અબજો ચેટ ડિલીટ કરી નાખી? OpenAI પર પુરાવા મિટાવવાનો ગંભીર આરોપ, AI જગતમાં મચ્યો હડકંપ!
આર્ટિફિશિયલ ઇન્ટેલિજન્સ (AI) ની દુનિયામાં ક્રાંતિ લાવનાર કંપની OpenAI અને અમેરિકાના ટોચના અખબારો વચ્ચે ચાલી રહેલી કાનૂની લડાઈએ હવે એક નવો અને આક્રમક વળાંક લીધો છે. ‘ધ ન્યૂયોર્ક ટાઇમ્સ’ (The New York Times) ની આગેવાની હેઠળના અખબારોના એક જૂથે મેનહટનની ફેડરલ કોર્ટમાં ધા નાખી છે. તેમણે કોર્ટને વિનંતી કરી છે કે કૉપિરાઇટના આ મામલામાં ઓપનએઆઈ પર કડક કાનૂની પ્રતિબંધો કે દંડ (Sanctions) લાદવામાં આવે. અખબારોનો આરોપ છે કે ચેટજીપીટી (ChatGPT) બનાવતી આ કંપનીએ કૉપિરાઇટ સામગ્રી શોધવાની પોતાની ક્ષમતા અંગે કોર્ટને ગેરમાર્ગે દોરી છે અને જૂઠું બોલી છે.
અખબારોનો ગંભીર આરોપ: ‘OpenAI એ પુરાવાઓનો નાશ કર્યો અને અબજો ચેટ ડિલીટ કરી’
મીડિયા રિપોર્ટ્સ અને ન્યૂઝ એજન્સી રોઇટર્સના જણાવ્યા અનુસાર, ધ ન્યૂયોર્ક ટાઇમ્સ, ન્યૂયોર્ક ડેઇલી ન્યૂઝ અને અન્ય અખબારોએ કોર્ટમાં સત્તાવાર રીતે જણાવ્યું છે કે, OpenAI એ જાણીજોઈને એવો દાવો કર્યો હતો કે તે તેના લાર્જ લેંગ્વેજ મોડલ્સ (LLMs) માં ન્યૂઝ ઓર્ગેનાઇઝેશનની કૉપિરાઇટ પ્રોડક્ટ્સ શોધવા માટે અસમર્થ છે. પબ્લિશર્સનો દાવો છે કે આ સંપૂર્ણપણે ખોટું છે, કારણ કે કંપનીએ કાનૂની કેસ દાખલ થયો તે પહેલાં જ પોતાના સ્તરે આવી આંતરિક તપાસ (Internal Searches) કરી લીધી હતી.
આટલું જ નહીં, પબ્લિશર્સે કોર્ટ ફાઇલિંગમાં એક ચોંકાવનારો આક્ષેપ પણ કર્યો છે. તેમના કહેવા મુજબ, OpenAI એ ચેટજીપીટી પર યુઝર્સ દ્વારા થયેલી અબજો વાતચીતો (Conversations) કાં તો ડિલીટ કરી નાખી છે અથવા તો તેને જાણીજોઈને એવી બનાવી દીધી છે કે તેને ક્યારેય સર્ચ ન કરી શકાય. અખબારોની દલીલ છે કે કંપનીએ કાનૂની કેસમાં મહત્વના પુરાવા તરીકે કામ આવી શકે તેવા ડેટાનો નાશ કરવાનો પ્રયાસ કર્યો છે. આ બદલ પબ્લિશર્સે કોર્ટ પાસે વકીલોની ફી વસૂલવા અને OpenAI ની આ કરતૂત બદલ તેને સજા કરવાની માંગ કરી છે.
‘બે વર્ષથી OpenAI કોર્ટ અને જનતા સમક્ષ જૂઠું બોલી રહ્યું છે’
આ વિવાદ અંગે વાત કરતા ધ ન્યૂયોર્ક ટાઇમ્સના મુખ્ય વકીલ ઇયાન ક્રોસબીએ જણાવ્યું હતું કે, “છેલ્લા બે વર્ષથી વધુ સમયથી OpenAI અમારી સાથે, ડેઇલી ન્યૂઝના પક્ષકારો સાથે, સામાન્ય જનતા અને માનનીય કોર્ટ સાથે સતત જૂઠું બોલી રહ્યું છે. કંપની એવી દલીલો કરતી હતી કે ChatGPT ના આઉટપુટમાં ન્યૂયોર્ક ટાઇમ્સ કે અન્ય અખબારોના કૉપિરાઇટ કન્ટેન્ટની નકલ શોધવી ટેકનિકલ રીતે અશક્ય છે, તે ખૂબ જ બોજારૂપ પ્રક્રિયા છે અને તેનાથી યુઝર્સની પ્રાઇવસી જોખમાય છે. આ બધી વાતો કરતી વખતે કંપનીએ એ વાત છુપાવી રાખી કે તેઓ આવી સર્ચ પહેલેથી જ કરી ચૂક્યા હતા.”
નવા કોર્ટ દસ્તાવેજો અનુસાર, અખબારોએ એવો પણ દાવો કર્યો છે કે ઓપનએઆઈના જ એક કર્મચારીએ પાછળથી સ્વીકાર્યું હતું કે કંપનીએ પબ્લિશર્સના કન્ટેન્ટ માટે મલ્ટિપલ સર્ચ કરી હતી. આ સ્વીકારોક્તિ કંપનીના અગાઉના દાવાઓને સંપૂર્ણપણે ખોટા સાબિત કરે છે.
OpenAI એ તમામ આરોપો ફગાવ્યા: ‘કેસ નબળો પડતાં પબ્લિશર્સ ખોટા આક્ષેપો કરે છે’
બીજી તરફ, એન્થ્રોપિક (Anthropic) જેવી હરીફ કંપનીઓ સામે ટક્કર લઈ રહેલી ઓપનએઆઈએ આ તમામ આક્ષેપોને સખત શબ્દોમાં નકારી કાઢ્યા છે. OpenAI ના પ્રવક્તા ડ્રુ પુસાટેરીએ આ અંગે સ્પષ્ટતા કરતા જણાવ્યું હતું કે, “જેમ જેમ ન્યૂયોર્ક ટાઇમ્સનો આ કેસ નબળો પડી રહ્યો છે અને તેમણે અમારી સામેના કેટલાક કાનૂની દાવાઓ પાછા ખેંચવા પડ્યા છે, તેમ તેમ તેઓ હવે એવા નિર્દોષ લોકોની પ્રાઇવસી પર તરાપ મારવાનો પ્રયાસ કરી રહ્યા છે જેમને આ કેસ સાથે કોઈ લેવાદેવા નથી. આ માટે તેઓ અમારા પર તદ્દન ખોટા અને પાયાવિહોણા આક્ષેપો લગાવી રહ્યા છે.”
આઈટી અને એઆઈ ઈન્ડસ્ટ્રીનો સૌથી મોટો કૉપિરાઇટ જંગ
તમને જણાવી દઈએ કે આ વિવાદની શરૂઆત વર્ષ ૨૦૨૩ માં થઈ હતી, જ્યારે ધ ન્યૂયોર્ક ટાઇમ્સે ઓપનએઆઈ અને માઇક્રોસોફ્ટ (Microsoft) સામે મોટો દાવો માંડ્યો હતો. અખબારનો આરોપ હતો કે આ કંપનીઓએ તેમના લાખો ન્યૂઝ આર્ટિકલ્સનો ઉપયોગ પબ્લિશર્સની પરવાનગી વગર કે કોઈ પણ જાતની રોયલ્ટી ચૂકવ્યા વગર ચેટજીપીટી જેવા આર્ટિફિશિયલ ઇન્ટેલિજન્સ મોડલને ટ્રેન કરવા માટે કર્યો છે.
હાલમાં આ કેસ સમગ્ર વિશ્વની ટેકનોલોજી અને મીડિયા ઈન્ડસ્ટ્રી માટે એક ટ્રેન્ડસેટર સાબિત થઈ શકે છે. માત્ર અખબારો જ નહીં, પરંતુ દુનિયાભરના જાણીતા લેખકો, કલાકારો, મ્યુઝિક લેબલ્સ અને અન્ય કન્ટેન્ટ ક્રિએટર્સે પણ OpenAI, મેટા (Meta) અને એન્થ્રોપિક જેવી મોટી એઆઈ કંપનીઓ સામે સમાન પ્રકારના કૉપિરાઇટ ભંગના કેસ દાખલ કરેલા છે. હવે જોવાનું એ રહેશે કે ન્યૂયોર્ક કોર્ટ પબ્લિશર્સની આ નવી અરજી પર શું ચુકાદો આપે છે.
