હવે બદલાઈ જશે ઇન્ટરનેટ વાપરવાની રીત! ગૂગલે કર્યું એવું મોટું એઆઈ લાઈવ, જે જોઈને તમે પણ ચોંકી જશો.
તકનીકી દુનિયામાં એક બહુ મોટો અને ઐતિહાસિક બદલાવ આવવા જઈ રહ્યો છે. અત્યાર સુધી આપણે જ્યારે પણ ઇન્ટરનેટ પર કોઈ માહિતી શોધવી હોય, ત્યારે ગૂગલ (Google) નો ઉપયોગ કરતા આવ્યા છીએ. પરંતુ હવે દુનિયાનું આ સૌથી મોટું સર્ચ પ્લેટફોર્મ સંપૂર્ણપણે બદલાવા જઈ રહ્યું છે. કંપનીએ તેના વાર્ષિક ‘Google I/O’ કાર્યક્રમમાં સર્ચ એન્જિનનું એક નવું, સંપૂર્ણ આર્ટિફિશિયલ ઇન્ટેલિજન્સ (AI) આધારિત સ્વરૂપ દુનિયા સમક્ષ રજૂ કર્યું છે.
આ નવા બદલાવ પછી, જ્યારે પણ કોઈ યુઝર ગૂગલ પર કંઈક શોધશે, ત્યારે તેને વેબસાઇટ્સની લાંબી યાદી જોવા નહીં મળે. તેના બદલે ગૂગલ પોતે જ તે પ્રશ્નને સમજીને એક માણસની જેમ વાતચીતના અંદાજમાં આખો જવાબ તૈયાર કરીને આપશે. આ સાથે જ AI એજન્ટ્સ અને નાના-નાના મિની એપ્સ પણ હવે ગૂગલ સર્ચનો એક મહત્વનો ભાગ બનશે. આ ક્રાંતિકારી ફેરફારની સૌથી મોટી અસર એ થશે કે લોકોએ માહિતી મેળવવા માટે વારંવાર અલગ-અલગ વેબસાઇટ્સ પર જઈને ક્લિક કરવાની જરૂરિયાત ખૂબ જ ઘટી જશે.
AI સર્ચ બોક્સ: હવે પ્રશ્નો પૂછવાનું બનશે એકદમ સરળ અને સ્માર્ટ
ગૂગલનું નવું સર્ચ બોક્સ હવે પહેલા કરતાં ઘણું વધારે બુદ્ધિશાળી અને સ્માર્ટ બનવા જઈ રહ્યું છે. અત્યાર સુધી આપણે ગૂગલ પર સર્ચ કરવા માટે ટૂંકા શબ્દો કે કીવર્ડ્સનો ઉપયોગ કરતા હતા, પરંતુ હવે યુઝર્સ લાંબા અને સામાન્ય વાતચીત જેવા પ્રશ્નો પણ પૂછી શકશે. આ નવું એઆઈ સિસ્ટમ પોતે જ સમજી જશે કે યુઝર વાસ્તવમાં શું જાણવા માંગે છે અને તે જ પ્રમાણે સચોટ જવાબ તૈયાર કરશે.
આટલું જ નહીં, ગૂગલ હવે માત્ર પ્રશ્ન અધૂરો હોય ત્યારે શબ્દો પૂરા કરવાનું (ઓટો-કમ્પ્લીટ) કામ જ નહીં કરે, પરંતુ એઆઈ સામેથી એવા સૂચનો પણ આપશે જેથી યુઝર્સ વધુ સારો અને સચોટ પ્રશ્ન પૂછી શકે. ટૂંકમાં કહીએ તો, હવે ગૂગલ સર્ચ કોઈ મશીનની જેમ નહીં પરંતુ એક જીવંત માણસની જેમ તમારી સાથે સંવાદ સાધશે.
સામાન્ય યુઝર્સને આનાથી શું ફાયદો થશે?
આ નવી એઆઈ સર્ચ ટેકનોલોજી આવવાથી સામાન્ય યુઝર્સના સમયની મોટી બચત થશે. પહેલાના સમયમાં કોઈપણ વિષયની ઊંડી માહિતી જોઈતી હોય તો ચાર-પાંચ અલગ-અલગ વેબસાઇટ્સ ખોલીને વાંચવી પડતી હતી, પરંતુ હવે ગૂગલ પોતે જ ઇન્ટરનેટ પર ઉપલબ્ધ તમામ માહિતીનું વિશ્લેષણ કરીને તેને ખૂબ જ સરળ અને સ્પષ્ટ ભાષામાં યુઝર સામે મૂકી દેશે.
આ સિવાય, યુઝર્સ અહીં એક પ્રશ્ન પછી તેને સંબંધિત બીજા પ્રશ્નો (ફોલો-અપ ક્વેશ્ચન્સ) પણ પૂછી શકશે, બિલકુલ એમ જ જેમ આપણે કોઈ નિષ્ણાત વ્યક્તિ સાથે સામસામે બેસીને ચર્ચા કરી રહ્યા હોઈએ. ઉદાહરણ તરીકે, જો કોઈ વ્યક્તિ બ્રહ્માંડના રહસ્યમય ‘બ્લેક હોલ’ વિશે પૂછશે, તો ગૂગલ તેને માત્ર લાંબા લેખો નહીં બતાવે, પરંતુ સ્ક્રીન પર જ અદભુત ગ્રાફિક્સ અને ઇન્ટરેક્ટિવ વિઝ્યુઅલ્સ દ્વારા આખી પ્રક્રિયા સરળતાથી સમજાવશે. હાલના સમયમાં આ પ્રકારનું કામ ‘ChatGPT’ દ્વારા કરવામાં આવે છે, પરંતુ હવે ગૂગલ આ સુવિધાને પોતાના મુખ્ય સર્ચ એન્જિનમાં જ જોડી રહ્યું છે.
બેકગ્રાઉન્ડમાં ચોવીસ કલાક કામ કરશે ‘AI Agents’
ગૂગલ હવે ઇન્ટરનેટની દુનિયામાં એવા ઇન્ફોર્મેશન એજન્ટ્સ (AI Agents) લાવી રહ્યું છે, જે યુઝર્સ માટે ચોવીસ કલાક બેકગ્રાઉન્ડમાં કામ કરશે. આ એજન્ટ્સ સતત ઇન્ટરનેટ પર નજર રાખશે અને યુઝરની જરૂરિયાત મુજબની માહિતી પોતાની મેળે શોધીને લાવશે.
ધારો કે કોઈ વ્યક્તિ શેરબજારની કોઈ ચોક્કસ કંપની અથવા કોઈ ખાસ ક્ષેત્ર (સેક્ટર) પર નજર રાખવા માંગે છે, તો આ એઆઈ એજન્ટ સતત બજારના અપડેટ્સને ટ્રેક કરતો રહેશે. જ્યારે પણ તે શેરમાં અથવા કંપનીમાં કોઈ મોટો બદલાવ કે સમાચાર આવશે, ત્યારે એઆઈ એજન્ટ તરત જ યુઝરને એલર્ટ અથવા નોટિફિકેશન મોકલી દેશે. આનો અર્થ એ થયો કે હવે લોકોએ કોઈપણ નવી માહિતી મેળવવા માટે વારંવાર જાતે સર્ચ બોક્સમાં જઈને ટાઈપ કરવાની જરૂર રહેશે નહીં.
વેબસાઇટ્સ અને પબ્લિશર્સ પર આની શું અસર પડશે?
ગૂગલના આ ઐતિહાસિક બદલાવની સૌથી ગંભીર અને નકારાત્મક અસર દુનિયાભરની વેબસાઇટ્સ અને ન્યૂઝ પબ્લિશર્સ (સમાચાર માધ્યમો) પર પડી શકે છે. કારણ કે જ્યારે યુઝર્સને તેમના તમામ પ્રશ્નોના જવાબો સીધા ગૂગલના હોમ પેજ પર જ એઆઈ દ્વારા મળી જશે, ત્યારે તેઓ મૂળ વેબસાઇટની લિંક પર ક્લિક કરવાનું બંધ કે ઓછું કરી દેશે.
આ અગાઉ પણ ગૂગલના ‘AI Overviews’ ફીચરના કારણે ઘણી મોટી વેબસાઇટ્સના ટ્રાફિકમાં (વાચકોની સંખ્યામાં) મોટો ઘટાડો નોંધાયો છે. હવે આ નવી એઆઈ સર્ચ અને જનરેટિવ યુઝર ઇન્ટરફેસ (UI) આવ્યા પછી લોકોની અન્ય વેબસાઇટ્સ પરની નિર્ભરતા હજુ વધારે ઘટી જશે. આના કારણે ડિજિટલ મીડિયા ઇન્ડસ્ટ્રી અને ઓનલાઇન જાહેરાતો (એડવર્ટાઇઝમેન્ટ) ના આધારે ચાલતા પ્લેટફોર્મ્સની આવકને મોટું નુકસાન થવાની આશંકા સેવાઈ રહી છે.
