ક્રિકેટના આંગણે ‘દ્રવિડ યુગ’ નો નવો સૂર્યોદય: અન્વય અને સમિતની બેવડી ગર્જના
ભારતીય ક્રિકેટમાં ‘ધ વોલ’ તરીકે ઓળખાતા મહાન બેટ્સમેન રાહુલ દ્રવિડનું નામ માત્ર એક ખેલાડી તરીકે જ નહીં, પરંતુ એક સજ્જન અને શિસ્તબદ્ધ રમતવીર તરીકે આદરપૂર્વક લેવાય છે. દેશ માટે વર્ષો સુધી અભેદ્ય કિલ્લો બનીને ઊભા રહેલા રાહુલ દ્રવિડે નિવૃત્તિ બાદ કોચ તરીકે પણ ભારતને ટી૨૦ વર્લ્ડ કપ જિતાડવામાં મોટી ભૂમિકા ભજવી. પરંતુ, હવે વારો દ્રવિડ પરિવારની નવી પેઢીનો છે. કહેવાય છે ને કે ‘મોરના ઈંડા ચિતરવા ન પડે’ આ કહેવતને રાહુલ દ્રવિડના બંને પુત્રો, સમિત અને અન્વય દ્રવિડ અક્ષરશઃ સાચી સાબિત કરી રહ્યા છે.
હાલમાં જ ભારતીય સ્થાનિક ક્રિકેટ અને જુનિયર આંતરરાષ્ટ્રીય સ્તરે આ બંને ભાઈઓએ જે પ્રકારનું પ્રદર્શન કર્યું છે, તે જોતાં ક્રિકેટપ્રેમીઓમાં એક નવી આશા જાગી છે. એક તરફ નાનો ભાઈ અન્વય શ્રીલંકા સામે ભારત અંડર-૧૯ ટીમ વતી ધમાકેદાર ઇનિંગ રમી રહ્યો છે, તો બીજી તરફ મોટો ભાઈ સમિત મહારાજા ટ્રોફીમાં ઓલરાઉન્ડ પ્રદર્શનથી વાહવાહી લૂંટી રહ્યો છે.
અન્વય દ્રવિડ: મુશ્કેલ સમયમાં પિતાની જેમ જ ‘ધ વોલ’ બનવાની ક્ષમતા
શ્રીલંકાના હંબનટોટા ખાતે રમાયેલી ભારત અંડર-૧૯ અને શ્રીલંકા અંડર-૧૯ વચ્ચેની બીજી યુવા વનડે મેચમાં ૧૭ વર્ષના અન્વય દ્રવિડે પોતાની જે પરિપક્વતા બતાવી, તેણે બધાના દિલ જીતી લીધા. ભારતીય ટીમ એક સમયે ભારે દબાણમાં હતી. માત્ર ૧૮મી ઓવરમાં ૮૧ રનના સ્કોર પર ભારતની ૪ મહત્વની વિકેટો પડી ગઈ હતી. ક્રિઝ પર ઊભેલા યુવા ખેલાડીઓ માટે આ કટોકટીની પળ હતી.
આવા સમયે અન્વય દ્રવિડ મેદાન પર આવ્યો. તેણે જે રીતે ઇનિંગને સંભાળી, તે જોઈને તેના પિતા રાહુલ દ્રવિડની ટેકનિક યાદ આવી ગઈ. અન્વયે અર્જુન રાજપૂત સાથે મળીને ૧૨૬ બોલમાં ૧૪૪ રનની કિંમતી અને મજબૂત ભાગીદારી નોંધાવી. અન્વયે ઉતાવળ કરવાને બદલે સમજદારીપૂર્વક વચ્ચેની ઓવરો કાપી. તેણે પોતાની પહેલી બાઉન્ડ્રી ફટકારવા માટે ૧૪ બોલ લીધા, જે દર્શાવે છે કે તેનામાં કેટલી ધીરજ છે.
તેણે ૬૭ બોલમાં ૮૭ રનની શાનદાર ઇનિંગ રમી, જેમાં ૯ ચોગ્ગા અને ૧ આકાશચુંબી છગ્ગાનો સમાવેશ થાય છે. ખરાબ બોલ પર પ્રહાર કરવા અને સારા બોલ પર સિંગલ-ડબલ લઈને સ્કોરબોર્ડ ચાલુ રાખવાની તેની કળા અદભુત હતી. ૪૪મી ઓવરમાં ગિમ્હન મેન્ડિસ દ્વારા આઉટ થતાં પહેલાં તેણે ભારતનો સ્કોર ૨૮૫ સુધી પહોંચાડી દીધો હતો. જ્યારે તે ડગઆઉટ તરફ પાછો ફરી રહ્યો હતો, ત્યારે આખી સ્ટેડિયમ તાળીઓથી ગુંજી ઉઠ્યું હતું. માત્ર બીજી જ આંતરરાષ્ટ્રીય મેચમાં આવી પરિપક્વતા બતાવવી એ સાબિત કરે છે કે તે ભવિષ્યનો મોટો સ્ટાર છે.
મોટો ભાઈ સમિત દ્રવિડ: ટી૨૦ ફોર્મેટમાં ઓલરાઉન્ડર તરીકે ચમક્યો
નાનો ભાઈ દેશ માટે રમી રહ્યો હતો, ત્યારે ૨૦ વર્ષનો મોટો ભાઈ સમિત દ્રવિડ કર્ણાટકમાં રમાઈ રહેલી KSCA ટી૨૦ મહારાજા ટ્રોફીમાં ધમાલ મચાવી રહ્યો હતો. કલ્યાણી બેંગલુરુ બ્લાસ્ટર્સ તરફથી રમતા સમિતે રવિવારની સાંજે બેટ અને બોલ બંને વડે અદભુત પ્રદર્શન કરીને પોતાની ટીમને જીત અપાવી.
સમિત એક ફાસ્ટ બોલિંગ ઓલરાઉન્ડર છે. તેણે બેટિંગમાં માત્ર ૨૫ બોલમાં અણનમ ૪૦ રન ફટકારીને ટીમનો સ્કોર મજબૂત કર્યો. તેની બેટિંગમાં બેક-ફૂટ કટ અને લોફ્ટેડ ડ્રાઇવ્સ જોવા જેવા હતા. તેની ઊભા રહેવાની શૈલી (Stance), ડાબી કોણીની પોઝિશન અને બેટનો સ્વિંગ જોતાં જ ક્રિકેટ ચાહકોને રાહુલ દ્રવિડના યુવાનીના દિવસો યાદ આવી ગયા હતા. આ પહેલાં પણ તેણે બ્લાસ્ટર્સ માટે ૨૩ બોલમાં ૩૨ રનની આક્રમક ઇનિંગ રમી હતી.
માત્ર બેટિંગ જ નહીં, સમિતે બોલિંગમાં પણ પોતાની કરામત બતાવી. તેણે ચાર ઓવરમાં માત્ર ૨૩ રન આપીને ૨ મહત્વની વિકેટો ઝડપી. ટી૨૦ના આ આધુનિક યુગમાં એક ફાસ્ટ બોલિંગ ઓલરાઉન્ડરની ભારતને હંમેશા જરૂર રહે છે, અને સમિત બરાબર એ જ દિશામાં આગળ વધી રહ્યો છે.
સ્થાનિક ક્રિકેટમાં બંને ભાઈઓનો દબદબો
બંને દ્રવિડ બંધુઓ કર્ણાટક રાજ્ય માટે સ્થાનિક ક્રિકેટ રમે છે અને બંનેએ પોતપોતાની વયજૂથમાં શાનદાર પ્રદર્શન કર્યું છે. અન્વય દ્રવિડની વાત કરીએ તો, તેણે તાજેતરમાં જ કર્ણાટકની અંડર-૧૯ ટીમને વિનુ માંકડ ટ્રોફીની ક્વાર્ટર ફાઇનલમાં પહોંચાડવામાં મુખ્ય ભૂમિકા ભજવી હતી. તે ૬ ઇનિંગ્સમાં ૨૨૦ રન સાથે પોતાની ટીમનો બીજો સૌથી વધુ રન બનાવનાર ખેલાડી રહ્યો હતો.
બીજી તરફ, સમિત દ્રવિડે ૨૦૨૩/૨૪ની કૂચ બિહાર ટ્રોફીમાં કર્ણાટકને ચેમ્પિયન બનાવવામાં સિંહફાળો આપ્યો હતો. તેણે આખી ટૂર્નામેન્ટ દરમિયાન ૩૬૨ રન બનાવ્યા અને સાથે જ ૧૬ વિકેટો પણ ઝડપી હતી. આ જ પ્રદર્શનના આધારે ૨૦૨૪માં ઓસ્ટ્રેલિયા સામેની ભારત અંડર-૧૯ ટીમમાં તેની પસંદગી પણ થઈ હતી. જોકે, કમનસીબે ઘૂંટણની ઈજાના કારણે તે એ પ્રવાસમાં રમી શક્યો ન હતો. પરંતુ સોમવારે તેના નાના ભાઈ અન્વયે ભારતની જર્સી પહેરીને મેદાન પર ઉતરીને જાણે મોટા ભાઈનું એ સપનું પૂરું કર્યું હોય તેવો માહોલ સર્જાયો હતો.
