ODI વર્લ્ડ કપ 2027: એપ્રિલથી શરૂ થશે જંગ, યજમાન નામિબિયાના ભાગ્યનો થશે ફેંસલો
વર્લ્ડ કપ 2027ના આયોજનને હવે ગણતરીના મહિનાઓ બાકી છે, ત્યારે કઈ ટીમો આ પ્રતિષ્ઠિત ટુર્નામેન્ટમાં રમશે તેના પર સૌની નજર ટકેલી છે. ખાસ કરીને આ વખતે યજમાન દેશોમાંનો એક એવો ‘નામિબિયા’ મુશ્કેલીમાં મુકાયું હોય તેવું લાગી રહ્યું છે. આગામી સમયમાં રમાનારા ક્વોલિફાયર રાઉન્ડના મેચો નામિબિયાનું ભવિષ્ય નક્કી કરશે.
યજમાન હોવા છતાં નામિબિયા માટે કેમ કપરા ચઢાણ?
વર્ષ 2027નો વનડે વર્લ્ડ કપ દક્ષિણ આફ્રિકા, ઝિમ્બાબ્વે અને નામિબિયા એમ ત્રણ દેશોમાં સંયુક્ત રીતે યોજાવાનો છે. આ ટુર્નામેન્ટમાં કુલ 14 ટીમો ભાગ લેશે. નિયમ મુજબ, દક્ષિણ આફ્રિકા અને ઝિમ્બાબ્વે ICCના ફૂલ મેમ્બર હોવાથી અને યજમાન હોવાથી સીધા ક્વોલિફાય થઈ ગયા છે. જોકે, નામિબિયા ‘એસોસિયેટ દેશ’ હોવાથી તેણે મેદાનમાં ઉતરીને પોતાની ક્ષમતા સાબિત કરવી પડશે અને ક્વોલિફાયર રાઉન્ડ જીતવો પડશે.
2 એપ્રિલથી ક્વોલિફાયર રાઉન્ડનો પ્રારંભ
વર્લ્ડ કપ 2027 માટેની ક્વોલિફાયર પ્રક્રિયા 2023થી જ શરૂ થઈ ગઈ હતી, જે માર્ચ 2027 સુધી ચાલશે. હાલમાં ‘લીગ-2’ અંતર્ગત નેપાળ, નામિબિયા, નેધરલેન્ડ, યુએઈ, કેનેડા, સ્કોટલેન્ડ, ઓમાન અને અમેરિકા જેવી ટીમો વચ્ચે સ્પર્ધા ચાલી રહી છે. આ શ્રેણીનો આગામી તબક્કો 2 એપ્રિલથી શરૂ થઈ રહ્યો છે, જેમાં પ્રથમ દિવસે સ્કોટલેન્ડ અને ઓમાન વચ્ચે ટક્કર થશે.
નામિબિયાના મહત્વના મુકાબલાઓ
નામિબિયા માટે એપ્રિલ મહિનો અત્યંત નિર્ણાયક સાબિત થશે. કાર્યક્રમ મુજબ:
- 4 એપ્રિલ: નામિબિયા વિરુદ્ધ ઓમાન
- 6 એપ્રિલ: નામિબિયા વિરુદ્ધ સ્કોટલેન્ડ
- 12 એપ્રિલ: ફરી એકવાર નામિબિયા અને સ્કોટલેન્ડ સામસામે ટકરાશે.
પોતાના ઘરઆંગણે વર્લ્ડ કપ રમાવાનો હોવા છતાં જો નામિબિયાની ટીમ ક્વોલિફાય ન થઈ શકે, તો તે ક્રિકેટ ચાહકો માટે નિરાશાજનક સમાચાર હશે.
પોઈન્ટ ટેબલમાં નામિબિયાની સ્થિતિ ચિંતાજનક
વર્તમાન પોઈન્ટ ટેબલ પર નજર કરીએ તો નામિબિયાની હાલત ઘણી નબળી છે. કુલ 8 ટીમોની યાદીમાં નામિબિયા અત્યારે છઠ્ઠા ક્રમે છે. આ યાદીમાં અમેરિકા (USA) પ્રથમ ક્રમે અને સ્કોટલેન્ડ બીજા ક્રમે મજબૂત સ્થિતિમાં છે. નામિબિયાએ જો વર્લ્ડ કપની ટિકિટ મેળવવી હોય, તો એપ્રિલમાં રમાનારી તમામ મેચોમાં શાનદાર પ્રદર્શન કરી પોઈન્ટ ટેબલમાં ઉપર આવવું પડશે.
