IPL 2026: ધોનીની ગેરહાજરીમાં CSKની હાલત કફોડી, રાજસ્થાનના બોલરોએ મચાવ્યો કહેર!
IPL 2026 માં ચેન્નાઈ સુપર કિંગ્સ (CSK) ની શરૂઆત ખૂબ જ આઘાતજનક રહી છે. રિતુરાજ ગાયકવાડ, સંજુ સેમસન અને આયુષ મ્હાત્રે જેવા દિગ્ગજ બેટ્સમેનોથી સજ્જ ચેન્નાઈનું ટોપ ઓર્ડર રાજસ્થાન રોયલ્સના બોલરો સામે પત્તાના મહેલની જેમ વિખેરાઈ ગયું હતું. મહેન્દ્ર સિંહ ધોનીની ગેરહાજરીમાં ટીમની બેટિંગમાં જે મજબૂતી હોવી જોઈતી હતી, તે ક્યાંય જોવા મળી નહોતી. રાજસ્થાનના તેજ બોલરો સામે ચેન્નાઈના બેટ્સમેનોએ એટલું ખરાબ પ્રદર્શન કર્યું કે છેલ્લા 15 વર્ષમાં ચોથી વખત ટીમની આવી હાલત થઈ છે.
ટોપ-4 બેટ્સમેનો માત્ર 14 રન જ બનાવી શક્યા
ગુવાહાટીની ફાસ્ટ પિચ પર ચેન્નાઈના શરૂઆતના ચાર બેટ્સમેનો સંપૂર્ણપણે નિષ્ફળ રહ્યા હતા. વર્ષ 2011 પછી આ પહેલીવાર બન્યું છે જ્યારે CSK ના ટોપ-4 બેટ્સમેનોએ મળીને માત્ર 14 રન જ જોડ્યા હોય. ટીમનો સ્કોર કાર્ડ જોઈએ તો, સંજુ સેમસન અને કેપ્ટન રિતુરાજ ગાયકવાડ માત્ર 6-6 રન બનાવી શક્યા હતા. યુવા ખેલાડી આયુષ મ્હાત્રે તો ખાતું પણ ખોલાવી શક્યો નહોતો અને મેથ્યુ શોર્ટ માત્ર 2 રન બનાવી આઉટ થયો હતો. અગાઉ 2011 માં પણ RCB સામે ચેન્નાઈના ટોપ ઓર્ડરે માત્ર 14 રન બનાવ્યા હતા, જ્યારે સૌથી ખરાબ આંકડો 2020 માં નોંધાયો હતો, જેમાં મુંબઈ સામે 4 બેટ્સમેનો માત્ર 3 રન બનાવી આઉટ થયા હતા.
બોલરો માટે સ્વર્ગ સમાન પિચ અને વાતાવરણ
ચેન્નાઈના બેટ્સમેનોની નિષ્ફળતા પાછળ ગુવાહાટીનું વાતાવરણ અને પિચ જવાબદાર માનવામાં આવે છે. મેચ પહેલા થયેલા વરસાદને કારણે પિચ પર ભેજ હતો, જેનો ભરપૂર ફાયદો રાજસ્થાનના નાન્દ્રે બર્ગર અને જોફ્રા આર્ચરે ઉઠાવ્યો હતો. પાવરપ્લેમાં જ બર્ગરે 2 અને આર્ચરે 1 વિકેટ ઝડપીને ચેન્નાઈની કમર તોડી નાખી હતી. સંદીપ શર્માએ પણ એક વિકેટ ઝડપીને દબાણ વધાર્યું હતું. બોલ એટલો સ્વિંગ થઈ રહ્યો હતો કે અનુભવી બેટ્સમેનો પણ ક્રિઝ પર ટકી શક્યા નહોતા.
Least runs Scored by all Top 4 CSK batters in an IPL match
3 runs v MI in 2020
(Ruturaj 0, Duplessis 1, Rayudu 2, Jagadeesan 0)
8 runs v MI in 2022
(Ruturaj 7, Conway 0, Moeen 1, Uthappa 0)
14 runs v RCB in 2011
(Hussey 4, Vijay 6, Raina 4, Badrinath 0)
14 runs v RR in 2026*… pic.twitter.com/etIO8OV5A1
— 𝑺𝒉𝒆𝒃𝒂𝒔 (@Shebas_10dulkar) March 30, 2026
રવિન્દ્ર જાડેજા અને બ્રિજેશ શર્માનો તરખાટ
પાવરપ્લે બાદ આશા હતી કે મિડલ ઓર્ડર બાજી સંભાળશે, પરંતુ રવિન્દ્ર જાડેજા અને બ્રિજેશ શર્માએ ચેન્નાઈની મુશ્કેલીઓ વધારી દીધી હતી. જાડેજાએ પોતાના પહેલા જ ઓવરમાં સરફરાઝ ખાન અને શિવમ દુબેને પેવેલિયન ભેગા કરી દીધા હતા. બીજી તરફ, બ્રિજેશ શર્માએ કાર્તિક શર્માને આઉટ કરીને IPL માં પોતાની પ્રથમ વિકેટ ઝડપી હતી. આમ, રાજસ્થાનના શિસ્તબદ્ધ બોલિંગ આક્રમણ સામે ચેન્નાઈની ટીમ લાચાર જોવા મળી હતી. ધોની વિનાની આ CSK ટીમ માટે આગામી મેચોમાં બેટિંગ ક્રમ સુધારવો એ મોટો પડકાર બની રહેશે.
