મોસાદને ભૂલી જાઓ, ઈઝરાયેલની આ યુનિટે ઈરાનમાં મચાવી અસલી તબાહી: કેવી રીતે ટોચના નેતાઓને કર્યા ટાર્ગેટ?
ઈઝરાયેલના કોઈપણ ગુપ્ત ઓપરેશનમાં સામાન્ય રીતે ‘મોસાદ’નું નામ સૌથી વધુ લેવામાં આવે છે, પરંતુ હાલમાં ઈરાન સાથેના જંગમાં ઈઝરાયેલની ‘યુનિટ-8200’ (Unit 8200) એ અસલી કોહરામ મચાવ્યો છે. આ કોઈ સામાન્ય જાસૂસી સંસ્થા નથી, પરંતુ ઈઝરાયેલ ડિફેન્સ ફોર્સ (IDF) ની અંદર કાર્યરત એક અત્યંત આધુનિક સાયબર અને ઈન્ટેલિજન્સ યુનિટ છે. અમેરિકન અખબાર ‘વોશિંગ્ટન પોસ્ટ’ના અહેવાલ મુજબ, અયાતુલ્લા અલી ખામેનેઈ અને IRGC ચીફ મોહમ્મદ પાકપુર જેવા ઈરાનના દિગ્ગજ નેતાઓની હત્યામાં આ યુનિટની ભૂમિકા સૌથી મહત્વની રહી છે.
શું છે આ યુનિટ-8200?
ઈઝરાયેલમાં આ યુનિટને ‘શ્મોને મતાઈમ’ તરીકે ઓળખવામાં આવે છે. તેની સ્થાપના 1948માં કરવામાં આવી હતી. આ યુનિટ અમેરિકાની NSA અથવા બ્રિટનની GCHQ જેવી જ શક્તિશાળી માનવામાં આવે છે. તે ઈઝરાયેલ લશ્કરી દળની સૌથી મોટી શાખા છે, જેનો મુખ્ય હેતુ સેનાને સાયબર સુરક્ષા અને ગુપ્ત માહિતી પૂરી પાડવાનો છે. આ યુનિટના ઓપરેશન્સ એટલા ગુપ્ત હોય છે કે દુશ્મનને ખબર પડે તે પહેલા જ કામ તમામ થઈ જાય છે.
કેવી રીતે કરે છે શિકાર?
રિપોર્ટ અનુસાર, યુનિટ-8200 એ સાયબર એટેક, સીસીટીવી કેમેરા હેકિંગ અને સોશિયલ ઈન્ફોર્મેશનના આધારે ઈરાનના ટોચના 40 જેટલા નેતાઓને ટ્રેસ કર્યા અને તેમની હત્યા કરી છે. ઈરાનના સુપ્રીમ લીડર અલી ખામેનેઈના લોકેશનને પણ આ યુનિટે કેમેરા હેક કરીને જ શોધી કાઢ્યું હતું. ડેટા માઈનિંગ અને સિગ્નલ ઈન્ટેલિજન્સમાં આ યુનિટ એટલું માહિર છે કે તે દુશ્મનના મોબાઈલ કે કોમ્પ્યુટરમાં ઘૂસીને તેની પળેપળની હિલચાલ જાણી શકે છે.
યુવા એન્જિનિયરોનું સૈન્ય
આ યુનિટની સૌથી આશ્ચર્યજનક બાબત એ છે કે તેમાં કામ કરનારા મોટાભાગના સભ્યો 20 થી 25 વર્ષના યુવાનો હોય છે. આ યુવાન માઈન્ડ્સ ટેકનોલોજી અને કોડિંગમાં એટલા નિષ્ણાત હોય છે કે તેઓ વિશ્વની સૌથી સુરક્ષિત ગણાતી સિસ્ટમોને પણ તોડી શકે છે. તેઓ નાની-નાની ટુકડીઓમાં વહેંચાઈને કામ કરે છે જેથી ઓપરેશન દરમિયાન કોઈ મોટી ભૂલ ન થાય અને જાનહાનિનું જોખમ ઓછું રહે.
ઈરાન માટે જૂની માથાના દુખાવો
આ પહેલીવાર નથી જ્યારે યુનિટ-8200 એ ઈરાનને ઝટકો આપ્યો હોય. 2005 થી 2010 ની વચ્ચે ઈરાનના પરમાણુ કાર્યક્રમને ખોરવી નાખવા માટે જે સીક્રેટ ઓપરેશન ચલાવવામાં આવ્યું હતું, તેમાં પણ આ યુનિટનો મોટો હાથ હતો. તે સમયે ઈરાનના યુરેનિયમ સંવર્ધન કેન્દ્રોના સેન્ટ્રીફ્યુજને સાયબર એટેક દ્વારા નષ્ટ કરી દેવામાં આવ્યા હતા, જેનાથી ઈરાનનો પરમાણુ પ્લાન વર્ષો પાછળ ધકેલાઈ ગયો હતો.
આજની તારીખમાં ઈરાન માટે યુનિટ-8200 એક એવો અદ્રશ્ય દુશ્મન બની ગયો છે જેની સામે લડવા માટે તેમની પાસે કોઈ નક્કર રણનીતિ નથી.
