ઉત્તર પ્રદેશ, બિહાર સહિત ૧૯ રાજ્યોમાં કુદરતનો પ્રકોપ, હવામાન વિભાગે જાહેર કર્યું ઓરેન્જ એલર્ટ
ચોમાસાના આગમન સાથે જ દેશભરમાં ગરમીનો પારો ગગડ્યો છે અને લોકોને બફારામાંથી મોટી રાહત મળી છે. જોકે, આ રાહત હવે આફતમાં બદલાય તેવા સંકેતો મળી રહ્યા છે. ભારતીય હવામાન વિભાગ (IMD) એ આજે, ૨ જુલાઈના રોજ દેશના ૧૯ થી વધુ રાજ્યો માટે હાઈ એલર્ટ જાહેર કર્યું છે. હવામાન વૈજ્ઞાનિકોના જણાવ્યા અનુસાર, બંગાળની ખાડીના ઉત્તર અને તેની આસપાસના વિસ્તારોમાં એક શક્તિશાળી ઉચ્ચ સ્તરીય ચક્રવાતી પરિભ્રમણ (Cyclonic Circulation) વિકસિત થઈ રહ્યું છે. આ સિવાય પશ્ચિમ ભારતમાં સૌરાષ્ટ્ર અને તેની આસપાસના વિસ્તારો પર પણ વધુ એક ચક્રવાતી સિસ્ટમ સક્રિય હોવાને કારણે દેશભરમાં ચોમાસું પ્રચંડ બન્યું છે. આગામી ૨૪ કલાક દરમિયાન પૂર્વ, ઉત્તર અને મધ્ય ભારતના ૧૯ રાજ્યોમાં ૬૦ થી ૮૦ કિલોમીટર પ્રતિ કલાકની ઝડપે તોફાની પવન ફૂંકાવાની અને મુસળધાર વરસાદ પડવાની આશંકા છે.
પહાડી અને નદી કિનારાના વિસ્તારો માટે ખાસ એડવાઈઝરી
હવામાન વિભાગે પૂર્વ ભારતના રાજ્યો અને નદી કિનારે વસતા ખેડૂતો તેમજ માછીમારોને તાકીદે સુરક્ષિત સ્થળોએ ખસી જવાની કડક સૂચના આપી છે. પહાડી રાજ્યોમાં ભૂસ્ખલન (Landslide) અને વાદળ ફાટવાની ઘટનાઓ વધી શકે છે, તેથી પ્રવાસીઓને ગાઢ જંગલો અને પહાડી રસ્તાઓ પર મુસાફરી ન કરવા જણાવાયું છે. કેટલીક જગ્યાએ ભારે પવન સાથે મોટા કરા પડવાની પણ સંભાવના છે.
દિલ્હી-NCR અને ઉત્તર પ્રદેશ (UP) માં તોફાની પવન
રાજધાની દિલ્હીમાં આજે ૨ જુલાઈના રોજ વાવાઝોડા સાથે મુસળધાર વરસાદની ચેતવણી છે. દિલ્હીમાં પવનની ગતિ ૭૦ થી ૮૦ કિલોમીટર પ્રતિ કલાક સુધી પહોંચી શકે છે, જેના કારણે લઘુત્તમ તાપમાન ૨૯ ડિગ્રી અને મહત્તમ તાપમાન ૩૪ ડિગ્રી સેલ્સિયસ આસપાસ રહેશે. બીજી તરફ, ઉત્તર પ્રદેશમાં ૨ થી ૫ જુલાઈ સુધી અતિભારે વરસાદનું એલર્ટ છે. યુપીના બિજનૌર, મેરઠ, સહારનપુર, બદાઉન, રામપુર, આગ્રા, મથુરા, બરેલી, ગાઝીપુર અને પ્રતાપગઢ સહિતના જિલ્લાઓમાં ૮૦ કિમીની ઝડપે પવન ફૂંકાશે.
બિહાર અને ઝારખંડમાં મેઘતાંડવ
બિહારમાં પશ્ચિમ અને પૂર્વ ચંપારણ, પટના, મુઝફ્ફરપુર, પૂર્ણિયા અને સમસ્તીપુર જેવા જિલ્લાઓમાં વીજળીના કડાકા-ભડાકા સાથે ભારે વરસાદ પડી શકે છે. અહીં પવનની ગતિ ૬૦ થી ૭૦ કિમી પ્રતિ કલાક રહેવાની ધારણા છે. ઝારખંડમાં પણ ૨ થી ૪ જુલાઈ દરમિયાન રાંચી, ધનબાદ, દેવઘર અને હજારીબાગ સહિતના વિસ્તારોમાં કરા પડવાની અને ભારે તોફાનની ચેતવણી આપવામાં આવી છે.
ઉત્તરાખંડ અને હિમાચલ પ્રદેશમાં એલર્ટ
બાકીના પહાડી રાજ્યોની વાત કરીએ તો, ઉત્તરાખંડના બાગેશ્વર, નૈનીતાલ, હરિદ્વાર અને ઋષિકેશમાં ૬૫ કિમીની ઝડપે પવન સાથે આકાશી આફત વરસી શકે છે. હિમાચલ પ્રદેશના કાંગડા, શિમલા, કુલ્લુ અને મનાલીમાં પણ વરસાદી માહોલ રહેશે, જેના કારણે મનાલીમાં તાપમાન ગગડીને લઘુત્તમ ૧૦ ડિગ્રી સુધી પહોંચી જશે. જમ્મુ-કાશ્મીરમાં પણ ૫ જુલાઈ સુધી જમ્મુ અને કઠુઆ સહિતના ભાગોમાં ભારે પવન સાથે વરસાદ ચાલુ રહેશે.
પશ્ચિમ અને મધ્ય ભારતની સ્થિતિ
મહારાષ્ટ્રમાં મુંબઈ, પુણે, નાગપુર અને અમરાવતીમાં ૭૦ કિમીની ઝડપે પવન ફૂંકાવાની શક્યતા સાથે મધ્યમથી ભારે વરસાદની આગાહી છે. પંજાબના અમૃતસર અને જલંધર તેમજ રાજસ્થાનના જયપુર, ઉદયપુર, જેસલમેર અને બાડમેર જેવા રણના વિસ્તારોમાં પણ ૭૦ કિમીની ઝડપે વાવાઝોડું ત્રાટકશે. મધ્યપ્રદેશના ઈન્દોર, ભોપાલ અને છિંદવાડા સહિતના વિસ્તારોમાં પણ ભારે વરસાદને કારણે નીચાણવાળા વિસ્તારોમાં એલર્ટ જાહેર કરવામાં આવ્યું છે.
નાગરિકોને અપીલ કરવામાં આવે છે કે તોફાન અને વીજળીના કડાકા વખતે મોટા વૃક્ષો કે નબળા બાંધકામોની નીચે આશ્રય લેવાનું ટાળે અને પ્રવાસ દરમિયાન સ્થાનિક વહીવટીતંત્રની સૂચનાઓનું ચુસ્તપણે પાલન કરે.
