર્જરી કરાવનારી અમેરિકાની પહેલી દર્દી છે. કોરોના વાઇરસનો ચેપ લાગ્યા બાદ માયરાના ફેફસાંમાં બેક્ટેરિયલ ઇન્ફેક્શન થઈ ગયું હતું અને ફેફસાં એટલાં ડેમેજ થઈ ગયાં હતાં કે તેની બચવાની આશા બહુ ઓછી હતી અને તેનું જીવન બચાવવાનો એકમાત્ર રસ્તો લંગ ટ્રાન્સપ્લાન્ટ હતો. માયરાનું જીવન બચાવવાનો પ્રયત્ન મૂળ ભારતના ડોક્ટર અંકિત ભરતે કર્યો. સર્જરી સફળતાપૂર્વક પૂર્ણ થઈ અને તેમણે આ કોરોના પેશન્ટને નવજીવન આપ્યું. કોરોના વાઇરસ અંગે મગજમાં એવી ધારણા ઘર કરી ગઈ છે કે યુવાનોને આ રોગ થાય તો તેમણે ગભરાવવાની જરૂર નથી. પરંતુ 28 વર્ષની માયરા જ્યારે આ રોગમાં સપડાઈ ત્યારે તેને મોતના મુખમાંથી પાછી લાવવામાં આવી છે, જે ખરેખર દરેક યુવાનની આંખ ખોલે એવો કિસ્સો છે. બીમાર પડતાં પહેલાં માયરા ઘરેથી ઓફિસનું કામ કરતી હતી. કરિયાણાનો સામાન પણ ઘરે જ ડિલિવર કરાવી રહી હતી. તે સ્વસ્થ હતી. પરંતુ તેમને ન્યુરોમાયલિટિસ ઓપ્ટિકની સમસ્યા હતી. તેની દવા રોગપ્રતિકારક શક્તિને દબાવતી હતી. આ કારણોસર તેની પર કોરોના વાઇરસનું જોખમ વધી ગયું. માયરા કહે છે કે, મને લાગે છે કે મારી પાસે હેતુ છે. મારો હેતુ એવા લોકોને મદદ કરશે જે લોકો આ જ પરિસ્થિતિમાંથી પસાર થઈ રહ્યા છે, જેમાંથી હું પસાર થઈ ચૂકી છું. મારી સાથે જે થયું એ હું શેર કરીનેબીજા લોકોની મદદ કરવા માગું છું. જો આવું મારી સાથે થઈ શકે છે તો તે તમારી સાથે પણ થઈ શકે છે. તમારી જાતને અને તમારી આસપાસના અન્ય લોકોને પણ વધુ સુરક્ષિત રાખો. તેમને પ્રોત્સાહન આપો. વિશ્વભરના અન્ય સેન્ટર્સને હું એક જ સંદેશ આપવા માગું છું કે લંગ ટ્રાન્સપ્લાન્ટ પણ કોવિડ-19ના દર્દીઓ માટે એક રસ્તો છે.