નવી દિલ્હી : સિંગર દિલજાન અમૃતસરથી કિરતારપુર તેના ઘરે જવા રવાના થયો હતો. ત્યારે તેને રસ્તામાં અકસ્માત નડ્યો હતો. અકસ્માત એટલો ભયંકર હતો કે, દિલજાનનું ઘટના સ્થળે જ મોત નીપજ્યું હતું. અહેવાલ મુજબ આ ઘટના મંગળવારે સવારે લગભગ 3.45 વાગ્યે બની હતી.
સિંગર દિલજાનનું કાર અકસ્માતમાં મોત
દિલજાનની કારનો અકસ્માત જાંડિયાલા ગુરુ પાસે થયો. તે કિરતારપુરનો રહેવાસી હતો. અકસ્માતનું કારણ તેની કારની હાઈ સ્પીડ હતી. અહેવાલો અનુસાર તેમની કારની ગતિ ખૂબ જ વધારે હતી અને અચાનક સંતુલન બગડવાના કારણે તે ડિવાઇડર સાથે અથડાયો હતો. આ ટક્કર એટલી જબરદસ્ત હતી કે દિલજાનનું ઘટના સ્થળે જ મોત નીપજ્યું હતું. ઘટના સ્થળે હાજર લોકો દિલજાનને ઉતાવળમાં હોસ્પિટલમાં લઈ ગયા હતા પરંતુ ડોક્ટરોએ તેને મૃત જાહેર કર્યો હતો.
પરિવારજનોએ જણાવ્યું કે કારમાં દિલજાન એકલો હતો
તે જ સમયે, દિલજાનના પરિવારના સભ્યોએ જણાવ્યું કે, 2 એપ્રિલે, તેમનું એક નવું ગીત રિલીઝ થવાનું છે. એટલા માટે તે મીટિંગ માટે અમૃતસર ગયો હતો. પરત ફરતી વખતે તેનો કાર અકસ્માત સર્જાયો હતો અને અકસ્માતમાં તેનું મોત નીપજ્યું. પરિવારે એમ પણ કહ્યું હતું કે દુર્ઘટના સમયે દિલજાન કારમાં એકલો હતો.
