PAN કાર્ડ માટે નવા નિયમો અમલમાં આવ્યા: હવે માત્ર આધારથી કામ નહીં ચાલે; જાણો મોટા નાણાકીય વ્યવહારો પર કઈ મર્યાદા લાદવામાં આવી
કેન્દ્ર સરકાર અને આવકવેરા વિભાગ દ્વારા નાણાકીય પારદર્શિતા વધારવા અને ટેક્સ ચોરી રોકવા માટે ૧ એપ્રિલ, ૨૦૨૬થી PAN કાર્ડના નિયમોમાં ધરખમ સુધારા કરવામાં આવ્યા છે. આ નવા ફેરફારો માત્ર PAN કાર્ડ મેળવવાની પ્રક્રિયાને જ નહીં, પરંતુ તેના રોજિંદા ઉપયોગને પણ અસર કરશે.
૧. અરજી પ્રક્રિયામાં ફેરફાર: હવે કયા દસ્તાવેજો જોઈશે?
અત્યાર સુધી PAN કાર્ડ મેળવવા માટે માત્ર આધાર કાર્ડ એકમાત્ર પુરાવા તરીકે પૂરતું હતું. પરંતુ ૨ એપ્રિલ ૨૦૨૬ના રોજ અમલી બનેલા નવા નિયમો મુજબ, હવે તમારે વય અને ઓળખ સાબિત કરવા માટે વધારાના દસ્તાવેજો આપવા પડશે. આમાં નીચેનામાંથી કોઈપણ એક દસ્તાવેજ ફરજિયાત રહેશે:
-
જન્મ પ્રમાણપત્ર (Birth Certificate)
-
મતદાર ઓળખપત્ર (Voter ID)
-
પાસપોર્ટ અથવા ડ્રાઇવિંગ લાઇસન્સ
-
૧૦મા ધોરણની માર્કશીટ
-
મેજિસ્ટ્રેટ દ્વારા જાહેર કરાયેલ સોગંદનામું
વધુમાં, સરકાર ટૂંક સમયમાં જ નવા PAN અરજી ફોર્મ બહાર પાડવાની તૈયારી કરી રહી છે. હવે તમારા PAN કાર્ડ પરનું નામ અને આધાર કાર્ડ પરનું નામ અક્ષર-શ: એકસમાન હોવું જોઈએ, અન્યથા અરજી રદ થઈ શકે છે.
૨. બેંકિંગ વ્યવહારો પર નવી મર્યાદા
બેંકિંગ ક્ષેત્રે પણ PAN કાર્ડની અનિવાર્યતા બદલાઈ છે. જો કોઈ વ્યક્તિ એક વર્ષમાં બેંક ખાતામાં ₹૧૦ લાખ કે તેથી વધુ રકમ જમા કરાવે છે અથવા ઉપાડે છે, તો PAN કાર્ડ આપવું હવે ફરજિયાત રહેશે. અગાઉ આ મર્યાદા પ્રતિ દિવસ ₹૫૦,૦૦૦ જમા કરાવવા પર હતી, જે હવે વાર્ષિક વ્યવહારના આધારે વધુ કડક કરવામાં આવી છે.
૩. રિયલ એસ્ટેટ અને વાહન ખરીદીના નિયમો
મિલકતની ખરીદી કે વેચાણ કરતા લોકો માટે રાહતના સમાચાર છે કે PAN કાર્ડ આપવાની મર્યાદા ₹૧૦ લાખથી વધારીને ₹૨૦ લાખ કરવામાં આવી છે. એટલે કે ₹૨૦ લાખથી વધુના વ્યવહારમાં જ PAN કાર્ડની જરૂર પડશે. જોકે, વાહનોના કિસ્સામાં, જો વાહનની કિંમત ₹૫ લાખથી વધુ હશે, તો જ PAN કાર્ડ આપવું જરૂરી રહેશે.
૪. હોટલ બિલ અને લક્ઝરી ખર્ચ
મોજ-શોખ અને પ્રસંગો માટે રોકડ ખર્ચ કરનારાઓ માટે નિયમો કડક થયા છે. હવે હોટલ, રેસ્ટોરન્ટ અથવા કોઈપણ જાહેર કાર્યક્રમમાં જો તમે ₹૧ લાખથી વધુ નું રોકડ બિલ ચૂકવો છો (જે મર્યાદા પહેલા ₹૫૦,૦૦૦ હતી), તો PAN કાર્ડની વિગતો આપવી ફરજિયાત રહેશે. આ ફેરફાર મોટા પાયે થતા બિનહિસાબી વ્યવહારો પર દેખરેખ રાખવા માટે કરવામાં આવ્યો છે.
૫. વીમા પોલિસીમાં PAN અનિવાર્ય
વીમા ક્ષેત્રમાં સૌથી મોટો ફેરફાર એ છે કે હવે વીમા પ્રીમિયમની રકમ ગમે તેટલી હોય, પોલિસી લેતી વખતે શરૂઆતથી જ PAN કાર્ડ આપવું ફરજિયાત રહેશે. આ નિયમ રોકાણ અને સુરક્ષા બંને પ્રકારના વીમા પર લાગુ થશે.
ક્યાંથી કરવી અરજી?
તમે નવા PAN કાર્ડ માટે અથવા સુધારા-વધારા માટે નીચેની સત્તાવાર વેબસાઇટ્સનો ઉપયોગ કરી શકો છો:
-
પ્રોટીન ઈ-ગવ ટેક્નોલોજીસ (Protean eGov)
-
UTI ઈન્ફ્રાસ્ટ્રક્ચર ટેકનોલોજી એન્ડ સર્વિસીસ લિમિટેડ
-
આવકવેરા વિભાગની ઈ-ફાઇલિંગ વેબસાઇટ
આ નવા નિયમો PAN કાર્ડના ઉપયોગને વધુ પારદર્શક બનાવશે. જોકે શરૂઆતમાં દસ્તાવેજોના કારણે સામાન્ય જનતાને થોડી મુશ્કેલી પડી શકે છે, પરંતુ લાંબા ગાળે આનાથી મોટા નાણાકીય વ્યવહારોનું ટ્રેકિંગ સરળ બનશે અને અર્થતંત્રમાં કાળા નાણાં પર લગામ લાગશે.
