અખિલેશ યાદવનો આક્રમક વીડિયો વાયરલ: પોલીસ બેરીકેડ કૂદીને આગળ વધ્યા
સોમવારે, દિલ્હીમાં વિપક્ષી ગઠબંધન ઇન્ડિયા બ્લોકે સંસદથી ચૂંટણી પંચના કાર્યાલય સુધી કૂચ કાઢી. આ વિરોધ બિહારમાં ચાલી રહેલા સ્પેશિયલ સમરી રિવિઝન (SIR) અને 2024ની લોકસભા ચૂંટણીમાં કથિત “મત ચોરી”ના આરોપોનો વિરોધ હતો. પરંતુ દિલ્હી પોલીસે નેતાઓને સંસદની બહાર આગળ વધે તે પહેલાં જ રોકી દીધા. આ દરમિયાન, સમાજવાદી પાર્ટીના પ્રમુખ અખિલેશ યાદવ પોલીસ બેરિકેડ પર ચઢી ગયા અને બીજી બાજુ કૂદીને આગળ વધ્યા.
વિપક્ષી સાંસદોએ આરોપ લગાવ્યો કે સરકાર તેમને રોકવા અને તેમનો અવાજ દબાવવા માટે પોલીસનો ઉપયોગ કરી રહી છે. મીડિયા સાથે વાત કરતા અખિલેશ યાદવે કહ્યું, “અમને ચૂંટણી પંચમાં જતા અટકાવવામાં આવી રહ્યા છે. પોલીસ સરકારના દબાણ હેઠળ જ આ કાર્યવાહી કરી રહી છે.”
કૂચમાં કોંગ્રેસ, સમાજવાદી પાર્ટી, આમ આદમી પાર્ટી, DMK સહિત અનેક વિપક્ષી પક્ષોના નેતાઓ અને સાંસદો સામેલ હતા. લગભગ 300 સાંસદોએ તેમાં ભાગ લીધો હતો. તેઓએ ‘SIR લોકશાહી પર હુમલો છે’ અને ‘મત ચોરી’ જેવા નારા લખેલા પ્લેકાર્ડ પકડી રાખ્યા હતા. રાહુલ ગાંધી કૂચમાં આગળ હતા અને ઘણા વરિષ્ઠ વિપક્ષી નેતાઓ તેમની સાથે પગપાળા ચાલી રહ્યા હતા.
પોલીસે તેમને આગળ વધતા અટકાવ્યા ત્યારે ઘણા નેતાઓ ત્યાં ધરણા પર બેસી ગયા. બેરિકેડ પાર કર્યા પછી બીજી બાજુ બેઠેલા અખિલેશ યાદવ પણ ધરણામાં જોડાયા. વિપક્ષી નેતાઓએ કહ્યું કે તેમનો ઉદ્દેશ્ય ચૂંટણી પંચ સુધી પહોંચવાનો અને મતદાર યાદીમાં કથિત અનિયમિતતાઓ અને નકલી એન્ટ્રીઓ સામે મેમોરેન્ડમ સુપરત કરવાનો હતો.
વિપક્ષનો આરોપ છે કે મતદાર યાદીમાં મોટા પાયે નકલી ફોર્મ ભરવામાં આવ્યા છે અને વિસંગતતાઓ મળી આવી છે, જે નિષ્પક્ષ ચૂંટણીની શક્યતાને અસર કરી શકે છે. તેમણે માંગ કરી હતી કે આ યાદીઓના ઇલેક્ટ્રોનિક ડેટાની સ્વતંત્ર રીતે ચકાસણી કરવામાં આવે.
#WATCH | Delhi: Samajwadi Party chief Akhilesh Yadav jumps over a police barricade as Delhi Police stops INDIA bloc leaders marching from the Parliament to the Election Commission of India to protest against the Special Intensive Revision (SIR) of electoral rolls in poll-bound… pic.twitter.com/X8YV4mQ28P
— ANI (@ANI) August 11, 2025
દિલ્હી પોલીસ તરફથી એક નિવેદન આવ્યું છે કે આ વિરોધ પ્રદર્શન માટે કોઈ સત્તાવાર પરવાનગી લેવામાં આવી ન હતી, તેથી સંસદથી ચૂંટણી પંચ સુધી કૂચને મંજૂરી આપવામાં આવી ન હતી. પોલીસનું કહેવું છે કે તેમણે સુરક્ષા અને કાયદો અને વ્યવસ્થાને ધ્યાનમાં રાખીને આ પગલું ભર્યું છે.
આ ઘટનાક્રમ એવા સમયે બન્યો છે જ્યારે ચૂંટણી પ્રક્રિયાઓની પારદર્શિતા પર પ્રશ્નો ઉભા થઈ રહ્યા છે અને SIR પ્રક્રિયા પર રાજકીય વિવાદ વધી ગયો છે. વિપક્ષ માને છે કે SIR નો ઉપયોગ મતદાર યાદીઓમાં ફેરફાર કરવા માટે થઈ શકે છે, જ્યારે સરકાર કહે છે કે તે એક નિયમિત અને જરૂરી પ્રક્રિયા છે.
