પાકિસ્તાનમાં પેટ્રોલ ₹414 ને પાર: આર્થિક તબાહીનો ફફડાટ, અસ્તિત્વ બચાવવા સરકારના ધમપછાડા
પાકિસ્તાનમાં બુધવારે પેટ્રોલની કિંમતોએ તમામ રેકોર્ડ તોડી નાખ્યા છે અને ભાવ 414 રૂપિયા પ્રતિ લિટરને પાર કરી ગયા છે. માત્ર પેટ્રોલ જ નહીં, પણ રાંધણ ગેસ (LPG) પણ પ્રતિ કિલો 300 રૂપિયાથી મોંઘો થયો છે. દેશમાં કાચા તેલનો સ્ટોક હવે માંડ એક અઠવાડિયા જેટલો જ બચ્યો છે, જ્યારે પેટ્રોલ-ડીઝલનો જથ્થો પણ માત્ર 30 દિવસ સુધી ચાલે તેમ છે. આ આંકડા પાકિસ્તાનની ડૂબતી અર્થવ્યવસ્થાની ભયાનક તસવીર રજૂ કરે છે.
સંકટમાંથી બચવા સરકારના ઉપાયો
આસમાને પહોંચેલી મોંઘવારી અને ખાલી થતા જતા વિદેશી મુદ્રા ભંડારને બચાવવા માટે શાહબાઝ શરીફ સરકારે અનેક મોરચે લડત શરૂ કરી છે:
ઈંધણની બચત: સરકારી કચેરીઓમાં વીજળી અને ઈંધણના વપરાશ પર કડક નિયંત્રણો લાદવામાં આવ્યા છે. બિનજરૂરી પ્રવાસો પર રોક લગાવી દેવામાં આવી છે.
વૈકલ્પિક ઉર્જા: તેલની આયાત પરની નિર્ભરતા ઘટાડવા માટે સરકાર હવે સોલર અને વિન્ડ એનર્જી પ્રોજેક્ટ્સ પર ભાર મૂકી રહી છે, જોકે આના પરિણામો મળતા વાર લાગશે.
ખાદી દેશો પાસે મદદની આશા: પાકિસ્તાન અત્યારે સાઉદી અરેબિયા, કતાર અને UAE જેવા દેશો સાથે વાતચીત કરી રહ્યું છે જેથી તેમને ઉધાર અથવા લાંબા ગાળાના પેમેન્ટ પર તેલ અને ગેસ મળી શકે.
આયાત પર કડક નિયંત્રણો અને ઉદ્યોગો પર અસર
પાકિસ્તાનનો વેપાર ઘટાડો (Trade Deficit) એપ્રિલમાં 4.07 અબજ ડોલર સુધી પહોંચી ગયો છે. ડોલર બચાવવા માટે સરકારે બિનજરૂરી ચીજવસ્તુઓની આયાત પર પ્રતિબંધ મૂક્યો છે. આનો સીધો ફટકો ઉદ્યોગોને પડ્યો છે, કારણ કે ઉર્જાની અછતને લીધે કારખાનાઓમાં વીજળી કાપ અને ગેસ સપ્લાયમાં ઘટાડો કરવામાં આવ્યો છે, જેનાથી ઉત્પાદન ખર્ચ વધી ગયો છે.
IMF ની કડક શરતો અને જનતાની હાલાકી
પાકિસ્તાન અત્યારે ઈન્ટરનેશનલ મોનેટરી ફંડ (IMF) અને અન્ય વૈશ્વિક સંસ્થાઓના શરણે છે. જોકે, ત્યાંથી આર્થિક પેકેજ મેળવવા માટે સરકારે સબસિડીમાં કાપ અને ટેક્સમાં વધારો જેવા કડક નિર્ણયો લેવા પડશે. આનો અર્થ એ છે કે આવનારા દિવસોમાં વીજળી અને પેટ્રોલ હજુ પણ મોંઘા થઈ શકે છે.
