રાષ્ટ્રીય સ્વયંસેવક સંઘ સાથે જોડાયેલા સ્વદેશી જાગરણ મંચ (એસજેએમ)એ નવા કૃષિ કાયદાઓમાં કેટલાક સુધારાસૂચવ્યા છે. તેમાં કહેવામાં આવ્યું છે કે લઘુતમ ટેકાના ભાવ (એમએસપી)થી ઓછી કિંમતે ખરીદી ગેરકાયદેસર જાહેર કરવી જોઈએ. એસજેએમ એમ પણ માને છે કે નવા કાયદા લાવવા પાછળ સરકારનો ઇરાદો સારો હતો.
સંગઠને એક ઠરાવ પસાર કરીને ખેડૂતોને એમએસપીની બાંયધરી આપવાની પણ હિમાયત કરી છે. તેમાં એમ પણ કહેવામાં આવ્યું હતું કે, એમએસપીથી ઓછી કિંમતે ખરીદી ગેરકાયદેસર જાહેર કરવી જોઈએ, પછી ભલે ને સરકાર કે ખાનગી ક્ષેત્ર ખરીદી ન કરે.
એસજેએમના સહ સંયોજક અશ્વની મહાજને જણાવ્યું હતું કે મંડી ફી રદ કરવાથી ખરીદદારોને મંડીની બહાર ખરીદી કરવા માટે પ્રોત્સાહિત કરવામાં આવશે. એટલું જ નહીં, ખેડૂતો પણ મંડીની બહાર પોતાનો ઉત્પાદન વેચશે.
પ્રસ્તાવમાં કહેવામાં આવ્યું છે કે એસજેએમ નું માનવું છે કે મોટી કંપનીઓ દ્વારા ખરીદીથી ખેડૂતોનું શોષણ થઈ શકે છે. તેથી, જ્યારે મંડીની બહાર ખરીદીની મંજૂરી આપવામાં આવે ત્યારે એમએસપીની પણ ગેરંટી આપવામાં આવે તે જરૂરી છે.
