રોકાણકારો લોટરી લાગવા માટે તૈયાર! માત્ર ₹૧૪૯ ના આઇપીઓ પર કેમ મંડાયેલી છે આખા બજારની નજર?
ભારતીય શેરબજારમાં પ્રાઇમરી માર્કેટ એટલે કે આઇપીઓ (IPO) નો ઉત્સાહ એકવાર ફરી ચરમસીમાએ પહોંચવા જઈ રહ્યો છે. નવા નાણાકીય વર્ષની શરૂઆત સાથે જ રોકાણકારો માટે કમાણી કરવાની વધુ એક શાનદાર તક આવી ગઈ છે. જૂન મહિનાનો સૌથી પહેલો આઇપીઓ ઇલેક્ટ્રોનિક્સ અને ડિફેન્સ (સંરક્ષણ) સેક્ટર સાથે સંકળાયેલી જાણીતી કંપની ‘મેરિટ્રોનિક્સ લિમિટેડ’ (Merritronix) લઈને આવી રહી છે. તેલંગાણા સ્થિત આ કંપની આગામી ૧ જૂના રોજ પોતાનો આઇપીઓ સામાન્ય રોકાણકારો માટે ખુલ્લો મૂકશે. કંપની આ પબ્લિક ઇશ્યૂ (Public Issue) દ્વારા બજારમાંથી આશરે ૭૦ કરોડ રૂપિયા એકત્ર કરવા માંગે છે. આ આઇપીઓની સૌથી ખાસ વાત એ છે કે આ આખો ઇશ્યૂ ‘ફ્રેશ ઇશ્યૂ’ (Fresh Issue) છે, એટલે કે કંપનીના કોઈ પણ જૂના પ્રમોટર કે રોકાણકારો પોતાના શેર વેચીને બહાર નથી નીકળી રહ્યા, પરંતુ તમામ નાણાં કંપનીના વિકાસ માટે વાપરવામાં આવશે.
કંપની શું કામ કરે છે? ડિફેન્સ અને એરોસ્પેસ સેક્ટરમાં મોટું નામ
મેરિટ્રોનિક્સ લિમિટેડ મુખ્યત્વે ઇલેક્ટ્રોનિક મેન્યુફેક્ચરિંગ સર્વિસીસ (EMS) સેક્ટરમાં કાર્યરત છે. કંપની બિઝનેસ-ટુ-બિઝનેસ (B2B) મોડલ પર કામ કરે છે અને એરોસ્પેસ (Aerospace) તથા ડિફેન્સ (Defence) ઉદ્યોગો માટે અત્યંત મહત્વપૂર્ણ અને હાઇ-ટેક ઇલેક્ટ્રોનિક પ્રોડક્ટ્સ તૈયાર કરે છે. કંપનીની મુખ્ય સેવાઓ અને કામગીરી પર નજર કરીએ તો:
-
ઇલેક્ટ્રોનિક કમ્પોનન્ટ સોર્સિંગ: વિવિધ પ્રોડક્ટ્સ માટે જરૂરી પાર્ટ્સ એકત્ર કરવા.
-
PCB એસેમ્બલી: ઇલેક્ટ્રોનિક સાધનોનું હૃદય ગણાતી પ્રિન્ટેડ સર્કિટ બોર્ડ (PCB) નું હાઇ-ટેક એસેમ્બલીંગ કરવું.
-
સિસ્ટમ ઇન્ટિગ્રેશન અને ટેસ્ટિંગ: તમામ સિસ્ટમ્સને એકસાથે જોડીને તેનું સખત ગુણવત્તા પરીક્ષણ કરવું.
-
ફિનિશ્ડ પ્રોડક્ટ્સ: સંરક્ષણ અને ઉડ્ડયન ક્ષેત્રે સીધા વાપરી શકાય તેવા તૈયાર ઇલેક્ટ્રોનિક સાધનોનું ઉત્પાદન.
છેલ્લા કેટલાક વર્ષોમાં ભારત સરકાર દ્વારા ‘મેક ઇન ઇન્ડિયા’ હેઠળ ડિફેન્સ અને ઇન્ડિજિનયસ ઇલેક્ટ્રોનિક્સ મેન્યુફેક્ચરિંગ પર ઘણો વધારે ભાર મૂકવામાં આવી રહ્યો છે. આ જ કારણે બજારના વિશ્લેષકો અને રોકાણકારોની નજર આ આઇપીઓ પર ટકેલી છે, કારણ કે સંરક્ષણ ક્ષેત્રની વધતી માંગનો સીધો ફાયદો આ કંપનીને મળવાની પૂરેપૂરી સંભાવના છે.
IPO ક્યારે ખુલશે? પ્રાઇસ બેન્ડ અને લિસ્ટિંગની તારીખો
જો તમે પણ આ આઇપીઓમાં નાણાં રોકવાનું વિચારી રહ્યા છો, તો તેની મહત્વની તારીખો અને આંકડાઓ નોંધી લેવા જેવા છે:
-
આઇપીઓ ઓપનિંગ ડેટ: આ ઇશ્યૂ ૧ જૂનના રોજ ખુલશે અને રોકાણકારો ૩ જૂન સુધી તેમાં બોલી (Bid) લગાવી શકશે.
-
એન્કર ઇન્વેસ્ટર્સ: મોટા અને સંસ્થાકીય રોકાણકારો (Anchor Investors) માટે આ ઇશ્યૂ ૨૯ મેના રોજ જ ખૂલી જશે.
-
પ્રાઇસ બેન્ડ (Price Band): કંપનીએ પોતાના શેરની કિંમત રૂ. ૧૪૧ થી રૂ. ૧૪૯ પ્રતિ શેર નક્કી કરી છે. આ વેલ્યુએશનના આધારે કંપનીની કુલ માર્કેટ વેલ્યૂ અંદાજે ૨૬૦ કરોડ રૂપિયા આંકવામાં આવી છે.
-
એલોટમેન્ટ અને લિસ્ટિંગ: આઇપીઓનું એલોટમેન્ટ (શેરની ફાળવણી) ૪ જૂન સુધીમાં ફાઇનલ થઈ જવાની આશા છે. જ્યારે કંપનીના શેર ૮ જૂનના રોજ BSE ના SME પ્લેટફોર્મ પર લિસ્ટ થશે.
આઇપીઓ દ્વારા એકત્રિત ભંડોળનો કંપની ક્યાં ઉપયોગ કરશે?
મેરિટ્રોનિક્સ કંપનીએ સેબી (SEBI) ને સબમિટ કરેલા દસ્તાવેજોમાં સ્પષ્ટ કર્યું છે કે આઇપીઓમાંથી મળનારી અંદાજે ૭૦ કરોડ રૂપિયાની રકમનો ઉપયોગ કંપનીના બિઝનેસને આગળ વધારવા અને દેવું ચૂકવવા માટે કરવામાં આવશે:
૧. નવી મશીનરીની ખરીદી: કંપની પોતાના ઉત્પાદનની ક્ષમતા વધારવા માટે અંદાજે ૨૧.૩૬ કરોડ રૂપિયા નવી આધુનિક મશીનરી અને સાધનો ખરીદવા પાછળ ખર્ચ કરશે. ૨. વર્કિંગ કેપિટલની જરૂરિયાત: રોજિંદા વેપાર અને મોટા ઓર્ડર્સ પૂરા કરવા માટે આશરે ૨૧.૯૫ કરોડ રૂપિયા વર્કિંગ કેપિટલ તરીકે રાખવામાં આવશે. ૩. દેવાની ચુકવણી: કંપની પોતાની બેલેન્સ શીટને મજબૂત કરવા અને વ્યાજનો બોજ ઘટાડવા માટે ૧૨.૭ કરોડ રૂપિયાનું જૂનું કરજ ચૂકવશે. ૪. જનરલ કોર્પોરેટ હેતુ: બાકી બચેલી રકમ કંપનીના અન્ય સામાન્ય વહીવટી અને કોર્પોરેટ કાર્યોમાં વાપરવામાં આવશે.
નાણાકીય સ્થિતિ મજબૂત: નફામાં ૮૬ ટકાનો બમ્પર ઉછાળો
કોઈપણ કંપનીના આઇપીઓમાં રોકાણ કરતા પહેલા તેની નાણાકીય સ્થિતિ (Financial Performance) જોવી ખૂબ જરૂરી છે. મેરિટ્રોનિક્સનો ટ્રેક રેકોર્ડ છેલ્લા કેટલાક સમયમાં ઘણો શાનદાર રહ્યો છે:
નાણાકીય વર્ષ ૨૦૨૬માં કંપનીનો ચોખ્ખો નફો (Net Profit) વધીને ૧૬.૧ કરોડ રૂપિયા પર પહોંચી ગયો છે, જે તેના અગાઉના વર્ષે માત્ર ૮.૭ કરોડ રૂપિયા હતો. આમ, કંપનીના વાર્ષિક નફામાં આશરે ૮૬ ટકાનો મસમોટો ઉછાળો નોંધાયો છે. આ સાથે જ કંપનીની કુલ આવક (Revenue) પણ ૧૧૩.૬ કરોડ રૂપિયાથી વધીને ૧૫૫.૯ કરોડ રૂપિયા થઈ ગઈ છે, જે ૩૭ ટકાથી વધુની વાર્ષિક વૃદ્ધિ (Growth) દર્શાવે છે.
