IPL 2026: આજે RR vs RCB જંગ, પણ શું વરસાદ વિલન બનશે? જાણો ગુવાહાટીના હવામાનનો મિજાજ
આઈપીએલ 2026માં આજે બે એવી ટીમો સામસામે ટકરાવાની છે જે અત્યાર સુધી આ સીઝનમાં એક પણ મેચ હારી નથી. એકતરફ વિરાટ કોહલીની RCB છે જેણે પોતાની બંને મેચ જીતી છે, તો બીજી તરફ સંજુ સોશિયલ મીડિયા પર ફેમસ રિયાન પરાગની આગેવાની હેઠળની રાજસ્થાન રોયલ્સ છે જેણે 3 મેચમાં વિજય મેળવ્યો છે. આ મેચ ગુવાહાટીના બરસાપારા સ્ટેડિયમમાં રમાવાની છે, પરંતુ ચાહકોના મનમાં ચિંતા એ છે કે શું અહીં ફરી વરસાદ રમત બગાડશે?
ગઈ મેચમાં વરસાદે પાડ્યો હતો ખલેલ
ગુવાહાટીના આ મેદાન પર અગાઉ રાજસ્થાન રોયલ્સ અને મુંબઈ ઈન્ડિયન્સ વચ્ચે મેચ રમાઈ હતી. તે સમયે સતત વરસાદને કારણે મેચ ઘણી મોડી શરૂ થઈ હતી. પરિણામે, મેચ ઓવરો ઘટાડીને માત્ર 11-11 ઓવરની જ રમાડવી પડી હતી, જેમાં રાજસ્થાને જીત મેળવી હતી. આથી જ ચાહકોને આજે પણ વરસાદનો ડર સતાવી રહ્યો છે.
કેવું રહેશે આજનું હવામાન?
હવામાન વિભાગના રિપોર્ટ અનુસાર, મેચ દરમિયાન ભારે વરસાદની શક્યતા ઓછી છે, પરંતુ બપોરના સમયે હળવો વરસાદ પડી શકે છે. જો મેચ દરમિયાન એક-બે વાર ઝાપટાં પડે અને રમત થોડીવાર અટકે તો નવાઈ નહીં. જોકે, આખી મેચ ધોવાઈ જાય તેવી શક્યતા ઓછી દેખાઈ રહી છે.
જો મેચ ધોવાઈ જાય તો પોઈન્ટ ટેબલ પર શું અસર થશે?
જો વરસાદને કારણે રમત શક્ય ન બને, તો બંને ટીમોને 1-1 પોઈન્ટ આપવામાં આવશે. આ સ્થિતિમાં રાજસ્થાનની ટીમ 7 પોઈન્ટ સાથે પોઈન્ટ ટેબલમાં ટોપ પર યથાવત રહેશે. બીજી તરફ, RCBના 5 પોઈન્ટ થઈ જશે અને સારા નેટ રન રેટના કારણે તે બીજા નંબર પર પહોંચી શકે છે.
હેડ-ટુ-હેડ: કોણ છે શક્તિશાળી?
IPL ઈતિહાસમાં અત્યાર સુધી રાજસ્થાન રોયલ્સ અને RCB વચ્ચે કુલ 34 મુકાબલા થયા છે. આ આંકડાઓમાં બેંગલુરુનો પક્ષ થોડો ભારે રહ્યો છે:
- RCB જીત: 17 મેચ
- રાજસ્થાન જીત: 14 મેચ
- પરિણામ વગરની મેચ: 3
બંને ટીમોની સંભવિત પ્લેઈંગ-11
રોયલ ચેલેન્જર્સ બેંગલુરુ (RCB): ફિલ સોલ્ટ, વિરાટ કોહલી, દેવદત્ત પડિક્કલ, રજત પાટીદાર (કેપ્ટન), જીતેશ શર્મા (વિકેટકીપર), ટિમ ડેવિડ, રોમારિયો શેફર્ડ, કૃણાલ પંડ્યા, ભુવનેશ્વર કુમાર, અભિનંદન સિંહ, જેકબ ડફી.
રાજસ્થાન રોયલ્સ (RR): વૈભવ સૂર્યવંશી, યશસ્વી જયસ્વાલ, ધ્રુવ જુરેલ (વિકેટકીપર), રિયાન પરાગ (કેપ્ટન), શિમરોન હેટમાયર, ડોનોવન ફરેરા, રવિન્દ્ર જાડેજા, જોફ્રા આર્ચર, નાન્દ્રે બર્ગર, તુષાર દેશપાંડે, સંદીપ શર્મા.
